މަޝްހޫރު ރިއަލިޓީ ޝޯ "ބިގް ބޮސް 20"ގެ ފަހުގެ އެޕިސޯޑެއްގައި ގަމީސް ބާލައިގެން އޭނާގެ ހަށިގަނޑު ދައްކާލި ދެއްކުމަކީ، ސިކްސް ޕެކް ހުރެގެން ސައިޒު ދައްކާލަން ކުރި ކަމެއް ނޫން ކަމަށާއި، އެއީ އަދިވެސް "އަންފިޓްކޮށް" ހުރިކަން ސާބިތުކޮށްދޭން ކުރި ކަމެއް ކަމަށް ބޮލީވުޑްގެ ސުޕަސްޓާރު ސަލްމާން ޚާން ބުނެފިއެވެ.

ޝޯގެ "ވިކެންޑް ކާ ވާރު" އެޕިސޯޑުގައި ވާހަކަ ދައްކަމުން ސަލްމާން ބުނީ، ސޯޝަލް މީޑިއާގައި މީހުންގެ ސިފައަށް ފާޑުކިޔައި "ބޮޑީ ޝޭމް" ކުރާ ފަރާތްތަކަށް ރައްދު ދިނުމުގެ ގޮތުން ގަމީސް ނެގި ނަމަވެސް، މީހުންނަށް އޭނާގެ ހަށިގަނޑު ކަމުދިޔުމުން ހައިރާންވި ކަމަށެވެ.

"އަހަރެން ގަމީސް ބޭލީ ސިކްސް ޕެކް ނެތްކަން ދައްކާލަން. އެކަމަކު ނޭނގެ ކީއްވެގެން ކަމެއް މީހުންނަށް އެ ހަށިގަނޑު ކަމުދިޔައީ. އަދިވެސް އަހަރެންގެ ސިއްހަތު ރަނގަޅެއް ނޫން. ކުރިއަށް އޮތް 1-2 މަސްދުވަހުގެ ތެރޭގައި ހަށިގަނޑު ބައްޓަން ކުރުމުގެ މަސައްކަތް ދާނީ ކުރިއަށް" ސަލްމާން ބުންޏެވެ.

ވޭތުވެދިޔަ ހަފްތާގެ އެޕިސޯޑެއްގައި ސަލްމާން ވަނީ އިންޓަނެޓްގައި އެކި މީހުންނަށް ފާޑުކިޔައި، "ސަލްމާން ފަލަވެއްޖެ" ކަމަށް ބުނެ ފާޑުކިޔާ މީހުންނަށް ވަރުގަދަ ރައްދެއް ދީފަ އެވެ.

އެގޮތުން އޭނާގެ ކޯޓާއި ގަމީސް ނެގުމަށްފަހު، "މިއޮތީ ހަށިގަނޑު، ދެންވެސް ފާޑު ކިޔާބަލަ" މިހެން ބުނެ ގޮންޖެހި އެވެ. އެއާއެކު އެހެން މީހުންގެ ސިފައަށް ފާޑުކިޔުމުގެ ކުރިން، އަމިއްލަ ސިއްހަތާއި އާއިލާގެ ސިއްހަތަށް ބެލުމަށް ސަލްމާން އިލްތިމާސްކުރި އެވެ.

ސެޕްޓެމްބަރު 6 ގައި ފެށި "ބިގް ބޮސް 20"ގެ ހޯސްޓެއްގެ ގޮތުގައި ސަލްމާން ފެންނައިރު، އޭނާ އަންނަނީ ކުރިއަށް އޮތް ފިލްމުތަކަށްޓަކައި ހަށިގަނޑު ފިޓް ކުރުމުގެ މަސައްކަތް ކުރަމުންނެވެ.