ވޯޓުލާ މީހުންގެ ދަފުތަރަށް ގެނައި ބަދަލުތަކާ ދެކޮޅަށް، "ކޮކްރޯޗް ޖަންތާ ޕާޓީ" އާއި އިދިކޮޅު އެހެން ގުރޫޕްތަކުން އިސްވެ އިންޑިއާގެ ވެރިރަށް ނިއުދިއްލީގައި ކުރިއަށްގެންދާ މުޒާހަރާތަކުގެ ދެވަނަ ދުވަހު އިންޑިއާ ފުލުހުން ނުކުމެ ގިނަ ބަޔަކު ހައްޔަރުކޮށް މުޒާހަރާ ހުއްޓުވައިފި އެވެ.

މުޒާހަރާގެ ބައިވެރިން ތުހުމަތުކުރާ ގޮތުގައި މި ބަދަލުތަކަކީ ބޮޑުވަޒީރު ނަރެންދުރަ މޯދީގެ ނުފޫޒު އޮންނަ ވެރިކަން ކުރާ ޕާޓީއަށް ނާޖާއިޒު ފައިދާ ހޯދައިދިނުމަށް ގެނައި ބަދަލުތަކެކެވެ. އެހެންކަމުން، އިންޑިއާގެ އިލެކްޝަންސް ޗީފް މަގާމުން އިސްތިއުފާ ދިނުމަށް މުޒާހަރާގެ ބައިވެރިން ދަނީ ގޮވާލަމުންނެވެ.

މި މުޒާހަރާތަކަކީ މި އަހަރުގެ ތެރޭގައި ޒުވާނުން އިސްވެ އޮވެ ކުރިއަށްގެންދާ ސިލްސިލާ މުޒާހަރާތަކުގެ ތެރެއިން ހަރަކާތެކެވެ. މިއީ ބޮޑުވަޒީރު މޯދީގެ 12 އަހަރުވީ ވެރިކަމުގައި މިހާތަނަށް ކުރިމަތިވި އެންމެ ބޮޑު ފިއްތުންތަކެވެ.

ހޮނިހިރު ދުވަހު ގާތްގަނޑަކަށް 100 އެއްހާ މުޒާހަރާގެ ބައިވެރިން ވަނީ ސަލާމަތީ ފިޔަވަޅުތަކުގެ ގޮތުން ޖަހާފައި ހުރި ބެރިކޭޑުތައް ނައްޓާލައި، "ވޯޓު ވަގުން މަގާމުން ދުރަށްދޭ" އަދި އިލެކްޝަންސް ޗީފަށް ނިސްބަތްކޮށް "ގްޔަނޭޝް ކުމާރު އިސްތިއުފާދީ" ފަދަ ޝިއާރުތަކުން އަޑުއުފުލާފަ އެވެ. ފުލުހުން ވަނީ ބާރުގެ ބޭނުންކޮށްގެން އޭގެ ތެރެއިން ބައެއް މީހުން ހައްޔަރުކޮށްފަ އެވެ.

ހައްޔަރުކުރި މީހުންގެ ތެރޭގައި މިނިވަން މެންބަރެއް ކަމަށްވާ ކަޕިލް ސިބަލް އާއި، އޯލް އިންޑިއާ ސްޓޫޑެންޓްސް އެސޯސިއޭޝަންގެ ރައީސް ނޭހާ ބޯރާގެ އިތުރުން ސިޔާސީ ހަރަކާތްތެރިން ކަމަށްވާ ޕްރަޝާންތު ބުޝާން އަދި ޔޯގެންދުރަ ޔާދަވް ހިމެނެ އެވެ. ނަމަވެސް ފުލުހުން ވަނީ ހައްޔަރުކުރި މީހުންގެ އަދަދާއި ވަނަވަރު ހާމަކުރުމަށް އިއުތިރާޒުކޮށްފަ އެވެ.

ނޭހާ ބޯރާ ރޮއިޓާސްއަށް މައުލޫމާތު ދެމުން ބުނީ، ފުރަތަމަ ވޯޓުލާ މީހުންގެ ލިސްޓުން މީހުން އުނިކުރުމަށްފަހު، މިހާރު އެކަމާ ދެކޮޅަށް އަޑުއުފުލުމުގެ ފުރުސަތުވެސް ނުދޭ ކަމަށާއި، މިއީ ބަލައިގަނެވޭނެ ކަމެއް ނޫން ކަމަށެވެ. މުޒާހަރާގެ ބައިވެރިންގެ މި ޑިމާންޑްތަކާ ގުޅޭގޮތުން އިލެކްޝަން ކޮމިޝަންގެ ރައީސް ކުމާރު އަދި އެއްވެސް އެއްޗެއް ވިދާޅެއް ނުވެ އެވެ.

ހުކުރު ދުވަހުވެސް ފުލުހުން ވަނީ މުޒާހަރާގެ ބައިވެރިން އެއްވިޔަނުދީ ހުއްޓުވައި، ބައެއް މީހުން ފުލުހުންގެ ބަސްތަކަށް އަރުވައިގެން ގެންގޮސްފަ އެވެ. އަދި ސަލާމަތީ ފިޔަވަޅުތައް ވަރުގަދަކުރުމުގެ ގޮތުން ކައިރި ސަރަހައްދުތަކުގެ މެޓްރޯ ސްޓޭޝަންތައްވެސް ވަނީ ބަންދުކޮށްފަ އެވެ.

ހުކުރު ދުވަހު ހައްޔަރުކުރި ގިނަ ބަޔަކު ދޫކޮށްލާފައިވީ ނަމަވެސް، ދިއްލީގައި އެއްވެ އުޅުން މަނާކޮށް ނެރެފައިވާ އަމުރާ ހިލާފުވި ކަމުގެ ދައުވާ ބައެއް މީހުންގެ މައްޗަށް އުފުލާފައިވާ ކަމަށް ފުލުހުންގެ މަސްދަރަކުން ބުނެ އެވެ.

ފާޑުކިޔާ ފަރާތްތަކުން ބުނާ ގޮތުގައި މިދިޔަ އަހަރު ފެށި ވޯޓާ-ވެރިފިކޭޝަން މަސައްކަތުގެ ސަބަބުން، ވޯޓުލުމުގެ ހައްގު ލިބިގެންވާ އެތައް މިލިއަން ބަޔަކު ވަނީ ދަފުތަރުން އުނިކޮށްފަ އެވެ. ނަމަވެސް، އިންޑިއާގެ އިތުބާރު ހިފޭ މުއައްސަސާއެއްގެ ގޮތުގައި ބެލެވޭ އިލެކްޝަން ކޮމިޝަނުން ބުނަނީ، މި މަސައްކަތަކީ ދެފަހަރަށް ރަޖިސްޓްރީވެފައިވާ މީހުންނާއި، މަރުވެފައިވާ މީހުން އަދި ވޯޓުލުމުގެ ޝަރުތު ހަމަނުވާ މީހުން އުނިކުރުމަށް ކުރާ މަސައްކަތެއް ކަމަށެވެ.

އަދި އަލަށް ވޯޓުލުމުގެ ހައްގު ލިބޭ މީހުންނާއި، ލިސްޓުން އުނިވެފައިވާ މީހުން އަލުން ރަޖިސްޓްރީ ކުރުމަށް ކޮމިޝަނުން ވަނީ ހުކުރު ދުވަހު އޮފިޝަލުންނަށް އަންގާފަ އެވެ.