ޔުނައިޓެޑް އެރަބް އެމިރޭޓްސްގެ އީގަލް ހިލްސް ކުންފުންޏަށް ރަސްމާލެ ދޫކޮށްލަން ހެދި އެގްރިމެންޓު ހާމަކޮށް، އެތަނުގެ ބިން ބިދޭސީންނަށް މިލްކު ކުރެވުމާމެދު އުފެދޭ ސުވާލުތަކަށް ޖަވާބުދިނުމަށް ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް މިއަދު ސަރުކާރަށް ގޮވާލައްވައިފި އެވެ.

ރަސްމާލެ މަޝްރޫއާ ގުޅޭގޮތުން އިނގިރޭސިބަހުން ނެރުއްވި ބަޔާނެއްގައި ފައްޔާޒް ވަނީ އެ މަޝްރޫއު އެވޯޑު ކުރުމުގައި ދެފުށް ނުފެނުމާއި، ރާއްޖެއަށް މާލީ ގޮތުން ގެއްލުންވާނެ ގޮތަށް އެގްރިމެންޓު ފަރުމާކޮށްފައިވާ ކަމަށްވިދާޅުވެ ކަންބޮޑުވުން ފާޅުކުރައްވާފަ އެވެ.

ފައްޔާޒްގެ ބަޔާނުގައި ސަރުކާރަށް ފަސް ކަމެއް ކުރުމަށް ގޮވާލައްވާފައިވެ އެވެ. އޭގެ ތެރޭގައި އެގްރިމެންޓު ހާމަކުރުމާއި، ބިން މިލްކުކުރެވޭ ގޮތާމެދު ކުރެވޭ ސުވާލުތަކަށް ޖަވާބުދިނުމާއި، އީގަލް ހިލްސްއަށް ދޭ 500 ހެކްޓަރު ބިމުގެ އިވެލުއޭޝަނެއް ހެދުން ހިމެނެ އެވެ. އަދި އީގަލް ހިލްސްއާއެކު އެހެން ގައުމުތަކުން ހެދި އެއްބަސްވުންތަކަށްވުރެ ބަލިކަށި އެއްބަސްވުމަކަށް ދިޔަ ސަބަބު ބަޔާންކުރުމާއެކު، މަޝްރޫއުގެ ހުރިހާ ކަމެއް ހާމަކުރުމަށްފަހު މެނުވީ މަޝްރޫއު ކުރިއަށްގެންދަން ގާނޫނީގޮތުން މަޖުބޫރުނުކުރުމަށް ވެސް އޭނާ ހުށަހެޅުއްވި އެވެ.

99 އަހަރުގެ ލީސް ހަމަވުމުގެ ކުރިން ރަސްމާލޭގެ ޕްރޮޕަޓީތައް ވިއްކާލައިފި ނުވަތަ ވާރުތައިން ދީފިނަމަ އަލުން 99 އަހަރުގެ ކުލީގެ މުއްދަތެއް ފެށޭތީ ފައްޔާޒް ވަނީ ކަންބޮޑުވުން ފާޅުކުރައްވާފަ އެވެ. އޭގެ ސަބަބުން ކުއްޔަށް ދިން ބިން ދާއިމީ ގޮތެއްގައި ދިވެހިންގެ އަތުން ބީވުމުގެ ފުރުސަތު އޮތުމުން، އެއީ ހަގީގަތުގައި ފްރީހޯލްޑް އެގްރިމެންޓެއްގެ ގޮތުގައި އޭނާ ސިފަކުރެއްވި އެވެ.

ރަސްމާލެއިން ހިއްކާ 1100 ހެކްޓަރުގެ ތެރެއިން 500 ހެކްޓަރުގެ ބިން އީގަލް ހިލްސްއަށް ދީފައިވަނީ ލީސް އެކުއިޒިޝަން ކޮސްޓެއް އަދި ކުއްޔެއްވެސް ނުނަގާ ގޮތަށް ހިލޭ ކަމަށް މައުލޫމާތު ލިބެ އެވެ. އެ ކުންފުނިން މިހާރު ވަނީ ބިދޭސީ މަހުޖަނުންނަށް ދާއިމަށް ދިރިއުޅެވޭ ގޮތަށް ހަދާ އެޕާޓްމަންޓްތައް ވިއްކުމުގެ މަސައްކަތް ފަށާފަ އެވެ.

އީގަލް ހިލްސްއިން ހާމަކޮށްފައިވާ ގޮތުގައި އެތަނުން ވިއްކާ އެޕާޓްމަންޓެއް ނުވަތަ ބިމުގެ ފުރަތަމަ 99 އަހަރު ހަމަނުވަނީސް ވިއްކާލައިފިނަމަ ނުވަތަ ވާރުތައިން ދީފިނަމަ، އަލަށް ގަންނަ މީހާއަށްވެސް އަލުން އިތުރު 99 އަހަރަށް އެތަން ލިބޭނެ އެވެ. މީގެ ސަބަބުން އެތަން ގަންނަ ފަރާތްތަކުގެ އަތުގައި އެތައް ޖީލަކަށް އެތަންތަން ދެމިގެންދާނެ ކަމަށް އެ ކުންފުނިން ވަނީ ބުނެފަ އެވެ.