އީރާނުން ހުށަހެޅި ސުލްހައިގެ ޕްލޭން ގަބޫލުނުކުރެއްވި ނަމަވެސް، ކުރިއަށް އޮތް ހަފުތާގައި އީރާނާއެކު މަޝްވަރާތައް އަލުން ފެށޭނެ ކަމަށް ބެލެވޭ ކަމަށް އެމެރިކާގެ ރައީސް ޑޮނަލްޑް ޓްރަމްޕް އާދިއްތަ ދުވަހު ވަނީ ވިދާޅުވެއްޖެ އެވެ.

ނިއުޔޯކުގައި ބޭއްވި އދ. ގެ އާންމު މަޖިލީހަށް އީރާނުގެ އޮފިޝަލުން ވަޑައިގަތީ ހަތް ދުވަހުގެ ސުލްހައިގެ މުއްދަތަކަށް ފަހު، ހޮރްމުޒް ކަނޑުއޮޅީގެ ދަތުރުފަތުރުގެ މަގު އަލުން ހުޅުވާލުމުގެ ރޭވުމަކާ އެކުގަ އެވެ.

ޓްރަމްޕް ވަނީ އެ ރޭވުން ބޭރުކޮށްލައްވައި، އީރާނުގެ އަމާޒުތަކަށް ފުރިހަމަ މިލިޓަރީ ވައިގެ ހަމަލާތައް ދިނުމާ މެދު ވިސްނަވަމުންދާ ކަމަށް ވިދާޅުވެފަ އެވެ. ނަމަވެސް، "އެކްސިއޯސް" ނޫހަށް ދެއްވި ބަސްދީގަތުމެއްގައި އޭނާ ވިދާޅުވީ މަޝްވަރާތައް އަލުން ފެށޭނެ ކަމަށް އުންމީދު ކުރައްވާ ކަމަށެވެ.

"އެމީހުން ބޭނުންވަނީ އެއްބަސްވުމަކަށް އަންނަން، އެކަމަކު އެއީ އަޅުގަނޑު ބޭނުންވާ ކަހަލަ އެއްބަސްވުމެއް ނޫން،" ޓްރަމްޕް ވިދާޅުވި އެވެ.

އާދިއްތަ ދުވަހު ޝާއިއުކުރި މި އިންޓަވިއުގައި ޓްރަމްޕް ވިދާޅުވީ، އީރާނުން އެމީހުންގެ ފުރުސަތުގެ ބޭނުން ނަހަމަ ގޮތުގައި ހިފާފައިވާ ކަމަށެވެ.

މިކަމާ ގުޅުންހުރި މަސްދަރުތަކާ ހަވާލާދީ އެކްސިއޯސް އިން ރިޕޯޓްކޮށްފައިވާ ގޮތުގައި، ވޮޝިންޓަނާއި ތެހެރާނާ ދެމެދު ކުރިއަށްދާ ނުސީދާ މަޝްވަރާތައް ހޯމަ ދުވަހު ފެށުމަކީ އެކަށީގެންވާ ކަމެކެވެ.

އާދިއްތަ ދުވަހުވެސް އީރާނުން ދެމިއޮތީ ހޮރްމުޒް ކަނޑުއޮޅި ހުޅުވާލުމަށް އެގައުމުން ކުރި ޝަރުތުތަކުގެ މަތީގަ އެވެ. މީގެ ސަބަބުން މެދުއިރުމަތީގެ ހަނގުރާމައިގެ ގަލްފު ސަރަހައްދު އޮތީ ކުރިއަށް ނުދެވި ހުއްޓިފަ އެވެ. އެހެން ނަމަވެސް ޔަމަނުގައި ދަނީ ވަރުގަދައަށް ހަނގުރާމަ ކުރަމުންނެވެ.

