ކްރިމިނަލް ކޯޓުގެ ގާޒީ ކަމަށް ނުވަ ބޭފުޅަކު ކުރިމަތިލައްވައިފި އެވެ.

ޖުޑީޝަލް ސާވިސް ކޮމިޝަން (ޖޭއެސްސީ) އިން މިއަދު ވަނީ ކްރިމިނަލް ކޯޓުގެ ގާޒީ ކަމަށް ކުރި އިއުލާނާ ގުޅިގެން ކުރިމަތިލީ ފަރާތްތަކުގެ ނަންތައް މިއަދު އެ ކޮމިޝަނުން ވަނީ ހާމަކޮށްފަ އެވެ.

ކްރިމިނަލް ކޯޓުގެ ގާޒީ ކަމަށް ކުރިމަތިލެއްވި ބޭފުޅުން

  • އާދަމް އާރިފް
  • ރަފީއުއްދީން އަހުމަދު
  • އަލީ ނަދީމް
  • އިބްރާހިމް އިހުސާން
  • އަހުމަދު ތައުފީގު
  • އާމިނަތު އަޒްލިފާ
  • އިސްމާއިލް ޝަފީއު
  • ސުލައިމާން މުހައްމަދު
  • މުހައްމަދު ސަމީރު

އެބޭފުޅުންގެ ތެރެއިން އާދަމް އާރިފަކީ މީގެކުރިން ކްރިމިނަލް ކޯޓުގައި މަސައްކަތް ކުރައްވާފައިވާ ގާޒީއެކެވެ. މިހާރު ޑްރަގް ކޯޓުގައި މަސައްކަތް ކުރައްވާ އަރީފަކީ ކްރިމިނަލް ކޯޓު ހިންގުމާ ހަވާލުވެ ހުންނެވި ގާޒީ ކަމުގެ މަގާމް ފުރުއްވާފައިވާ ބޭފުޅެކެވެ.

ބައެއް ކޯޓުތަކުގެ މެޖިސްޓްރޭޓުންނާއި ޕީޖީ އޮފީހުގެ ބައެއް ވަކީލުންނާއި ކުރިން އެ އޮފީހުގައި މަސައްކަތް ކުރެއްވި ބައެއް ވަކީލުން ވެސް އެ ނުވަ ބޭފުޅުންގެ ތެރޭގައި ހިމެނިވަޑައިގަންނަވަ އެވެ.

ޖޭއެސްސީން އިއުލާން ކުރީ ކްރިމިނަލް ކޯޓުން ހުސްވެފައިވާ ދެ ފަނޑިޔާރުގެ މަގާމަށް ބޭފުޅުން ހޯއްދެވުމަށެވެ. އެ ކޯޓުގެ ގާޒީ އިސްމާއީލް ރަޝީދުގެ ސުލޫކީ މައްސަލަ ބަލައި މަގާމުން ވަކިކުރަން އުޅެނިކޮށް އޭނާ ވަނީ އިސްތިއުފާ ދެއްވާފަ އެވެ. އަދި ގާޒީ މުހައްމަދު ސަމީރު ވަނީ އަމިއްލަ އަށް އެދިގެން ޑްރަގް ކޯޓަށް ބަދަލުވެވަޑައިގެންފަ އެވެ.