ގޭގެ ސޯފާގައި އިނދެފައި ފޯނު ޗާޖަރު ބަލައި ކޮޓަރިއަށް ވަންނަ ތަނުން "މިތަނަށް މި އައީ ކީއްކުރަން ހެއްޔޭ" ހިތަށް އަރައި، ކުރަން އައި ކަންތައް ކުއްލިއަކަށް ހަނދާން ނެތޭ ގޮތްވެ އެވެ.

މިއީ އަޅުގަނޑުމެންގެ ތެރެއިން ގިނަ ބަޔަކަށް އާންމުކޮށް ދިމާވާ، ނަމަވެސް އޭގެ ފަހަތުގައިވާ ސައިންސްގެ ވަރަށް ޝައުގުވެރި ސަބަބުތަކެއް ނޭނގޭ ކަމެކެވެ.

ނަފްސާނީ އިލްމުވެރިންނާއި ސައިންސްވެރިން މި ހާދިސާއަށް ދީފައިވާ ނަމަކީ "ޑޯވޭ އިފެކްޓް" ނުވަތަ "ލޮކޭޝަން އަޕްޑޭޓިން އިފެކްޓް" އެވެ.

ސިކުނޑި މަސައްކަތްކުރާ ގޮތް: "އީވެންޓް ބައުންޑަރީސް"

ސައިންސްވެރިން ބުނާ ގޮތުގައި އަޅުގަނޑުމެންގެ ސިކުނޑިން ދުވަހުގެ ހާދިސާތައް ރައްކާ ކުރަނީ އެކަތިގަނޑެއްގެ ގޮތުގައެއް ނޫނެވެ. އޭގެ ބަދަލުގައި ސިކުނޑިން ކަންކަން އިންތިޒާމު ކުރަނީ ފޮތެއްގެ ވަކިވަކި ބާބުތަކެއް ގޮތަށެވެ.

އެގޮތުން އެއް ކޮޓަރިން އަނެއް ކޮޓަރިއަށް ދިއުމަށް ދޮރާށިން އެތެރެވުމަކީ، ސިކުނޑިއަށް އެއް "ބާބު" ނިމި އާ ބާބެއް ފެށުނީކަމުގެ އިޝާރާތެކެވެ. މިއަށް ސައިންސްގައި ކިޔަނީ "އީވެންޓް ބައުންޑަރީ" އެވެ.

ވަކި މާހައުލަކުން އަނެއް މާހައުލަށް ބަދަލުވުމުން، ސިކުނޑިން އޭގައި އެވަގުތަށް މުހިންމު މައުލޫމާތުތައް "އަޕްޑޭޓް" ކުރެ އެވެ. މީގެ ސަބަބުން ކުރީގެ މާހައުލުގައި ހުރިއިރު ސިކުނޑީގައި ތާޒާކޮށް ހުރި ހިޔާލުތައް ވަގުތީ ގޮތުން ފަހަތަށް ޖެހި، ހަނދާނުން ފުރޭނިގެން ދެ އެވެ.

ދޮރުގެ އިތުރުން ވިސްނުން ގިނަވުން

2021 ވަނަ އަހަރު "ބީއެމްސީ ސައިކޮލޮޖީ" ގައި ޝާއިއުކުރި ދިރާސާއަކުން ދައްކާ ގޮތުގައި، ހަމައެކަނި ދޮރަކުން އެތެރެ ވުމަކުން ކަންކަން ހަނދާން ނެތެނީއެއް ނޫނެވެ. މީގެ އިތުރުން އެމީހެއްގެ ސިކުނޑީގައި އެވަގުތު ގިނަ ވިސްނުންތަކެއް ނުވަތަ "ވޯކިން މެމޮރީ ލޯޑް" ބޮޑުވެފައި ހުރުމަކީވެސް މައިގަނޑު ސަބަބެކެވެ.

އުނދުން މަތީގައި ހުރި އެއްޗެއްގެ މަތިންނާއި، ފޮނުވަންޖެހޭ އީމެއިލްއަކާ މެދު ވިސްނަމުން ކޮޓަރިއަށް ވަންނަ އިރު، ސިކުނޑިއަށް އަންނަ އާ މައުލޫމާތުތަކުގެ ސަބަބުން ކުރިން ކުރަން އައި އަސްލު ކަންތައް ވަގުތީ ގޮތުން ހަނދާނުން ފޮހެވިގެން ދަނީ އެވެ.

އަނބުރާ ދިޔުމުން ހަނދާންވަނީ ކީއްވެ؟

ގިނަ ފަހަރަށް ކުރަން އައި ކަންތައް ހަނދާން ނެތުމުން، އަނބުރާ ކުރިން ހުރި ތަނަށް ދިއުމުން އެކަން ހަނދާންވެ އެވެ. މިއީ ކުރީގެ މާހައުލުގައި ހުރި މާހައުލީ ނިޝާންތަކުގެ ސަބަބުން ސިކުނޑިއަށް އެ ހަނދާން އަލުން އިއާދަކޮށްދިނުމަށް އެހީތެރިވެދޭތީ ދިމާވާ ގޮތެކެވެ.

ހަނދާން ބަލިވަނީކީ ނޫން!

ކޮޓަރިއަކަށް ވަދެ ކުރަން އައި ކަންތައް ހަނދާން ނެތުމަކީ ތިބާގެ ހަނދާން ބަލިވުމުގެ ނިޝާނެއް ނޫނެވެ. މިއީ ސިކުނޑިން މައުލޫމާތުތައް އިންތިޒާމުކޮށް، އާ މާހައުލަކަށް ތައްޔާރު ވުމަށްޓަކައި މައުލޫމާތުތައް އަޕްޑޭޓްކުރާ މަރުހަލާގައި ދިމާވާ އާންމު ކަމެކެވެ.

ތިބާގެ ސިކުނޑި މަސައްކަތް ކުރަނީ ރަނގަޅަށެވެ. އެއީ ސިކުނޑިން ތިބާއަށްވުރެ ނިކަން އަވަހަށް އާ ބާބަކަށް ދިޔައީކަން އަންގައިދޭ ކަމެކެވެ.