ރަސްމާލެ ފަދަ ރައްޔިތުންނާ ގުޅުންހުރި ބޮޑު ބިމެއް ބަޔަކަށް ދިނުމަށް އެއްބަސްވުން ހެދުމުގެ ކުރިން ރައްޔިތުންގެ ފެންނަ ނުފެންނަ ވޯޓެއް ނަގަން ޖެހޭނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.

ޕީޕަލްސް ނެޝަނަލް ފްރަންޓް (ޕީއެންއެފް) އިން ރޭ ބޭއްވި ޖަލްސާއެއްގައި ވާހަކަދައްކަވަމުން ކުރީގެ ރައީސް ވިދާޅުވީ ރައްޔިތުންގެ ފެންނަ ނުފެންނަ ވޯޓެއް ނަގަން ޖެހެނީ ހަމައެކަނި ދެ އިންތިހާބު އެއްކޮށްލުމަށް ނުވަތަ ވެރިކަމުގެ މުއްދަތާ މެދު ގޮތެއް ނިންމުމަށް އެކަނި ނޫން ކަމަށެވެ. އަދި ރަސްމާލެ ބަޔަކަށް ދިނުމަށް ހެދި އެއްބަސްވުމަށް ވަރަށް ބޮޑަށް ފާޑުވިދާޅުވެ، އެފަދަ ކަންކަމުގައި ރައްޔިތުންގެ ހިޔާލު ހޯދުމުގެ ވޯޓަކަށް އެހުމުގެ ބާރު ގާނޫނުއަސާސީން ރައީސުލްޖުމްހޫރިއްޔާއަށް ލިބިދީފައިވާ ކަން އެމަނިކުފާނު ފާހަގަކުރެއްވި އެވެ.

"ރައްޔިތުންގެ މަޖިލީހުގެ އިތުރަށް މިވަރު ކަމެއް ވެއްޖެއްޔާ ރައްޔިތުންގެ ފެންނަ ނުފެންނަ ވޯޓަކަށް ދާންވާނެ. ގާނޫނު އަސާސީ މަގުދައްކަނީ ގުޑް ގަވަނަންސްއަށް. މިކަހަލަ ބޮޑެތި ކަންކަމުގަ ރައީސުލްޖުމްހޫރިއްޔާއަށް ކަންކަން ނިންމެން އޮންނައިރުގައި ދީފަހުރި އިޚްތިޔާރުތަކުގެ ތެރޭގައި މިފަދަ ބޮޑެތި ކަންކަމުގައި ރައްޔިތުންގެ ފެންނަ ނުފެންނަ ވޯޓަކަށް އެހުމުގެ ބާރު އޮންނަނާނެ،" ޔާމީން ވިދާޅުވި އެވެ.

މި ޖަލްސާގައި ޔާމީން ވަނީ އަބޫދާބީގެ އީގަލް ހިލްސް ކުންފުންޏާއެކު ވެވިފައިވާ އެއްބަސްވުމާ މެދު ނުރުހުން ފާޅުކުރައްވައި، އެ މުއާމަލާތަކީ ގައުމަށް ނުރައްކާވާ ފަދަ ކަމެއްގެ ގޮތުގައި ސިފަކުރައްވާފަ އެވެ. އެމަނިކުފާނު ވިދާޅުވި ގޮތުގައި މި މުއާމަލާތް ހިންގުމުގައި އިސްކޮށް އުޅުއްވި ފަރާތްތަކާ މެދު މި ވެރިކަން ނިމުމާއެކު ގާނޫނީ ފިޔަވަޅު އެޅޭނެ އެވެ.

އަބޫދާބީގެ އީގަލް ހިލްސް އާއި ދިވެހި ސަރުކާރާ ދެމެދު ސޮއިކުރެވުނު 20 ބިލިއަން ޑޮލަރުގެ މެރީނާ އަދި ވޯޓާފްރަންޓް މަޝްރޫއުގެ އެއްބަސްވުމުގައި ދުބާއީގައި ސޮއިކޮށްފައިވާއިރު، އެއީ ގާނޫނާ ހިލާފު އެއްބަސްވުމެއް ކަމަށް ޔާމީން ސިފަކުރެއްވި އެވެ. އަދި ކުރިއަށް އޮތް ތަނުގައި އަންނަ ވަތަނީ ސަރުކާރަކުން އެ މަޝްރޫއު ހުއްޓުވާނެ ކަމަށްވެސް އެމަނިކުފާނު ވިދާޅުވި އެވެ.