ތެލަގޫ އަދި ތަމަޅަ ފިލްމުތަކުން ގިނަ ބައެއްގެ މަގުބޫލުކަން ހޯދި ކާޖަލް އަގަރްވާލް ބަނޑުބޮޑުކަން ހާމަކޮށްފި އެވެ.

ކާޖަލް އަގަރްވާލާއި، އޭނާގެ ފިރިމީހާ ގޯތަމް ކިޗްލޫ ލޯބީގެ ގޮތުން ގުޅި ކައިވެނިކުރީ 2020 ވަނަ އަހަރު އެވެ. އަދި އެއަށްފަހު ކާޖަލް ބަނޑު ބޮޑު ކަމަށް ސޯޝަލް މީޑިއާގައި އެކި ފަހަރުމަތިން ވާހަކަދެކެވިފައިވެ އެވެ.

އޭގެ ފަހުން އާންމުވެފައިވާ ފޮޓޯތަކުން، ކާޖަލް ބަނޑު ބޮޑު ކަމަށް ދައްކުވައިދޭ ފޮޓޯތަކެއް ވެސް ފޭނުންނަށް މީގެ ކުރިން ފެނިފައިވެ އެވެ.

ނަމަވެސް މިފަހަރު ކާޖަލް ބަނޑުބޮޑުކަން ފޭނުންނަށް ކަށަވަރުކޮށްދީފައި ވަނީ އޭނާގެ ފިރިމީހާ އިންސްޓަގްރާމުގައި ކުރިި ޕޯސްޓަކުންނެވެ.

އެ ޕޯސްޓުގައި ކާޖަލް ރީނދޫކުލައިގެ ހެދުމެއް ލައިގެން އިންނަތަން ފެނިގެންދާއިރު، ޕޯސްޓުގެ ކެޕްޝަންގައި ބަނޑުބޮޑު އަންހެނެއްގެ އިމޯޖީ ބޭނުންކޮށްފައިވެ އެވެ.

މައުލޫމާތު ލިބޭގޮތުގައި ބަނޑުބޮޑުވުމާ ގުޅިގެން ކާޖަލް ވަނީ އޭނާގެ މަސައްކަތްތަކުން ދުވަސްކޮޅަކަށް ޗުއްޓީ ނަގާފަ އެވެ. އަދި މިދުވަސްވަރު އާއިލާއާ އެކީގައި ގިނަ ވަގުތު ހޭދަކޮށް ހެދުމަށް ބޭނުންވާ ކަމަށާއި، ދެން އޭނާ މަސައްކަތް ކުރިއަށް ގެންދާނީ ދަރިފުޅު އުފަންވުމުން ކަމަށް އިންޑިޔާގެ ނޫސްތަކުން ބުނެ އެވެ.