ކާމިޔާބު ނުވަ ސީޒަނަށްފަހު ބޮލީވުޑްގެ ޕްރޮޑިއުސަރު އަދި ޑައިރެކްޓަރު ކަރަން ޖޯހަރުގެ މަޝްހޫރު ޓޯކް ޝޯ "ކޮފީ ވިތު ކަރަން" ހުއްޓާލަން ނިންމައިފި އެވެ.

2004 ވަނަ އަހަރުން ފެށިގެން ގެނެސްދެމުން އަންނަ މި ޝޯ ހުއްޓާލާނެކަން ކަރަން އިއުލާންކުރީ އޭނާގެ އިންސްޓަގްރާމްގައި ހިއްސާކުރި ޕްރޮމޯ ވީޑިއޯއެއްގަ އެވެ.

އަންނަ އޮކްޓޯބަރު މަހުގެ 14 ވަނަ ދުވަހުން ފެށިގެން ޖިއޯހޮޓްސްޓާ މެދުވެރިކޮށް ދައްކަން ފަށާ އެ ޝޯގެ ނުވަވަނަ ސީޒަނަކީ މި ޝޯގެ އެންމެ ފަހު ސީޒަން ކަމަށް އޭނާ ވަނީ ކަށަވަރު ކޮށްދީފަ އެވެ.

އަސަރުގަދަ މެސެޖަކާއެކު އާންމުކުރި ވީޑިއޯގައި ކަރަން ވަނީ 2004 ވަނަ އަހަރު މިފަދަ ޝޯއެއް ހެދުމުގެ ހިޔާލު އޭނާގެ ބައްޕަ ޔަޝް ޖޯހަރަށް ހުށަހެޅި ހަނދާންތައް އާކޮށްފަ އެވެ.

އެ ދުވަހުން ފެށިގެން މިއަދާ ހަމައަށް "ކޮފީ ވިތު ކަރަން" ވެގެން ގޮސްފައިވަނީ ބޮލީވުޑްގެ އެންމެ ބޮޑެތި ސިއްރުތަކާއި، ގޮސިޕް އަދި ބޮޑެތި މައްސަލަތައް ފެންމަތިވި އެންމެ މަގުބޫލު އެއް ޕްލެޓްފޯމަށެވެ.

https://www.instagram.com/reel/Dd5sfdVsoU-/?utm_source=ig_embed&ig_rid=A26STifaXmxyqPTsaX7E9y2

ސަމާސާ ރާގަކަށް ކަރަން ބުނެފައިވަނީ، މި ޝޯގެ ސަބަބުން "ނެޕޮޓިޒަމް" (އާއިލީ ނުފޫޒު) ފަދަ ބަސްތަކާ އޭނާއަށް އަދިވެސް ކުރިމަތިލާންޖެހޭ ކަމަށެވެ. އަދި މި ޝޯއަށް އައި ބައެއް ތަރިންގެ ލޯބީގެ ގުޅުންތައް ކައިވެންޏަށް ބަދަލުވިއިރު އަނެއްބައި ތަރިންގެ ގުޅުންތައް ރޫޅިގެން ދިޔަކަންވެސް އޭނާ ފާހަގަކުރި އެވެ.

މީގެ އިތުރުން، މި ޝޯގައި ދެކެވުނު ވާހަކަތަކުގެ ސަބަބުން ބައެއް މަޝްހޫރު ތަރިންގެ ކެރިއަރު "ކިރިޔާ ހަލާކުނުވެ" ސަލާމަތްވި ކަމަށްވެސް އޭނާ ބުންޏެވެ.

ޝޯ ނިންމާލުމާ ގުޅޭގޮތުން ނެރުނު ބަޔާނެއްގައި ކަރަން ބުނީ، ބައެއް ދަތުރުތަކަކީ ނިންމާލަން ރޭވުންތަކެއް ރާވާ ދަތުރުތަކެއް ނޫން ކަމަށާއި، ނަމަވެސް އެކަމަކުން ވަކިވާންވީ ވަގުތު ހިތުގެ އަޑިން އިހުސާސްވާނެ ކަމަށެވެ.

"ކޮފީ ވިތު ކަރަން" އަކީ އޭނާގެ ހަޔާތުގެ ނުހަނު ހާއްސަ ބައެއް ކަމަށާއި، މި ޝޯއިން އޭނާއަށް އެކުވެރިކަމާއި، އުފާވެރި ހަނދާންތަކުގެ އިތުރުން ގިނަ ގޮންޖެހުންތަކާއި ބޮޑެތި ބަހުސްތަކާ ކުރިމަތިލާން ޖެހުނު ކަމަށް އޭނާ ފާހަގަކުރި އެވެ.

އެތައް އަހަރެއް ވަންދެން ބެލުންތެރިންގެ ބޮޑު ތަރުހީބެއް ލިބިގެންދިޔަ "ކޮފީ ވިތު ކަރަން"ގެ ފަހު ސީޒަނުންވެސް ބޮލީވުޑްގެ އެންމެ ފަހުގެ ހޫނު ހަބަރުތަކާއި، މަޝްހޫރު "ރެޕިޑް ފަޔާ" ރައުންޑްތައް ފެނިގެންދާނެ އެވެ.