ދުނިޔޭގެ ބޮކްސް އޮފީހުގައި 2.5 ބިލިއަން އެމެރިކާ ޑޮލަރަށްވުރެ ބޮޑު އާމްދަނީއެއް ހޯދައި ބޮޑު ކާމިޔާބީއެއް ހާސިލުކުރުމަށްފަހު، ޓޮމް ހޮލަންޑް މުހިއްމު ރޯލުން ފެންނަ "ސްޕައިޑަމޭން: ބްރޭންޑް ނިއު ޑޭ" އިތުރު އާ މަންޒަރުތަކާއެކު އަލުން ސިނަމާތަކުގައި އަޅުވަން ތައްޔާރު ވަމުން އެބަދެ އެވެ.

މި ފިލްމަކީ މިއަހަރު ނުކުތް ފިލްމުތަކުގެ ތެރެއިން އެންމެ ބޮޑު އާމްދަނީއެއް ހޯދި ފިލްމުގެ އިތުރުން، ތާރީހުގައިވެސް ތިންވަނައަށް އެންމެ ބޮޑު އާމްދަނީއެއް ހޯދި ފިލްމެވެ.

މާވެލް ސްޓޫޑިއޯސްއާއި ސޮނީ ޕިކްޗާސް ގުޅިގެން އުފައްދާފައިވާ މި ފިލްމު އަލުން ސިނަމާތަކަށް ނެރޭނެ ވަކި ތާރީހެއް އަދި ރަސްމީކޮށް އިއުލާނެއް ނުކުރެ އެވެ.

މި ފިލްމު އަލުން ރިލީޒް ކުރުމުގެ މައިގަނޑު އެއް ބޭނުމަކީ އުތުރު އެމެރިކާގެ ބޮކްސް އޮފީހުގައި އެއް ބިލިއަން ޑޮލަރުގެ ލަނޑުދަނޑި ގިރާކުރާ ފުރަތަމަ ފިލްމަށް ހެދުމެވެ.

މިހާތަނަށް އެ ސަރަހައްދުން އެކަނިވެސް 950.6 މިލިއަން ޑޮލަރު އެ ފިލްމަށް ވަނީ ލިބިފަ އެވެ. "އެވެންޖާސް: އެންޑްގޭމް" އާއި "އެވެޓާ ގެ ރެކޯޑްތައް މުގުރާލުމަށްފަހު، އިތުރު މަންޒަރުތަކާއެކު ސިނަމާތަކަށް އައުމުން އެއް ބިލިއަންގެ އަމާޒަށް ފިލްމަށް ވާސިލު ވެވޭނެކަމަށް ބެލެވެ އެވެ.

ޑެސްޓިން ޑެނިއަލް ކްރެޓަން ޑައިރެކްޓް ކޮށްފައިވާ "ސްޕައިޑަމޭން: ބްރޭންޑް ނިއު ޑޭ"ގައި ފެނިގެންދަނީ، އެންމެންގެ ހަނދާނުން ޕީޓާ ޕާކާ (ސްޕައިޑަމޭން)ގެ މައުލޫމާތު ފޮހެވިގެންދިޔަ ހާދިސާއަށްފަހު، އޭނާގެ ދިރިއުޅުން އަލުން ބިނާ ކުރުމަށް ކުރާ މަސައްކަތްތަކެވެ.

މި ފިލްމުގެ މުހިންމު ރޯލުތަކުން ޓޮމް ހޮލެންޑްގެ އިތުރުން ޒެންޑާޔާ، ސޭޑީ ސިންކް، ޖޯން ބާންތަލް، ޖޭކަބް ބަޓާލަން، މާކް ރަފަލޯ އަދި ފްލޮރެންސް ޕިއު ފެނިގެންދެ އެވެ.

ހާއްސަކޮށް، މާވަލް ސިނެމެޓިކް ޔުނިވާސްއަށް "މިއުޓަންޓްސް" އަދި ޖީން ގްރޭގެ ކެރެކްޓާ ތައާރަފް ކުރުމުގައި މި ފިލްމަކީ ވަރަށް މުހިންމު ދައުރެއް އަދާކުރި ފިލްމެކެވެ.