އުމުރުން 12 އަހަރުން ދަށުގެ ކުޑަ ކުދިންނަށް އަމިއްލަ ސްމާޓް ފޯނު ދިނުމަކީ، އޭގެ ދެ އަހަރު ފަހުން އެ ކުދިންގެ ކިބައިން ކެއުމުގެ ނުރަނގަޅު އާދަތަކާއި (އީޓިން ޑިސްއޯޑާ) ހަށިގަނޑުގެ ބައްޓަމާމެދު ނުބައިކޮށް ދެކޭ މައްސަލަތައް ފެނުމުގެ ފުރުސަތު ބޮޑުވާ ކަމެއްކަން އާ ދިރާސާއަކުން ދައްކައިފި އެވެ.
މެޑިކަލް ޖާނަލް "ޖާމާ ނެޓްވޯކް އޯޕަން"ގައި ޝާއިއު ކޮށްފައިވާ މި ދިރާސާއަކީ އެމެރިކާގެ އެކި ކަންކޮޅުތަކުން 9,000 އަށްވުރެ ގިނަ ކުދިން ބައިވެރި ކޮށްގެން ހަދާފައިވާ ބޮޑު ދިރާސާ އެކެވެ.
މި ދިރާސާގެ ހޯދުންތަކުން ދައްކާ ގޮތުގައި، އުމުރުން 12 އަހަރުގައި ފޯނު ގެންގުޅޭ ކުދިންގެ ތެރެއިން 24 ޕަސެންޓް ކުދިން، އުމުރުން 14 އަހަރާ ހަމައަށް އަންނައިރު ކެއުމުގެ ނުރަނގަޅު އާދަތަކުގެ އަލާމާތްތައް ދައްކަ އެވެ.
ނަމަވެސް، އެ އުމުރުގައި ފޯނު ނުގެންގުޅޭ ކުދިންގެ ތެރެއިން މިފަދަ މައްސަލަތައް ފެނިފައިވަނީ 16 ޕަސެންޓަށްވުރެ މަދު ކުދިންގެ ކިބައިންނެވެ.
ދިރާސާގެ އިސް މުސައްނިފު އަދި ކެލިފޯނިއާ ޔުނިވާސިޓީގެ ޑޮކްޓަރު ޖޭސަން ނަގާޓާ ވިދާޅުވި ގޮތުގައި، ސްމާޓް ފޯނެއްގެ ސަބަބުން ކުޑަކު އްޖެއްގެ ޖީބަށް މުޅި ސޯޝަލް މީޑިއާގެ ދުނިޔެ ވަދެގެންދެ އެވެ.
އޭގެ ތެރޭގައި ސޫރައާއި، ބޭރުފުށުގެ ސިފައަށް މާބޮޑަށް ސަމާލުކަންދޭ ކޮންޓެންޓްތަކަށް ކުދިން ހުޅުވިގެންދެ އެވެ. ހާއްސަކޮށް، އިންފްލުއެންސަރުން އެޑިޓްކޮށް ފިލްޓަރު ކޮށްފައި ހުންނަ ފޮޓޯތަކާ އަމިއްލަ ނަފްސު އަޅާކިއުމުގެ ސަބަބުން، އަމިއްލަ ހަށިގަނޑާމެދު ނުބައިކޮށް ދެކެން ފެށެ އެވެ.
މި ދިރާސާއިން އެނގުނު ގޮތުގައި، 12 އަހަރުގައި ފޯނު ގެންގުޅުނު ކުދިން، އަމިއްލަ ނަފްސުގެ އަގު ތިމާގެ ބަރުދަނާ ގުޅުވުމުގެ ފުރުސަތު ދެގުނަ އިތުރެވެ.
ބަރުދަން ކޮންޓްރޯލް ކުރުމަށްޓަކައި ކެއުން މަދު ކުރުން ނުވަތަ މާބޮޑަށް ކަސްރަތު ކުރުން ފަދަ ކަންކަން ކުރުމުގެ ފުރުސަތު 1.5 ޕަސެންޓް އިތުރުވާކަން ފާހަގަ ކުރެވުނެވެ.
ސައިންސްވެރިން ބުނާ ގޮތުގައި، ސްމާޓްފޯނަކީ ސީދާ މި މައްސަލަ ކުރިމަތި ކުރުވާ މައިގަނޑު ސަބަބު ކަމުގައި ނުވިނަމަވެސް، މިއީ ކުދިންގެ އުޅުމަށް ބޮޑެތި ބަދަލުތަކެއް ގެނުވާ ވަސީލަތެކެވެ.
އެހެން ކަމުން، ބެލެނިވެރިން ކުދިންނަށް ފޯނު ދިނުމުގައި ލުއި ގޮތްތަކެއް ނުގެންގުޅެ، ބެލެނިވެރިކަމުގެ ދައުރު ފުރިހަމައަށް އަދާ ކުރުމަށް ކެމްޕެއިންކުރާ ފަރާތްތަކުން އިލްތިމާސްކުރެ އެވެ.
ބެލެނިވެރިންނަށް މާހިރުން ދޭ އިރުޝާދުތައް
- ކުއްލިއަކަށް މުޅި ދުނިޔެއަށް ހުޅުވާ ނުލުން: ކުއްޖާއަށް ފޯނު ދިންކަމުގައި ވިޔަސް، ސޯޝަލް މީޑިއާއާއި އެޕްލިކޭޝަންތައް ބޭނުން ކުރުމުގެ ހުއްދަ ދޭންވާނީ މަޑުމަޑުން، ފިޔަވަޅަކުން ފިޔަވަޅަކުންނެވެ.
- އެޕްލިކޭޝަންތައް ކޮންޓްރޯލް ކުރުން: ކުދިން ޑައުންލޯޑްކުރާ އެޕްތަކާއި ބަލާ ކޮންޓެންޓް ބެލެނިވެރިންނަށް ބެލޭނެ ގޮތްތައް (ޕޭރެންޓަލް ކޮންޓްރޯލް) ހަމަޖެއްސުން.
- ނިދާ ކޮޓަރިއަށް ފޯނު ނުވެއްދުން: ރޭގަނޑު ނިދަން ވަންނައިރު ފޯނު ނިދާ ކޮޓަރިން ބޭރުގައި ބެހެއްޓުމުގެ އުސޫލު ގާއިމު ކުރުން.
- ވާހަކަ ދެއްކުން: އިންޓަނެޓުން ފެންނަ ތަކެއްޗާ ބެހޭގޮތުން ކުދިންނާއެކު އޯޕަންކޮށް ވާހަކަ ދައްކައި، އެކުދިން ކައިއުޅޭ ގޮތަށް ނުވަތަ އަމިއްލަ ހަށިގަނޑާމެދު ވާހަކަ ދައްކާ ގޮތަށް އަންނަ ބަދަލުތަކަށް ސަމާލުވުން.
އިންޑިއާގައި ނިކޮޓިން ޕައުޗް ވިއްކުމާއި ބޭނުން ކުރުން މަނާކޮށްފި
ބްލެކް ޕިންކްގެ އިމުން ބޭރަށް: ލީސާގެ މިއުޒިކީ އާ ދަތުރު!
މި ހަފުތާގައި އެމެރިކާ އާއި އީރާނުގެ މަޝްވަރާތައް އަލުން ފަށަނީ