ދުނިޔޭގެ އެކި ކަންކޮޅުތަކުގައި ވައި ތަގައްޔަރުވުމާއި ތަފާތު ވައިރަސްތައް ފެތުރުން އިތުރުވަމުންދާ މި ދުވަސްވަރު، ނޭވާލާ ނިޒާމާއި ފުއްޕާމޭގެ ސިއްހަތަށް ސަމާލުކަން ދިނުމަކީ ކޮންމެހެން ބޭނުންތެރި ކަމެކެވެ.

ގިނަ މީހުން ފުއްޕާމޭގެ ސިއްހަތާމެދު ވިސްނަން ފަށަނީ ނޭވާ ކުރުވުން ނުވަތަ ކެއްސުން ފަދަ ޕުއްޕާމެއާ ގުޅުންހުރި ކަމެއް ކުރިމަތިވުމުންނެވެ.

ނަމަވެސް، ދުވަހުގެ އާންމު އާދަކާދައަށް ކުދިކުދި ބަދަލުތަކެއް ގެނެސްގެން ފުއްޕާމޭ ވަރުގަދަކޮށް، ސިއްހަތު ހެޔޮކަންމަތީ ބެހެއްޓިދާނެ އެވެ.

މިކަމާ ގުޅޭގޮތުން ސިއްހީ މާހިރުންނާއި ފުއްޕާމޭގެ ހާއްޞަ ޑޮކްޓަރުން (ޕަލްމޮނޮލޮޖިސްޓުން) ވަނީ ފުއްޕާމޭ ސަލާމަތުން ބެހެއްޓުމަށްޓަކައި ދުވަހުގެ ދިރިއުޅުމުގައި ހިމެނިދާނެ ވަރަށް ފަސޭހަ ފަސް އާދައެއް ހިއްސާ ކުރައްވާފަ އެވެ.

1. ދުންފަތުގެ އިސްތިއުމާލުކުރުމާއި ދުމުން ރައްކާތެރިވުން

ފުއްޕާމޭގެ ނިޒާމަށް އެންމެ ބޮޑު ނޭދެވޭ އަސަރެއް ކުރާ އެއްކަމަކީ ދުންފަތުގެ އިސްތިއުމާލު ކުރުމެވެ. ސިގަރޭޓް، ބިޑި އަދި ޝީޝާ ފަދަ ތަކެތީގެ ދުމުގައި ހުންނަ ނުރައްކާތެރި ކެމިކަލްތަކުގެ ސަބަބުން ނޭވާލާ ހޮޅިތަކަށް ގެއްލުންވެ، ފުއްޕާމޭގެ ކެންސަރާއި "ސީއޯޕީޑީ" ފަދަ ދާއިމީ ބަލިތަކަށް މަގުފަހިވެ އެވެ. މީގެ އިތުރުން، އަމިއްލައަށް ދުންފަތުގެ އިސްތިއުމާލު ނުކުރި ކަމުގައި ވިޔަސް، އެހެން މީހުން ބޭރުކުރާ ދުމަށް (ސެކަންޑްހޭންޑް ސްމޯކް) ހުށަހެޅުމަކީ ވެސް އެހާމެ ނުރައްކާތެރި ކަމެކެވެ.

2. ގޭތެރޭގެ ވައި ސާފުކޮށް ބެހެއްޓުން

ރެއަކާދުވާލުގެ ގިނަ ވަގުތު އަހަރުމެން ހޭދަ ކުރަނީ ގޭތެރޭގައި ކަމަށްވާއިރު، ގޭތެރޭގެ ވައިގެ ފެންވަރަކީ ފުއްޕާމޭގެ ސިއްހަތާ ގުޅިފައިވާ ކަމެކެވެ. ގޭތެރޭގައި ހުންނަ ދުމާއި، ހޫނުގެ އިތުރުން މާ ބާރުގަދަ ކެމިކަލް ހުންނަ ސާފުކުރާ ސާމާނުގެ ސަބަބުން ނޭވާލާ ނިޒާމަށް އުނދަގޫވެ އެވެ. ގޭތެރޭގެ ވައި ސާފުކޮށް ބެހެއްޓުމަށްޓަކައި

  • ކައްކާއިރު ވައި ދައުރުވާނެ ގޮތް ހެދުން ނުވަތަ އެގްޒޯސްޓް ބޭނުން ކުރުން.
  • ގޭތެރެ ގަވާއިދުން ސާފުކުރުން.
  • ތެތްކަން ހުރެގެން ފަންގަސް ޖެހޭ ތަންތަން ވަގުތުން ސާފު ކުރުން.

