އެމެޒޯންގެ ޕްރައިމް ވީޑިއޯއާ ގުޅިގެން ރޯހިތު ޝެޓީ ގެނެސްދޭ "އިންޑިއަން ޕޮލިސް ފޯސް"ގެ ޝޫޓިންގެ ތެރެއިން އުޅެނިކޮށް ބޮލީވުޑްގެ މަޝްހޫރު ބަތަލާ ޝިލްޕާ ޝެޓީގެ ފައި ބިނދިއްޖެ އެވެ.

މިކަން ހާމަކުރުމުގެ ގޮތުން ޝިލްޕާ ވަނީ ފައިގައި ޕްލާސްޓަރު އަޅައިގެން ހޮސްޕިޓަލްގައި ނަގާފައިވާ ފޮޓޯއެއް އޭނާގެ އިންސްޓަގްރާމްގައި ވަނީ ހިއްސާ ކޮށްފަ އެވެ.

އެ ޕޯސްޓުގައި ޝިލްޕާ ބުނެފައި ވަނީ އޭނާގެ ހާލު ރަނގަޅު ކަމަށާއި ފައި ބިނދުމުގެ ސަބަބުން ކުރިއަށް އޮތް ހަ ވަރަކަށް ހަފްތާއަށް އޭނާ ކުރަމުން އަންނަ މަސައްކަތްތަކުން ދުރުގައި އުޅޭނެ ކަމަށެވެ.

ޝިލްޕާ ބުނެފައި ވަނީ އޭނާ އެނބުރި އަންނަނީ ވަރުގަދަކޮށް ކަމަށެވެ. އަދި އެ ދުވަސް އަންނަން ދެން އޭނާ އަވަހަށް ރަނގަޅުވާނެހެން އެންމެން ވެސް ދުއާ ކޮށްދިނުމަށް ޝިލްޕާ ވަނީ އެދިފަ އެވެ. ފައި ބިނދައިގެން ދިޔަކަން އުމުރުން 47 އަހަރުގެ ޝިލްޕާ ހާމަކުރި ނަމަވެސް ފައި ބިނދައިގެން ދިޔަ ސަބަބެއް ހާމަކޮށްފައި ނުވެ އެވެ.

https://www.instagram.com/p/ChEvWJ1r2Dj/

"އިންޑިއަން ޕޮލިސް ފޯސް" ގައި ޝިލްޕާ އަދާކުރަނީ ފުލުހެއްގެ ރޯލެވެ. އެހެންވެ މިއީ އޭނަގެ ވަރުގަދަ އެކްޝަން މަންޒަރުތަކާއި ސްޓަންޓްތަކެއް ވެސް ހަދަން ޖެހޭ ވެބް ސީރީޒެކެވެ.

މި ވެބް ސީރީޒްގެ އިތުރު ތަރިންގެ ތެރޭގައި ސިދާތު މަލްހޯތުރާ، ވިވެކް އޮބެރޯއީ އަދި އިޝާ ތަލްވާރު ވެސް ހިމެނެ އެވެ.

އެންމެ ފަހުން ޝިލްޕާ ފެނިގެން ގޮސްފައި ވަނީ "ނިކައްމާ" އިންނެވެ.

ޝިލްޕާއަކީ ބައެއް ރިއަލިޓީ ޝޯތަކުގައި ޖަޖެއްގެ ގޮތުގައި ހަރަކާތެރިވެފައިވާ ފަރާތެކެވެ. އަދި މީގެ އިތުރުން ޝިލްޕާ މިހާރު އަންނަނީ މިއަހަރު ނެރުމަށް ހަމަޖެހިފައިވާ "ސުކީ" ފިލްމުގައި މަސައްކަތް ވެސް ކުރަމުންނެވެ.