މަޝްހޫރު ކޮމޭޑިއަން ސަމޭ ރައިނާގެ ޝޯ "އިންޑިއާސް ގޮޓް ލޭޓަންޓް"ގެ އެޕިސޯޑެއްގައި، ޕާކިސްތާނުގެ ޖާސޫސަކާ ގުޅުވައިގެން ޖެހި މަޖާ ޖޯކަކަށް މަޝްހޫރު ލަވަކިޔުންތެރިޔާ އަދުނާން ސާމީ މަޖާ ރައްދު ދީފި އެވެ.

މި ހާދިސާ ހިނގާފައިވަނީ ބޮލީވުޑް އެކްޓަރު އަޔުޝްމާން ކުރާނާ މި ޝޯގެ ޕެނަލިސްޓެއްގެ ގޮތުގައި ބައިވެރިވި އެޕިސޯޑެއްގަ އެވެ. ޝޯގެ ތެރެއިން އަޔުޝްމާން ވަނީ އޭނާގެ ކުރިއަށް އޮތް ފިލްމު "އުޑްތާ ތީރު"ގެ ވާހަކަ ހިއްސާކޮށްފަ އެވެ.

ފިލްމުގެ ވާހަކަ ކިޔައިދެމުން އަޔުޝްމާން ބުނީ، "މިއީ އިންޑިއާގެ ފުރަތަމަ 'ޕެޓްރިއޮޓިކް ކޮމެޑީ' ކަމަށާއި ފިލްމުގައި އޭޭނާ ކުޅެނީ އިންޑިއާއަށް އަންނަ ޕާކިސްތާނުގެ ޖާސޫސެއްގެ ރޯލު ކަމަށެވެ.

"އިންޑިއާއަށް އައުމަށްފަހު އެކްސިޑެންޓެއްވެ، އޭނާގެ ހަނދާން ބަލިވެ، އަމިއްލައަށް އިންޑިއާ މީހެއް ކަމަށް ހީވާން ފަށަނީ. ޤައުމީ ލޯބި މަތިން ހަނދާން ހުރޭ، އެކަމަކު އޭނާއަކީ ކޮން ޤައުމެއްގެ މީހެއްކަން ހަނދާނެއް ނުހުރޭ."

އަޔުޝްމާން ފިލްމުގެ ވާހަކަ ކިޔައިދީ ނުނިމެނީސް، ޕެނަލްގައި އިން ކޮމެޑިއަން އަދިތްޔާ ކުލްޝްރޭޝްތާ (ކުއްލޫ) ވަނީ ވަގުތުން "އެއީ އަދުނާން ސާމީއެއްނު!" ކިޔައި ޖޯކު ޖަހާފަ އެވެ. މިއާއެކު ޝޯގައި ތިބި އެންމެންނަށް ވަނީ ބާރަށް ހީނގަނެފަ އެވެ.

މި ވީޑިއޯ ސޯޝަލް މީޑިއާގައި އާންމުވުމުން އަދުނާން ސާމީ ވަނީ އެ އިންސްޓަގްރާމް ރީލްގެ ކޮމެންޓް ސެކްޝަންގައި މަޖާ ރައްދެއް ދީފަ އެވެ.

"ފުރަތަމަ މަގޭ އަތުން ފިލްމުގެ 'ރައިޓްސް' (ހައްގުތައް) ހޯދާ. އެއަށްފަހު ފިލްމު ހަދާ!" އެ ރީލްގައި އަދުނާން ބުނެފައިވެ އެވެ.

ޕާކިސްތާނަށް އުފަން އަދުނާން ސާމީ ވަނީ ކުރިން އޮތް ޕާކިސްތާނުގެ ރައްޔިތުކަން ދޫކޮށްލުމަށްފަހު، 2016 ވަނަ އަހަރު އިންޑިއާގެ ރައްޔިތުކަން ހޯދާފަ އެވެ.

އަޔުޝްމާންއާއި ސާރާ އަލީ ޚާން މުހިންމު ރޯލުތަކުން ފެންނަ "އުޑްތާ ތީރު" ސިނަމާތަކުގައި އަޅުވަން ހަމަޖެހިފައިވަނީ އޮކްޓޯބަރު 9ގަ އެވެ.