3. ގަވާއިދުން ކަސްރަތުކޮށް ހަރަކާތްތެރިވެ އުޅުން

ކަސްރަތު ކުރުމަކީ ހަމައެކަނި ހަށިގަނޑުގެ ބަރުދަން ލުއި ކުރުމަށް ކުރާ ކަމެއް ނޫނެވެ. ގަވާއިދުން ހިނގުން، ސައިކަލު ދުއްވުން، ފީނުން ނުވަތަ ކުދިކުދި ކަސްރަތުތައް ކުރުމުން ހިތާއި ފުއްޕާމޭގެ މަސައްކަތް އިތުރަށް ހަރުދަނާވެ އެވެ. ކަސްރަތު ކުރާއިރު ހަށިގަނޑަށް އިތުރަށް އޮކްސިޖަން ބޭނުންވާތީ، ފުއްޕާމޭގެ މަސްތައް ވަރުގަދަވެ، އޮކްސިޖަން ދައުރު ކޮށްދިނުމުގެ ގާބިލުކަން އިތުރުވެގެންދެ އެވެ.

4. ބޭރުގެ ތަގައްޔަރު ކަމުންނާއި އިންފެކްޝަންތަކުން ރައްކާތެރިވުން

ބޭރު ތެރޭގައި ވައި ތަގައްޔަރުވެފައިވާ ދުވަސްވަރުތަކުގައި ނުވަތަ ދުން ގިނަ ސަރަހައްދުތަކުގައި އުޅޭއިރު ރައްކާތެރިކަމުގެ ފިޔަވަޅުތައް އަޅަންޖެހެ އެވެ.

  • ވައި ތަގައްޔަރު ދުވަސްވަރު ބޭރުގައި ގިނައިރު އުޅުން މަދުކުރުން
  • .ނޭވާލާ ނިޒާމުގެ އިންފެކްޝަންތަކުން ރައްކާތެރިވުމަށްޓަކައި ގަވާއިދުން ސައިބޯނި ލައިގެން އަތް ދޮވުން.
  • ރޯގާ ޖެހިފައިވާ މީހުންނާ މާ ބޮޑަށް ކައިރި ނުވުމާއި، ބޭނުންވާ ވެކްސިންތައް (އިންފްލުއެންޒާ އަދި ނުމޯނިއާ ވެކްސިން) ފުރިހަމަ ކުރުން.

5. ފުންކޮށް ނޭވާލުމުގެ ކަސްރަތުތައް ކުރުން

އާންމުކޮށް އަހަރެމެން ނޭވާލާއިރު ބޭނުން ކުރެވެނީ ފުއްޕާމޭގެ ކުޅެދުންތެރިކަމުގެ ކުޑަ މިންވަރެކެވެ. ދުވާލަކު މަދުވެގެން 5-10 މިނެޓު ފުންކޮށް ނޭވާލުމުގެ ކަސްރަތުތައް (ޔޯގާ ނުވަތަ ބެލީ ބްރީތިން) ކުރުމަކީ ފުއްޕާމޭގެ ކެޕޭސިޓީ އިތުރު ކޮށްދޭ ކަމެކެވެ. މީގެ ސަބަބުން ފުއްޕާމޭގެ މަސައްކަތް ރަނގަޅުވެ އާ އޮކްސިޖަން ހަށިގަނޑަށް ވަނުމަށް މަގުފަހިވެ އެވެ.

ފުއްޕާމޭގެ ސިއްހަތަކީ ދިރިއުޅުމުގެ ފެންވަރާ ސީދާ ގުޅިފައިވާ ކަމަކަށްވާތީ، މި ދެންނެވި އާދަތައް ދުވަހުގެ ތެރޭގައި ހިމެނުމަކީ ކުރިއަށް އޮތް ތަނުގައި ނޭވާލާ ނިޒާމުގެ ބޮޑެތި ބަލިތަކުން ރައްކާތެރިވުމަށް އެޅޭނެ މުހިންމު ފިޔަވަޅެކެވެ.