އަޅުގަނޑުމެން ދުވަހުން ދުވަހަށް ގޭގޭގައި ބޭނުންކުރާ ކާބޯތަކެތި ބަންދުކުރާ އެއްޗެހި، ހެދުން، ކުޅޭތަކެތި، އަންހެނުންގެ ސާފުތާހިރުކަމަށް ބޭނުންކުރާ ތަކެތި އަދި މެޑިކަލް އުފެއްދުންތަކުގައި ބޭނުންކުރާ ޕްލާސްޓިކް ކެމިކަލްތަކުގެ 93 ޕަސެންޓަކީ އިންސާނުންގެ ސިއްހަތަށް ބޮޑެތި ނުރައްކާތަކެއް ކުރިމަތިކުރުވާ ތަކެތިކަން އާ ދިރާސާއަކުން ހާމަވެއްޖެ އެވެ.

ސީ.އެން.އެންއިން އާއްމު ކޮށްފައިވާ މައުލޫމާތުތަކަށް ބަލާއިރު، މި ދިރާސާއިން ހާމަވި ގޮތުގައި އާއްމުކޮށް ގޭގޭގައި ބޭނުންކުރާ ތަކެތި އުފެއްދުމަށް ބޭނުންކުރާ ގިނަ ކެމިކަލްތަކަކީ އިންސާނާގެ ހޯމޯން ނިޒާމަށް ބުރޫއަރާ، އަދި އެހެނިހެން ނުރައްކާތެރި ސިއްހީ މައްސަލަތަކާ ގުޅުންހުރި ކެމިކަލްތަކެކެވެ.

ނުރައްކާތެރި މާއްދާތައް އެކުލެވޭ އުފެއްދުންތައް

މި ދިރާސާގައި ފާހަގަކޮށްފައިވާ ގޮތުގައި، ސިއްހީ އަދި ތާހިރުކަމަށް ބޭނުންކުރާ ޕްލާސްޓިކް އުފެއްދުންތަކުގެ 93 ޕަސެންޓްގައި ނުރައްކާތެރި ކެމިކަލް އެކުލެވިގެންވެއެވެ. މީގެ ތެރޭގައި:

  • ކާބޯތަކެތި ބަންދު ކުރުމަށް ބޭނުންކުރާ ޕްލާސްޓިކް
  • އަންހެނުންގެ މައްސަރު ކަންތަކުގައި ބޭނުންކުރާ އުފެއްދުންތަކާއި ދަތް ސާފުކުރާ ފްލޮސް
  • ކުޑަކުދިންގެ ކުޅޭތަކެއްޗާއި ހެދުން
  • ބޭސް ގުޅަތަކުގެ ކަވަރާއި، އިންޖެކްޝަން ކަށި ފަދަ މެޑިކަލް ތަކެތި

ސިއްހީ މާހިރުންގެ ކަންބޮޑުވުން

މި ދިރާސާއާ ގުޅޭގޮތުން މާހިރުން ބުނެފައިވަނީ، މި ކެމިކަލްތަކަކީ އާންމު ދިރިއުޅުމުގެ ތެރެއިން މީހުންނަށް ނޭނގި ނަމަވެސް އަބަދުމެ ހަށިގަނޑަށް އެތެރެވަމުންދާ ތަކެތި ކަމަށެވެ.

ދެވަނަ ބޮޑު ހަނގުރާމައަށްފަހު ކެމިކަލް އުފެއްދުންތައް އިތުރުވެގެން ދިޔަ ނަމަވެސް، އޭގެ ތެރެއިން އިންސާނާގެ ސިއްހަތަށް ކުރާ އަސަރުތައް ރަނގަޅަށް ދިރާސާ ކުރެވިފައިވަނީ އެންމެ 20 ޕަސެންޓް ކެމިކަލްގައި ކަމަށްވެސް މާހިރުން ފާހަގަކުރެ އެވެ.

ނަމަވެސް، ކެމިކަލް އިންޑަސްޓްރީގެ ބައެއް ފަރާތްތަކުން ވަނީ މި ރިޕޯޓުގައި ކަންކަން ހުށަހަޅާފައިވާ ގޮތާމެދު ކަންބޮޑުވުން ފާޅުކޮށް، ގާނޫނީ ގޮތުން ކަނޑައަޅާފައިވާ ރެގިއުލޭޓަރީ އުސޫލުތަކަށް މި ދިރާސާގައި ރިއާޔަތް ކޮށްފައިނުވާ ކަމަށް ބުނެފަ އެވެ.

މި ދިރާސާއާއެކު، އާންމު ދިރިއުޅުމުގައި ޕްލާސްޓިކް ބޭނުން ކުރުން މަދުކުރުމާއި، ހާއްސަކޮށް ކާބޯތަކެއްޗާއި ސާފުތާހިރުކަމުގެ އުފެއްދުންތަކުގައި ރައްކާތެރި ބަދަލުތައް ބޭނުން ކުރުމުގެ މުހިއްމުކަން އަލުން ވަނީ ފާހަގަވެގެން ގޮސްފަ އެވެ.