ސޯޝަލް މީޑިއާގައި އާޓިފިޝަލް އިންޓެލިޖެންސް (އޭއައި) ބޭނުން ކޮށްގެން މީހުންގެ އަބުރު ކެނޑޭގޮތަށް އަދި އޮޅުވާލައިގެން ސައްހަ ނޫން ވީޑިއޯއާއި އަޑު އުފައްދާ މީހުންނާމެދު ގާނޫނީ ގޮތުން ފިޔަވަޅު އަޅައި، އެފަދަ މީހުން ޖަލަށް ލާންޖެހޭ ކަމަށް ބޮލީވުޑްގެ ސުޕަސްޓާރު ސަލްމާން ހާން ބުނެފި އެވެ.

ރިއަލިޓީ ޝޯ "ބިގް ބޮސް 20"ގެ އެޕިސޯޑެއްގައި ވާހަކަ ދައްކަމުން ސަލްމާން ވަނީ އޭއައި ޓެކްނޮލޮޖީ ބޭނުން ކޮށްގެން މީހުންގެ ސޫރައާއި އަޑު ބަދަލު ކޮށްގެން ދޮގު މައުލޫމާތު ފެތުރުން އިތުރުވަމުންދާތީ ކަންބޮޑުވުން ފާޅުކޮށްފަ އެވެ. އޭނާއަކީވެސް މިފަދަ އޭއައި ފޭކް ވީޑިއޯތަކުގެ ޝިކާރައަކަށް ވެފައިވާ މީހެއްކަން ސަލްމާން ހާމަކުރި އެވެ.

"އޭއައި ޓެކްނޮލޮޖީ ކުރިއަރާފައިވާ މިންވަރު ފެނިފައި ވަރަށް ބިރުގަނޭ. މިއީ ވަރަށް ނުރައްކާތެރި އަދި ސީރިއަސް މައްސަލައެއް. މީހަކު ދައްކާފައިވާ ވާހަކައެއް އޭއައި ބޭނުން ކޮށްގެން އެޑިޓްކޮށް، އެހެން މީހުންނަށް ހަޑިހުތުރު ބަހުން އެއްޗެހި ގޮވާގޮތް ހަދަނީ. އެމީހުން ވަރަށް ގިނަ މީހުންގެ އޭއައި ވީޑިއޯތައް ހަދަމުން އެބަދޭ، އަދި އެފަދަ ވީޑިއޯތަކުގައި އަހަރެންވެސް ހިމެނޭ" ސަލްމާން ބުންޏެވެ.

ސަލްމާން ފާހަގަކުރި ގޮތުގައި އޭއައި އުފެއްދުމެއްކަން ނޭނގި އާންމުން މިފަދަ ވީޑިއޯތައް ޝެއާކުރުމަކީ އެނގިގެންވާ ކަމެއް ނޫން ނަމަވެސް، އެނގިތިބެ ގަސްދުގައި މިފަދަ ފޭކް ވީޑިއޯތައް އުފައްދާ މީހުންނާމެދު ފިޔަވަޅު އަޅަންޖެހެ އެވެ.

"ގަސްދުގައި މީހުންނަށް އޮޅުވާލަން މިފަދަ ވީޑިއޯ ހަދާ މީހުން ތިބެން ޖެހޭނީ ޖަލުގައި. މިފަދަ އެކަކު ނުވަތަ ދެމީހަކު ޖަލަށް ނުލާހާ ހިނދަކު މިކަމެއް ނުހުއްޓުވޭނެ. ސޯޝަލް މީޑިއާ ސެންސަރު ކުރެވޭނެ އަދި މިކަމަށް ހާއްސަ ގީނޫނެއް ހެދެންޖެހޭ،" ސަލްމާން އިތުރަށް ބުންޏެވެ.

މީގެ އިތުރުން ސަލްމާން ވަނީ މަޝްހޫރު ތަރިންނަށް ސައިބަ ސެލް މެދުވެރިކޮށް މިފަދަ ވީޑިއޯތައް ހަދާ މީހުން ހޯދުމުގެ ފުރުޞަތު އޮތްނަމަވެސް، އާންމު ރައްޔިތުންނަށް އެފަދަ ވަސީލަތްތައް ނުލިބޭތީ، އާންމުންގެ އަބުރާއި ދިރިއުޅުމަށް އެކަމުން ކުރާނެ ނޭދެވޭ އަސަރުތަކާމެދު ކަންބޮޑުވުން ފާޅުކޮށްފަ އެވެ.