ސްވިމް މޯލްޑިވްސްގެ ފަރާތުން އިންތިޒާމްކޮށްގެން ބާއްވާ "އޮޑިން ރަށަށް" ފެތުމުގެ މުބާރާތުގެ މިއަހަރުގެ ޓައިޓަލް ސްޕޮންސަރަކަށް އެސްއެމްއީ ޑިޖިޓަލް ހަމަޖައްސައިފި އެވެ.

"އޮޑިން ރަށަށް" އަކީ ސްވިމް މޯލްޑިވްސްއިން މުޅިން އަލަށް ތަފާތު ގޮތަކަށް ބާއްވާ ފެތުމުގެ މުބާރާތެކެވެ.

މި މުބާރާތުގައި ފެތުންތެރިން ވާދަކުރަންޖެހެނީ އިވެންޓް އޮންނަ ރަށެއްގެ 500 މީޓަރު ބޭރުން، އެ ރަށަކަށް ފަތާފައި އަންނަ ގޮތަށެވެ. މިއީ މިފަދަ ގޮތަކަށް އިންތިޒާމްކޮށްގެން ރާއްޖޭގައި ފެތުމުގެ މުބާރާތެއް ބާއްވާ ފުރަތަމަ ފަހަރެވެ.

"އެސްއެމްއީ ޑިޖިޓަލް އޮޑިން ރަށަށް" މުބާރާތުގެ ފުރަތަމަ އިވެންޓް 100 ފެތުންތެރިންނާއެކު އަންނަ ހޮނިހިރު ދުވަހު ވިލިމާލޭގައި ބޭއްވުމަށް ވަނީ ހަމަޖެހިފަ އެވެ. އަދި މިއަހަރު ނިމުމުގެ ކުރިން މީގެ ދެވަނަ އިވެންޓެއް ބޭއްވުމަށް ތައްޔާރުވަމުންދާއިރު، އަންނަ އަހަރު ރާއްޖޭގެ ފަސް ރަށެއްގައި މި މުބާރާތް ބޭއްވުމަށް ވަނީ ރޭވިފަ އެވެ.

އެސްއެމްއީ ޑިޖިޓަލްއިން ބުނި ގޮތުގައި މި މުބާރާތް ސްޕޮންސާ ކުރުމުގެ އެންމެ ބޮޑު ބޭނުމަކީ އަތޮޅުތެރޭގެ ކޮމިއުނިޓީތަކާއެކު އޮންނަ ގުޅުން ބަދަހިކޮށް، އެ ކުންފުނީގެ ދައުރު ފުޅާކުރުމެވެ. އަދި މުބާރާތް ބާއްވާ ރަށްރަށުގެ ވިޔަފާރިތަކަށް ކުރިއެރުން ހޯދައިދިނުމާއި، އެސްއެމްއީ ޑިޖިޓަލްއިން ފޯރުކޮށްދޭ ފައިނޭންސިން ފެސިލިޓީތަކުގެ މައުލޫމާތު އާންމުންނަށް ހިއްސާކުރުމުގެ ފުރުސަތު މި އިވެންޓްތަކުގެ ތެރެއިން ލިބިގެންދާނެ އެވެ.