އިންޑިއާގެ ސިފައިން ގާނޫނާ ހިލާފަށް ރާއްޖޭގައި ތިބުމާ ދެކޮޅަށް ހިންގާ "އިންޑިއާ އައުޓް" ހަރަކާތަކީ ބޭރުގެ އެކި ޑްރަގް ނެޓްވޯކްތަކާ ގުޅިގެން ކުރިއަށްގެންދާ ހަރަކާތެއް ކަމަށް މަޖިލީހުގެ މާފަންނު ދެކުނު ދާއިރާގެ މެމްބަރު އިބްރާހީމް ރަޝީދު (ބޮންޑެ) ތުހުމަތުކޮށްފި އެވެ.

ބޮންޑެ ވިދާޅުވީ އިންޑިއާ އައުޓް ހަރަކާތަކީ ގައުމަށް ނިކަމެތިކަން ލިބޭނެ ފަނާކުރަނިވި ހަރަކާތެއް ކަމަށެވެ. ބޮންޑެ މިހެން ވިދާޅުވީ، އިއްޔެ އިދިކޮޅުން މާލޭގައި ބޭއްވި ސައިކަލު ބުރު ފުލުހުން ހުއްޓުވި ހަބަރު ޓުވީޓްކުރައްވަމުންނެވެ.

"ބިދޭސީ ޑްރަގް ނެޓްވޯކްތަކާ ގުޅިގެން ވެރިކަން ބަދަލުކުރާން ހިންގާ ހަރަކާތަކީ ޑިމޮކްރެޓިކް ހަރަކާތެއްނޫން! ގައުމަށް ނިކަމެތިކަން ލިބޭނެ ފަނާކުރަނިވި ހަރަކާތެއް. އިންޑިޔާ ކަނޑުގައި ޑުރަގް އޮއިވާލި ގިނަކުރަން ފުރުސަތެއް ނުދެވޭނެ! ހުއްޓުވަންޖެހޭ!" އިންޑިއާ ސިފައިން ތިބުމަށް ތާއީދުކުރާ ރައީސް މުހައްމަދު ނަޝީދުގެ ގާތް އެކުވެރިއެއް ކަމަށްވާ ބޮންޑެ ވިދާޅުވި އެވެ.

އިދިކޮޅު ކޯލިޝަނުން އިންޑިއާ ސިފައިން ފޭބުމަށް ގޮވާލައި ސައިކަލު ބުރެއް އިއްޔެ ބާއްވާފައިވާއިރު، ސައިކަލު ބުރުގައި ހަމަނުޖެހުން ހިންގަން އުޅޭކަމުގެ މައުލޫމާތު ލިބިފައިވާ ކަމަށް ބުނެ ފުލުހުން ވަނީ އެހަރަކާތަށް ހުރަސްއަޅާފަ އެވެ. އެހެން ނަމަވެސް އެފަދަ ހަމަނުޖެހުމެއް ހިންގަން ރާވާފައި ނުވާކަން ފާހަގަކޮށް އިދިކޮޅުން ވަނީ ފުލުހުންގެ މި އަމަލު ކުށްވެރިކޮށްފަ އެވެ.