ދުނިޔޭގެ އެކި ކަންކޮޅުތަކުގައި ބޮޑު މަގުބޫލުކަމެއް ހޯދާފައިވާ އެކްޝަން ފްރެންޗައިޒް "ފާސްޓް އެންޑް ފިއުރިއަސް" ޓީވީ ސީރީޒެއްގެ ގޮތުގައި އުފެއްދުމަށް، އެމެރިކާގެ މީޑިއާ ކުންފުނި އެންބީސީ ޔުނިވާސަލްގެ ސްޓްރީމިންގް ހިދުމަތް "ޕީކޮކް"އިން ނިންމައިފި އެވެ.

ހޮލީވުޑް ރިޕޯޓާއިން ހާމަކޮށްފައިވާ ގޮތުގައި، މިއީ "ފާސްޓް އެންޑް ފިއުރިއަސް" ފިލްމު ސީރީޒްގެ ދުނިޔެއާ ގުޅުވައިގެން ތައްޔާރުކުރާ ފުރަތަމަ އޮފިޝަލް ލައިވް-އެކްޝަން ޓީވީ ސީރީޒް އެވެ.

މި ސީރީޒްގައިވެސް ފިލްމުތަކުން ފެނިގެންދިޔަ ފަދަ ބާރުގަދަ ކާރު ރޭސްތަކާއި، ނުރައްކާތެރި އެކްޝަން ހަރަކާތްތަކުގެ އިތުރުން އާއިލީ ގުޅުންތަކުގެ ވާހަކަތައް ފެނިގެންދާނެ އެވެ.

މި ސީރީޒްގެ އެގްޒެކެޓިވް ޕްރޮޑިއުސަރުންގެ ގޮތުގައި ފްރެންޗައިޒްގެ މުހިންމު ފަރާތްތައް ބައިވެރިވެ އެވެ. މީގެ ތެރޭގައި ފިލްމުތަކުގެ މުހިންމު ކެރެކްޓަރު "ޑޮމިނިކް ޓޮރެޓޯ"ގެ ރޯލު ކުޅޭ ވިން ޑީސަލްއާއި އޭނާގެ ކުންފުނި "ވަން ރޭސް ފިލްމްސް" އިން މި ސީރީޒް ޕްރޮޑިއުސް ކުރުމުގައި އިސްކޮށް ހަރަކާތްތެރިވާނެ އެވެ. އެއާއެކު ފާސްޓް އެންޑް ފިއުރިއަސް ފިލްމު ސީރީޒްގެ އަސްލު ޕްރޮޑިއުސަރުވެސް މި މަޝްރޫއުގައި ބައިވެރިވެ އެވެ.

މި ސީރީޒްގެ ވާހަކަ ބިނާވެފައިވަނީ ސީދާ ކޮން ކެރެކްޓަރުތަކެއްގެ މައްޗަށް ކަމެއް އަދި ކާސްޓުގައި ހިމެނޭނީ ކޮން މޫނުތަކެއްކަން ޕީކޮކްއިން އިން ރަސްމީކޮށް ހާމައެއް ނުކުރެ އެވެ.

ނަމަވެސް ބެލެވޭ ގޮތުގައި، ފިލްމުތަކާ ގުޅުންހުރި އާ ކެރެކްޓަރުތަކެއް ނުވަތަ ކުރީގެ މަގުބޫލު ކެރެކްޓަރުތަކެއްގެ ސައިޑް-ސްޓޯރީތަކެއް މި ސީރީޒުން ފެނިގެންދާނެ އެވެ.

"ފާސްޓް އެންޑް ފިއުރިއަސް" ފްރެންޗައިޒަކީ ސިނަމާތަކުގައި ހަތް ބިލިއަން ޑޮލަރަށްވުރެ ބޮޑު އާމްދަނީއެއް ހޯދާފައިވާ، ހޮލީވުޑްގެ އެންމެ ކާމިޔާބު އެއް ފްރެންޗައިޒެވެ.

މި ފްރެންޗައިޒް ޓީވީ ސީރީޒަކަށް ބަދަލު ކުރުމަކީ ޕީކޮކްގެ ސްޓްރީމިން ޕްލެޓްފޯމަށް ބޮޑު ތަރުހީބެއް ހޯދުމަށް އެކުންފުނިން ނެގި މުހިންމު ފިޔަވަޅެކެވެ.