އިންޑިއާގައި ނިކޮޓިން ޕައުޗް ވިއްކުމާއި ބޭނުން ކުރުން މަނާކޮށްފި
މި ހަފުތާގައި އެމެރިކާ އާއި އީރާނުގެ މަޝްވަރާތައް އަލުން ފަށަނީ
ގޯވިންދާއާއެކު އޮތް ގުޅުމުގެ އަޑުތަކަށް ކޯމަލްގެ ރައްދެއް!
ތައިލެންޑަށް ކުރިމަތިވި ވިއްސާރައިގައި އެ ގައުމުގެ ވެރިރަށް ބެންކޮކާއި އެކި ސަރަޙައްދުތަކުގައި ފެންބޮޑުވެ ލިބުނު ގެއްލުމުގެ އަގު 320 މިލިއަން ޑޮލަރަށް އަރައިފި އެވެ.
މިދިޔަ ހަފްތާ ބަންދުގައި މެދުކެނޑުމެއް ނެތި ވެހުނު ބޯ ވާރޭގެ ސަބަބުން ބެންކޮކްގެ ބޮޑު ބައެއްގައި ފެންބޮޑުވެ، އެތައް ހާސް ރައްޔިތުންނެއްގެ ދިރިއުޅުމަށް ވަނީ ބޮޑެތި ދަތިތަކެއް ކުރިމަތިވެފަ އެވެ. އަދި އިރުމަތީ ޕްރޮވިންސެއް ކަމަށްވާ ރަޔޮންގްގެ ދެ ކޯރެއް ފުރިގެން ބަންޑުންވާން ފެށުމުން، އެ ސަރަހައްދުގައި ދިރިއުޅޭ އާންމުން ވަގުތުން ރައްކާތެރި ހިސާބުތަކަށް ބަދަލުވުމަށް ކަމާބެހޭ އިދާރާތަކުން ވަނީ އަންގައިފަ އެވެ.
މިދިޔަ ހަފްތާގެ ދެތިން ދުވަހުގެ ތެރޭގައި އެކަނިވެސް 320 މިލިމީޓަރުގެ ވާރޭ ވަނީ ރެކޯޑު ކުރެވިފަ އެވެ. މިއީ އާންމު ގޮތެއްގައި މުޅި ސެޕްޓެމްބަރު މަހު ވެހޭ މިންވަރާ އެއްވަރުގެ ޢަދަދެކެވެ. މި ބޯ ވާރޭގެ ސަބަބުން ސަހަރުގެ ފެން ހިންދާ ނިޒާމުތައް މުޅިން ބްލޮކްވެފައިވާ ކަމަށް ރިޕޯޓުތައް ބުނެ އެވެ.
ތައިލޭންޑުގެ ދާހިލީ ވުޒާރާއިން ހާމަކުރި ގޮތުގައި، ފެންބޮޑުވެފައިވާ ސަރަހައްދުތަކުގައި 80،000 އަށްވުރެ ގިނަ މީހުން ވަނީ ގޭބަންދުވެފަ އެވެ. މި ފަރާތްތަކަށް އެހީވުމަށް ޚާއްސަ އުޅަނދުފަހަރު ދަނީ ބޭނުންކުރަމުންނެވެ. އަދި ހާލުގައި ޖެހިފައިވާ ހުރިހާ ފަރާތްތަކަށް، ފެންހިނދޭތާ މަދުވެގެން ހަތް ދުވަސް ވަންދެން ތިން އިރު ކާނާ ފޯރުކޮށްދިނުމަކީ ސަރުކާރުގެ އަމާޒެކެވެ.
ސެޕްޓެމްބަރު 16 އިން ފެށިގެން އެ ައުމުގެ 41 ޕްރޮވިންސަކަށް އަސަރުކޮށްފައިވާއިރު، މި ކާރިސާގައި މިހާތަނަށް 8 މީހުން މަރުވެ، 580,000 އަށްވުރެ ގިނަ ގެދޮރަށް ވަނީ ގެއްލުންވެފަ އެވެ. މީގެ އިތުރުން، ބެންކޮކް ސިޓީ އެޑްމިނިސްޓްރޭޝަނުން ވަނީ އެ ސިޓީން އެކަނިވެސް 5,901 މީހަކު 234 ވަގުތީ ހިޔާއަށް ބަދަލުކޮށްފަ އެވެ.
ބެންކޮކްގެ ބޭންގް ކަޕީ އަވަށުގައި ފެންބޮޑުވެފައި އޮންނަތާ ތިން ދުވަސް ވެފައިވާއިރު، އާންމުން އުނަގަނޑާ ހަމައަށް ފެން ހުރި މަގުތަކުގައި ހިނގާފައިގޮސް ޒަރޫރީ ތަކެތި ހޯދަމުންދާއިރު، ވިޔަފާރިވެރިން ދަނީ އުސް ތަންތަނުގައި ކައުންޓަރު ހަދައިގެން ވިޔަފާރި ކުރަމުންނެވެ. ގާތްގަނޑަކަށް 8.4 މިލިއަން މީހުންގެ އާބާދީއެއް އޮންނަ ބެންކޮކަށް، އަހަރުގެ ހަ މަސް ދުވަހުގެ ވިއްސާރަ މޫސުމުގައި މިފަދަ ކަންކަމާ ކުރިމަތިލާންޖެހެ އެވެ.
އިގްތިސާދީ މާހިރުން ލަފާކުރާ ގޮތުގައި، މި ކާރިސާގެ ސަބަބުން އެ ގައުމުގެ އިގްތިސާދަށް މަދުވެގެން 11 ބިލިއަން ބާތު (327 މިލިއަން ޑޮލަރު) ގެ ގެއްލުމެއް ވާނެ އެވެ. މީގެ ސަބަބުން މިއަހަރުގެ ޖީޑީޕީ ކުރިއަރާނެ ކަމަށް ލަފާކުރި މިންވަރުން 0.3 އިންސައްތަ ދަށްވެ، ކުރިއެރުން 2.1 އިންސައްތައަށް ވެއްޓޭނެ އެވެ. މި ގެއްލުމުގެ ބޮޑު ބައެއް ތަހައްމަލު ކުރަންޖެހޭނީ ހޯލްސޭލް އަދި ރީޓޭލް ވިޔަފާރިތަކަށެވެ.
ދެކުނުއޭޝިއާ ސަރަހައްދުގެ ދެވަނައަށް އެންމެ ބޮޑު އިގްތިސާދު ކަމަށްވާ ތައިލެންޑުގައި މިދިޔަ އަހަރުވެސް ތިން ދުވަހުން 630 މިލިމީޓަރުގެ ވާރޭވެހި، ފެންބޮޑުވުމުގެ ސަބަބުން 145 މީހުން މަރުވެ، ބޮޑެތި ގެއްލުންތަކެއް ލިބިފައިވެ އެވެ.
ބެންކޮކްގައި ފެންބޮޑުވެ ހުރިހާ ސަރަހައްދެއް ކާރިސާގެ ހާލަތަށް
