ހުޅުމާލޭގައި ބައިނަލްއަގުވާމީ ފުޓްބޯޅަ ފެސިލިޓީއެއް ގާއިމްކުރުމަށް އެފްއޭއެމަށް ދޫކުރި ބިން އެކި ފަރާތްތަކަށް ކުއްޔަށް ދީގެން ލިބެންޖެހޭ ފައިސާގެ ތެރެއިން ގާތްގަނޑަކަށް 30 މިލިއަން ރުފިޔާ ގެއްލިފައިވާ މައްސަލައިގައި، އެއްވެސް ފައިސާއަކާ ހަވާލުނުވާ ކަމަށް އެފްއޭއެމްގެ ކުރީގެ ޖެނެރަލް ސެކްރެޓަރީ އަދި މިހާރުގެ ޔޫތު މިނިސްޓްރީގެ ޑެޕިއުޓީ މިނިސްޓަރު ހުސައިން ޖަވާޒު ވިދާޅުވެއްޖެ އެވެ.

އޮޑިޓް އޮފީހުން ނެރުނު ހާއްސަ އޮޑިޓް ރިޕޯޓެއްގައި ބުނެފައިވަނީ، އެ ބިން ކުއްޔަށް ދޫކުރުމުގެ މުއާމަލާތްތަކުގެ ތެރެއިން ލިބުނު ފައިސާއާ ހަވާލުވި ފަރާތްތަކުގެ ތެރޭގައި ޖަވާޒު ހިމެނޭ ކަމަށެވެ. އެ ރިޕޯޓުގައިވާ ގޮތުން، އެފްއޭއެމުން ފަސް ފަރާތަކާއެކު ހެދި ސަބްލީސް އެއްބަސްވުންތަކުގެ ދަށުން 14.1 މިލިއަން ރުފިޔާ ލިބިފައިވާކަން ލިޔެކިއުންތަކުން ދައްކާއިރު، އޭގެ ތެރެއިން 1.2 މިލިއަން ރުފިޔާއާ ހަވާލުވީ ޖަވާޒު ކަމަށް ވަނީ ފާހަގަކޮށްފަ އެވެ.

މިކަމާ ގުޅޭގޮތުން ޖަވާޒު ވިދާޅުވީ، އެއްވެސް ފައިސާއަކާ ހަވާލުނުވާ ކަމަށް އޮޑިޓް ރިޕޯޓަށް މައުލޫމާތު ދެއްވަމުން ވެސް ވިދާޅުވެފައިވާނެ ކަމަށެވެ. ނަމަވެސް، އެފްއޭއެމްގައި މަސައްކަތް ކުރެއްވިއިރު ބައެއް ފަރާތްތަކުން ދިން ޗެކްތަކާ އެކި ފަހަރުމަތިން ހަވާލުވެފައިވާނެ ކަމަށް އޭނާ އެއްބަސްވެވަޑައިގެންނެވިއެވެ.

"އަޅުގަނޑާ ހަވާލުވެފަ އޮންނަ ލިޔެކިއުމެއްވިޔަސް ފައިސާގެ ލިޔެކިއުމެއް ވެއްޖިއްޔާ ދާނީ ފައިނޭންސް ޑިޕާޓްމަންޓަށް، އަޤީލް ނޫނީ ބައްސާމަށް،" ޖަވާޒު ވިދާޅުވި އެވެ.

އޮޑިޓް ރިޕޯޓުގައިވާ ގޮތުން، ފައިސާއާ ހަވާލުވި ކަމަށް ބުނާ ރަސީދުތަކުގައި ސޮއިކޮށްފައިވަނީ ޖަވާޒުގެ އިތުރުން ކުރީގެ ރައީސް ބައްސާމް ޢަދީލް ޖަލީލާއި ކުރީގެ މާލީ ޑިރެކްޓަރު މުޙައްމަދު ޢަޤީލެވެ. އޭގެ ތެރެއިން ޢަޤީލް 9.9 މިލިއަން ރުފިޔާއާ ހަވާލުވި އިރު، ބައްސާމް ތިން މިލިއަން ރުފިޔާއާ ހަވާލުވި ކަމަށް އޮޑިޓުން ދައްކަ އެވެ. މި ތިން މީހުންގެ ތެރެއިން މިވަގުތު މިނިވަންކޮށް ހުންނެވީ ހަމައެކަނި ޖަވާޒެވެ.

ބައްސާމް މިހާރު ގެންދަވަނީ ހިޔާނާތުގެ މައްސަލައެއްގައި 32 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އަދި ޢަޤީލްގެ މައްޗަށް ދައުވާ އުފުލާފައިވާއިރު، އޭނާ ރާއްޖޭން ބޭރުގައި ފިލައިގެން އުޅެނިކޮށް ވަނީ ހައްޔަރުކޮށްފަ އެވެ. އޮޑިޓް ރިޕޯޓުގައި ބުނެފައިވަނީ އަމިއްލަ ކުންފުންޏަކުން ތިން ފަހަރެއްގެ މަތިން ދިން 1.2 މިލިއަން ރުފިޔާގެ ނަގުދު ފައިސާއާ ޖަވާޒު ހަވާލުވި ކަމަށެވެ.

އޮޑިޓަރު ޖެނެރަލް ޙުސައިން ނިޔާޒީ ސޮއިކުރައްވައި ނެރުއްވި މި ރިޕޯޓުގައި ވަނީ، އެފްއޭއެމުން ގެއްލުނު ފައިސާ ހޯދުމަށާއި، މިކަމުގައި ޒިންމާވާ ފަރާތްތަކާމެދު ގާނޫނީ ފިޔަވަޅު އެޅުމަށް ފުލުހުންގެ އިދާރާއަށް ހުށަހެޅުމަށް ލަފާދެއްވާފަ އެވެ.