މަޝްހޫރު ކޮމެޑީ ސީރީޒް "ފްރެންޑްސް"ގައި "ޗޭންޑްލާ ބިންގް"ގެ ރޯލުން އާންމުންގެ ބޮޑު މަގުބޫލުކަމެއް ހޯދާފައިވާ މެތިއު ޕެރީގެ ހަޔާތާއި ކެރިއަރަށް އަލިއަޅުވާލައި ތައްޔާރު ކޮށްފައިވާ ޑޮކިއުމެންޓްރީ ސީރީޒް "ދަ ވަން އެބައުޓް މެތިއު ޕެރީ" އަންނަ އޮކްޓޯބަރު މަހުގެ 27 ވަނަ ދުވަހު ނެޓްފްލިކްސްއިން ރިލީޒް ކުރުމަށް ނިންމައިފި އެވެ.

ތިން އެޕިސޯޑުގެ މައްޗަށް އެކުލެވޭ މި ޑޮކިއުމެންޓްރީ ރިލީޒް ކުރަނީ މެތިއު ޕެރީ މަރުވިތާ ތިން އަހަރު ފުރުމުގެ އެއް ދުވަސް ކުރިންނެވެ. މެތިއު ކުއްލި ގޮތަކަށް މަރުވީ 28 އޮކްޓޯބަރު 2023ގަ އެވެ.

އެމީ އެވޯޑް ކާމިޔާބު ކޮށްފައިވާ ޑައިރެކްޓަރު މޭރީ ރޮބަޓްސަން ޑައިރެކްޓް ކޮށްފައިވާ މި ސީރީޒްގައި މެތިއުގެ ހަޔާތުގެ އެކި އުފާވެރި އަދި ހިތާމަވެރި ދަނޑިވަޅުތައް ވަރަށް ތަފްސީލުކޮށް ދައްކުވައިދޭނެ އެވެ.

https://www.youtube.com/watch?v=_iM1AOFxoDI

ހާއްސަކޮށް، މެތިއު މަރުވި ފަހުން އޭނާގެ ކޮއްކޮ މިއާ ޕެރީ ބޯވިކް ފުރަތަމަ ފަހަރަށް މީޑިއާއަށް ދީފައިވާ އިންޓަވިއުއާއި، އާއިލީ އާކައިވްއިން މީގެ ކުރިން އާއްމު ކޮށްފައިނުވާ ފޮޓޯއާއި ވީޑިއޯތައް މި ޑޮކިއުމެންޓްރީން ފެނިގެންދާނެ އެވެ.

ޑޮކިއުމެންޓްރީގެ ޓްރެއިލާގައި މެތިއު މަޝްހޫރު ވުމަށް ކުރި އުއްމީދުތަކާއި، މަޝްހޫރުކަން ލިބުމަށްފަހުވެސް އެތެރެފުށުން އޭނާ ކުރި ހިތާމަތަކާއި، މަސްތުވާތަކެތީގެ ވަބާއިން ސަލާމަތްވުމަށް ކުރި ބުރަ މަސައްކަތްތަކުގެ މައްޗަށް އަލިއަޅުވާލާފައިވެ އެވެ.

މެތިއުގެ ކޮއްކޮ މިއާ ހާމަކުރި ގޮތުގައި، އޭނާގެ ބޭބެ މަސްތުވާތަކެތީގެ ވަބާއިން ސަލާމަތްވެ ރަނގަޅު ސިއްހަތެއްގައި ހުރުމަށްޓަކައި ހަތް މިލިއަން ޑޮލަރަށްވުރެ ގިނަ ފައިސާ ހަރަދުކުރި އެވެ.

މި ސީރީޒްގެ މަގުސަދަކީ މެތިއުއަކީ ހަމައެކަނި "ޗެންޑްލާ"ގެ ރޯލު ކުޅުނު އެކްޓަރު ނުވަތަ މަސްތުވާތަކެތީގެ ވަބާގައި އުޅުނު މީހެއްގެ ގޮތުގައި އެކަނި ދެކުމުގެ ބަދަލުގައި، އޭނާއަކީ ހިތްހެޔޮ، އޯގާތެރި އަދި އެހެން މީހުން ހިނިތުން ކުރުވައި އުފާ ކޮށްދިނުމަށް ލޯބިކުރި ފުރިހަމަ އިންސާނެއްގެ ގޮތުގައި ދުނިޔެއަށް ދެއްކުން ކަމަށް އޭނާގެ އާއިލާއިން ބުނެ އެވެ.