ބޮލީވުޑްގެ އެކްޓަރު ސިދާންތު ކަޕޫރާއި އެކު އިތުރު ހަތަރު މީހަކު މަސްތުވާތަކެތި ބޭނުންކުރި މައްސަލާގައި ހައްޔަރުކޮށްފި އެވެ.

ފުލުހުންނާ ހަވާލާދީ މީޑިއާ ރިޕޯޓްތައް ބުނާ ގޮތުގައި އެމީހުން ހައްޔަރު ކޮށްފައިވަނީ އިންޑިއާގެ ބެންގަލޫރުގައި ހުންނަ ފަސް ތަރީގެ ހޮޓަލެއްގައި މަސްތުވާތަކެތި ބޭނުން ކުރި ކަމުގެ ތުހުމަތުގައި އެވެ.

ފުލުހުން ބުނީ މިޕާޓީ ތެރެއިން 35 މީހަކު ހައްޔަރުކުރި ނަމަވެސް އޭގެ ތެރެއިން މަސްތުވާތަކެއްޗަށް ޕޮޒިޓިވްވެފައިވަނީ ފަސް މީހުން ކަމަށެވެ. އޭގެ ތެރޭގައި ބޮލީވުޑްގެ އެކްޓަރު ޝަކްތީ ކަޕޫރުގެ ދަރިފުޅު ސިދާންތު ކަޕޫރު ހިމެނޭ ކަމަށް ފުލުހުން ބުންޏެވެ.

"ޝޫޓް އައުޓް އެޓް ވަޑާލާ" އަދި "އަގްލީ" ފަދަ ފިލްމުތަކުގައި އެކްޓްކޮށް، "ދޯލް" ފަދަ ފިލްމުތަކުގައި އެސިސްޓެންޓް ޑައިރެކްޓަރެއްގެ ގޮތުގައި މަސައްކަތްކުރި އުމުރުން 37 އަހަރުގެ ސިދާންތުގެ މައްސަލަ ފުލުހުން އަންނަނީ އިތުރަށް ތަހުގީގު ކުރަމުންނެވެ.

ބޮލީވުޑްގެ މަޝްހޫރު ބަތަލާ ޝްރަދާ ކަޕޫރުގެ ބޭބެ ސިދާންތު މަސްތުވާތަކެތީގެ މައްސަލާގައި ހައްޔަރުކޮށްފައިވާއިރު ބޮލީވުޑްގެ ފަންނާނު މަސްތުވާތަކެތި ބޭނުންކުރާ މައްސަލަތަކެއް މީގެ ކުރިން ވަނީ ފެންމަތިވެފަ އެވެ.

މީގެ ކުރިން އެކްޓަރު ސުޝާންތު ސިންގް ރާޖްޕުތުގެ މަރަށް ފަހު، އެކިއެކި ފިލްމީ ތަރިން މަސްތުވާތަކެތި ބޭނުން ކުރާ ކަމުގެ އަޑުތައް ގަދަވުމާ ގުޅިގެން ނާކޮޓިކްސް ކޮންޓްރޯލް ބިއުރޯ (އެންސީބީ) އިން ވަނީ އެ ތަރިންނާ ސުވާލުކޮށްފަ އެވެ.

ބައެއް ފިލްމީތަރިން މަސްތުވާތަކެތި ބޭނުންކުރާކަމަށް 2020 ވަނަ އަހަރުން ފެށިގެން ތުހުމަތުތައް ކުރެވެމުން އަންނަ އިރު ބައެއް އެކްޓަރުން ހައްޔަރު ވެސް ކުރި އެވެ.