ދުނިޔޭގެ ހަކަތަ ފޯރުކޮށްދިނުމުގައި މުހިންމު ދައުރެއް އަދާކުރާ ހޮރްމުޒް ކަނޑުއޮޅިއަކީ، މީގެ ހަތް މަސް ކުރިން އެމެރިކާ އާއި އިޒްރޭލުން އީރާނަށް ދޭން ފެށި ހަމަލާތަކާ އެކު އުފެދުނު މައްސަލައިގެ މައިގަނޑު އަސާސެވެ.

އީރާނުގެ ހާރިޖީ ވަޒީރު އައްބާސް އަރަގްޗީ ވިދާޅުވި ގޮތުގައި، އެގައުމުގެ ހުށަހެޅުމަކީ ލުބުނާން ހިމެނޭހެން މުޅި މެދުއިރުމަތީގައި ހިންގާ ހުރިހާ ދެކޮޅުވެރި ހަރަކާތްތަކެއް ހުއްޓާލައި، ކުރިން އޮތް ސުލްހައިގެ އެއްބަސްވުމުގެ ހާލަތަށް ރުޖޫއަވުމެވެ.

ހޮރްމުޒް ކަނޑުއޮޅީގައި ހިނގި ކުރިމަތިލުންތަކުގެ ސަބަބުން އުވާލެވުނު އެ އެއްބަސްވުމުގައި ގޮވާލާފައިވަނީ، ހިފަހައްޓާފައިވާ އީރާނުގެ މާލީ އެސެޓްތައް ދޫކޮށްލުމަށާއި، އީރާނުގެ ތެލާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލުމުގެ އިތުރުން، އެމެރިކާގެ ކަނޑުގެ ސިފައިން ހިންގާ ބްލޮކޭޑް ނިމުމަކަށް ގެނައުމަށެވެ.

"އަޅުގަނޑުމެންގެ ޝަރުތުތައް ވަރަށް ސާފު. ހޮރްމުޒް ކަނޑުއޮޅި އަލުން ހުޅުވޭނީ މި ޝަރުތުތައް ފުރިހަމަވުމުން. އަޅުގަނޑުމެން މިކަމުގައި ދޫނުދޭނަން،" އީރާނުގެ ދައުލަތުގެ މީޑިއާ އައިއާރުއައިބީ އާ ހަވާލާދީ އަރަގްޗީ ވިދާޅުވި އެވެ.

"އަޅުގަނޑުމެން ދުވަހަކުވެސް ޑިޕްލޮމޭސީ ނުވަތަ މަޝްވަރާގެ ދޮރު ބަންދެއް ނުކުރަން. އެކަމަކު ހަމައެއާއެކު، އަޅުގަނޑުމެންގެ ހައްގުތަކުގެ މައްޗަށް ދުވަހަކުވެސް ދޫނުދޭނަން." އޭނާ އިތުރަށް ވިދާޅުވި އެވެ.

އދ. އަށް ކަނޑައަޅާފައި ހުންނަވާ އެމެރިކާގެ ސަފީރު މައިކް ވޯލްޓްޒް ވަނީ، މަޝްވަރާގެ މޭޒަށް އެނބުރި އައުމަށްޓަކައި އީރާނުން މާ ބޮޑެތި ކަންތައްތަކަކަށް އެދެމުންދާ ކަމަށް ތުހުމަތު ކުރައްވާފަ އެވެ.

"އަޅުގަނޑު ދެކޭގޮތުގައި މިއީ ގަބޫލުނުކުރެވޭނެ ކަންތައްތަކެއް ހުށަހަޅައިގެން ހިންގި މަކަރުވެރި އަމަލެއް. ހަމައެކަނި ވާހަކަ ދެއްކުމަށްޓަކައި، ބްލޮކޭޑް އުވާލުމަށާއި، ބައިނަލްއަގުވާމީ ދަތިކުރުމުގެ ފިޔަވަޅުތައް ނިމުމަކަށް ގެނައުމުގެ އިތުރުން ބިލިއަނުން ހުރި ފައިސާތައް ދޫކޮށްލަން އެދުމަކީ ބަލައިގަނެވޭނެ ކަމެއް ނޫން،" އާދިއްތަ ދުވަހު އެންބީސީ ނިއުސް އަށް ދެއްވި އިންޓަވިއުއެއްގައި އޭނާ ވިދާޅުވި އެވެ.

