ބޮލީވުޑްގެ މަޝްހޫރު ބަތަލާ ސޯނަމް ކަޕޫރާ އާއި އޭނާގެ ފިރިމީހާ އަނަންދު އަހޫޖާއަށް ފުރަތަމަ ދަރިފުޅު ލިބުނީ މިމަހުގެ 20 ވަނަ ދުވަހު އެވެ. އެ މީހުންނަށް ފިރިހެން ކުއްޖެއް ލިބުނުކަން ފިޔަވައި މިހާތަނަށް އައިރު އެކުއްޖާގެ އެންމެވެސް ފޮޓޯއެއް މީޑިއާގައި އަދި އާންމުވެފައިނުވެ އެވެ. އަދި އެކުއްޖާއަށް ކިޔާ ނަންވެސް އާންމުކޮށްފައިނުވެ އެވެ.

މިއީ މަޝްހޫރު އެކްޓަރު އަނިލް ކަޕޫރުގެ ފުރަތަމަ ކާފަ ދަރަފުޅެވެ. އެކުއްޖާއަށް މަރުހަބާ ކިއުމުގެ ގޮތުން ގޭތެރެ ވަނީ ޒީނަތްތެރި ކޮށްފަ އެވެ.

އެކުއްޖާއަށް ލޯބިން އެ އާއިލާއިން ސިމްބާ ކިޔާކަން ސޯނަމްގެ ކޮއްކޮ ރިއާ ކަޕުރޫ އިންސްޓްގްރާމްގައި ކުރި ޕޯސްޓެއްގައި ވަނީ ހާމަކޮށްފަ އެވެ. އަދި ކުއްޖާއަށް މަރުހަބާ ކިއުމަށް ގޭތެރެ ޒީނަތްތެރި ކޮށްފައިވާ ގޮތުގެ ބައެއް ފޮޓޯ ވެސް ރިއާ ވަނީ ހިއްސާ ކޮށްފަ އެވެ.

ސޯނަމް އާއި އާނަންދު ކައިވެނި ކުރީ 2018 އެވެ.

ވިހެއުމުގެ ކުރިން ސޯނަމް ބުނެފައިވަނީ ދަރިފުޅު އިންޑިއާގައި ބޮޑު ކުރުމުގެ ވިސްނުމެއް ނުގެންގުޅޭ ކަމަށެވެ.

ސޯނަމް ބުނީ ދަރިފުޅު ބޮޑުވެގެން އަންނަން ބޭނުން ވަނީ އޭނާ އާއި ކޮއްކޮ ރިއާ އާއި، ހަރްޝްވަރްދަން ކަޕޫރު ބޮޑުވެގެން އައި ގޮތަށް ކަމަށެވެ. އެމީހުން ބޮޑެތިވީ އާންމުންގެ ތެރޭގައި އުޅެ މަޖާކޮށް މަޝްހޫރު ނޫން އެކުވެރިންނާއި އެކު މަގުމަތީގައިވެސް ގިނަ ވަގުތައް ހޭދަ ކޮށްގެންނެވެ.

އެ ތިން ކުދިން ނޫސްވެރިންނާއި އާންމުންނަށް އަނިލް ކަޕޫރުގެ ދަރިންގެ ގޮތުގައި އެނގުނީ ބޮޑުވި ފަހުންނެވެ. އިންޑިއާގައި ތިން ދަރިން ބޮޑު ކުރި ނަމަވެސް އަނިލް ކަޕޫރު އެ ކުދިންނާއި އެކު މީޑިއާ ކުރިމައްޗަށް ނުކުމެފައި ނުވާއިރު ތައުލީމް ފޯރުކޮށްދިނީ މަޝްހޫރު ނޫން ސްކޫލްތަކާއި ޔުނިވާސިޓީތަކާއި ކޮލެޖުތަކުންނެވެ.

އެ ތަންތަނުން އެއްވެސް މަޝްހޫރު މީހެއްގެ ދަރިއަކު ކިޔަވާފައެއް ނުވެ އެވެ. އަދި ކޮލެޖު ދުވަސްވަރު ގޭޓު ކައިރިން ކާރަށް އެރުމަކީވެސް އެ ތިން މީހުން ކުރިކަމެއް ނޫން ކަމަށްވެ އެވެ.