ބޮލީވުޑްގެ މަޝްހޫރު ދެ ތަރިން ކަމަށްވާ އާމިރު ޚާނާއި ކަރީނާ ކަޕޫރު ލީޑް ރޯލުން ފެނިގެންދާ "ލާލް ސިންގް ޗައްޑާ" މިމަހުގެ 11 ގައި ސިނަމާތަކުގައި ރިލީޒް ކުރުމަށް ވަނީ ނިންމާފަ އެވެ.

މިފިލްމުގެ ޓްރެއިލާ ބެލުންތެރިންނަށް ދޫކޮށްލާފައިވާއިރު، މިފިލްމު ބޮއިކޮޓްކުރުމަށް ގޮވާލާ ސޯޝަލް މީޑިއާގައި ދަނީ ވަރުގަދަ ކެމްޕޭނެއް ޖައްސަމުންނެވެ.

ސޯޝަލް މީޑިއާގައި #ބޮއިކޮޓްލާލްސޮންގްޗައްޑާ މިހާރު ވަނީ ވަރަށް ބޮޑަށް ވައިރަލްވެފަ އެވެ.

"ލާލް ސިންގް ޗައްޑާ" ބޮއިކޮޓް ކުރުމަށް ގޮވާލާ ކެމްޕޭން ކުރިއަށް ގެންދަނީ އާމިރަކީ ހިންދޫ ދީނަށް ފުރައްސާރަކޮށް، ގައުމިއްތުކަން ވެސް ހުންނަ މީހެއް ކަމަށް ބުނެ އެވެ.

މީގެ ކުރިން ވެސް އާމިރަކީ ހިންދޫ ދީނަށް ޖޯކް ޖަހައި، ފުރައްސާރަކޮށްފައިވާ މީހެއް ކަމަށް ބުނެ އޭނައާ ދެކޮޅަށް އަޑު އުފުލާފައިވެ އެވެ. އެގޮތުން 2014 ގެ "ޕީކޭ" ރިލީޒްކުރި ދުވަސްވަރު އެ މައްސަލަ ވަރަށް ބޮޑުވި އެވެ.

"ލާލު ސިންގް ޗައްޑާ" ބޮއިކޮޓް ކުރުމަށް ގޮވާލާ މައްސަލާގައި ބޮލީވުޑް ހަންގާމާ އަށް ދިން އއިންޓަވިއުއެއްގައި އާމިރު ބުނީ އޭނަ އަކީ އެއްވެސް އިރެއްގައި ހިންދޫ ދީނާ ދެކޮޅު މީހެއް ނޫން ކަމަށާއި އަދި އިންޑިއާ ދެކެ ވަރަށް ލޯބިވާ މީހެއް ކަމަށެވެ.

"ހަގީގަތުގައި އެގޮތަށް ދެކެން ޖެހޭ ސަބަބެއް ނެތް. އަހަންނަކީ އެއްވެސް ދީނަކަށް ނަފުރަތުކުރާ މީހެއް ނޫން. އަދި އަހަންނަކީ އުފަން ގައުމު ދެކެ ވެސް ވަރަށް ލޯބިވާ މީހެއް، އެކަހަލަ ތުހުމަތުތަކެއްކޮށްފައި އަހަރެންގެ ފިލްމު ބޮއިކޮޓްކުރަން ގޮވުމަކީ ވަރަށް ހިތާމަ ވެސް ކުރާ ކަމެއް. އެއީ ވެގެން ވާނެ ގޮތެއް ވެސް ނޫން،" އާމިރު ބުންޏެވެ.

https://www.instagram.com/p/CgtB3Corp0R/?utm_source=ig_embed&ig_rid=09c5cf58-8209-4115-a368-00e3394a1021

އާމިރު ވަނީ އޭނާގެ ފިލްމު ބޮއިކޮޓް ނުކުރުމަށް ވެސް ބެލުންތެރިންގެ ކިބައިން އެދިފަ އެވެ.

އިންޑިއާ ޓުޑޭއާ ވާހަކަ ދައްކަވަމުން، ބޮއިކޮޓާ ބެހޭ ގޮތުން ކަރީނާ ބުނީ ކޮންމެ މީހަކަށް ވެސް އެ މީހެއްގެ ހިޔާލު ފާޅުކުރުމުގެ ހައްގު ލިބިގެންވާ ކަމަށާއި ސޯޝަލް މީޑިއާގެ ސަބަބުން އެންމެން ބޭނުންވާ އެއްޗެއް ބުނަން ފަސޭހަވެގެން ގޮސްފައިވާ ކަމަށެވެ. "ލާލް ސިންގް ޗައްޑާ"އަކީ ރަނގަޅު ފިލްމެއް ކަމަށާއި ފިލްމަށް ކާމިޔާބު ލިބޭނެ ކަމަށް އުއްމީދުކުރާ ކަމަށް ކަރީނާ ބުންޏެވެ.

"އެހެންވީމަ އެއީ. އެއީ ރަނގަޅު ފިލްމެއް ނަމަ، އަޅުގަނޑު ގަބޫލުކުރާ ގޮތުގައި، ކޮންމެ ކަމެއް ވެސް ފަހަނައަޅައި ދާނެ ކަމަށް، ކިތަންމެހާވެސް ބޮޑަށް، ތަރުހީބު ރަނގަޅުވާނެ،" ކަރީނާ ބުންޏެވެ.

https://www.instagram.com/p/CeI5lOeK27l/?hl=en

އަދުވައިތު ޗަންދަން ޑައިރެކްޓްކޮށްފައިވާ "ލާލް ސިންގް ޗައްޑާ" އަކީ ހޮލީވުޑްގެ 1994 ގެ ފިލްމު "ފޮރެސްޓް ގަމްޕް" އަސްލަކަށް ބަލައިގެން ހަދާފައިވާ އެއްޗެކެވެ. އަދި މިއީ 2018 ގެ ބޮޑު ފްލޮޕް "ތަގްސް އޮފް ހިންދުސްތާން" އަށް ފަހު ރިލީޒްވާ އާމިރުގެ ފުރަތަމަ ފިލްމެވެ.

https://www.youtube.com/watch?v=6Tg5BLRmTcg&t=1s