މީގެ އިތުރުން، އީރާނުގެ ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނި ގޮތުގައި، އެމެރިކާގެ ޖާސޫސީ ސަބްމާސިބަލް ޑްރޯނެއް އާދިއްތަ ދުވަހު ހޯރްމުޒް ކަނޑުއޮޅިން ވަނީ އެމީހުންގެ ބާރުގެ ދަށަށް ގެނެސްފަ އެވެ.

އެ އުޅަނދަކީ "ޖާސޫސީ ބޭނުންތަކަށް" ބޭނުންކުރަމުން ދިޔަ އެއްޗެއް ކަމަށާއި، މިހާރު އެއީ އެ އިދާރާގެ މާހިރުންގެ ބެލުމުގެ ދަށުގައިވާ އެއްޗެއް ކަމަށް އައިއާރުޖީސީ އިން ބުންޏެވެ.

ހަނގުރާމަ ހުއްޓާލައި، ކަނޑުއޮޅި އަލުން ހުޅުވައި، އީރާނުގެ ނިއުކްލިއާ ޕްރޮގްރާމާ ބެހޭ ގޮތުން މަޝްވަރާ ކުރުމަށްޓަކައި ވޮޝިންޓަނާއި ތެހެރާނުން މިދިޔަ ޖޫން މަހު ފަހުމުނާމާއެއްގައި ސޮއިކުރި އެވެ.

ނަމަވެސް، ހޮރްމުޒް ކަނޑުއޮޅިން ދަތުރުކުރި ވިޔަފާރި އުޅަނދުތަކަކަށް އީރާނުން ހަމަލާދިނުމާ ގުޅިގެން އެ އެއްބަސްވުން ވަނީ ރޫޅިފަ އެވެ. އީރާނުން ބުނާ ގޮތުގައި އެ އުޅަނދުތައް ދަތުރުކުރީ ހުއްދަ ދީފައިވާ މަގުން ނޫން ކަމަށެވެ.

އީރާނުން ބުނަނީ އެ ސަރަހައްދުން ދަތުރުކުރާ އުޅަނދުތަކުން ސަލާމަތީ އަދި ސިޔާދަތީ ސަބަބުތަކަށްޓަކައި ދުރާލައި ހުއްދަ ހޯދަން ޖެހޭނެ ކަމަށެވެ. މިކަމަށް އަމަލުނުކުރާ އުޅަނދުތަކަށް އީރާނުން ހަމަލާދޭއިރު، އެމެރިކާއިން ދަނީ އޭގެ ރައްދުގައި އީރާނުގެ އައްސޭރިފަށުގެ ސަރަހައްދުތަކަށް ބޮން އަޅަމުންނެވެ.

ހާރިޖީ ވަޒީރު އަރަގްޗީ އދ. ގައި ވިދާޅުވީ، ގަތަރު މެދުވެރިކޮށް ހަތް ދުވަހުގެ ސާފު ޕްލޭނެއް އެމެރިކާއަށް ހުށަހަޅާފައިވާ ކަމަށާއި، މިހާރު އިހްތިޔާރު އޮތީ އެމެރިކާގެ އަތްމަތީގައި ކަމަށެވެ.

އީރާނުގެ އައިއާރުޖީސީގެ ތަރުޖަމާނު ހުސައިން މުހިއްބީ ވިދާޅުވީ، އީރާނުގެ ހަތް ޝަރުތު ފުރިހަމަވަންދެން އެމެރިކާއަށް އަދަބު ދިނުން ހުއްޓާނުލާނެ ކަމަށެވެ. އަދި ޔަމަނުގެ ހަނގުރާމަ ހުއްޓާލުމަކީވެސް ތެހެރާނުގެ ޝަރުތުތަކުގެ ތެރޭގައި ހިމެނޭ ކަމެއް ކަމަށް އޭނާ ވިދާޅުވި އެވެ.