ބޮލީވުޑްގެ މަޝްހޫރު ބަތަލާ ސޯނަމް ކަޕޫރާ އާއި އޭނާގެ ފިރިމީހާ އަނަންދު އަހޫޖާއަށް ފުރަތަމަ ދަރިފުޅު ލިބުނީ މިއަހަރުގެ ސެޕްޓެމްބަރު މަހުގެ 20 ވަނަ ދުވަހު އެވެ.

އަލަތު ދަރިފުޅު ވިހެއުމަށް ފަހު ދެ މަސް ފަހުން ސޯނަމް ކަޕޫރު މިވަނީ އޭނާގެ ހަށިގަނޑު ކުރީގައި ހުރި ވަރަށް ބެހެއްޓުމަށްޓަކައި މަސައްކަތް ފަށާފަ އެވެ. އެގޮތުން މިހާރު ފިޓްވުމަށްޓަކައި ސޯނަމް އަންނަނީ ޖިމަށް ގަވައިދުން ދަމުންނެވެ.

ސޯނަމް ވަނީ އޭނާގެ ސޯޝަލް މީޑިއާގައި ޖިމްގައި ކަސްރަތު ކުރާ ވީޑިއޯއެއް ހިއްސާ ކޮށްފަ އެވެ. މި ވީޑިއޯއާއެކު ސޯނަމްގެ ހިތްވަރަށް ސާބަސްދީ ފިރިމީހާ އާނަންދު އަހޫޖާ އާއި ކޮއްކޮ ރެއާ ކަޕޫރުގެ އިތުރުން ބައްޕަ އަނިލް ކަޕޫރު ވެސް ވަނީ އެ ވީޑިއޯއަށް ކޮމެންޓު ކޮށްފަ އެވެ.

ވިހެއުމަށް ފަހު ދަރިފުޅާ އެކު ހޭދަކުރާ ދިރިއުޅުމުގެ ބައެއް މަންޒަރުތައް ސޯނަމް އޭނާފެ ސޯޝަލް މީޑިއާ މެދުވެރިކޮށް ދަނީ ހިއްސާ ކުރަމުންނެވެ.

އެ ދެމަފިރިންގެ ތުއްތު ދަރިފުޅުގެ ފޮޓޯއެއް ރަސްމީކޮށް އާންމުކޮށްފައި ނުވާއިރު، މީގެ ހަފްތާތަކެއް ކުރިން އެ ދެމަފިރިން ވަނީ "ވާޔޫ" ނަމުގެ މާނަ ވެސް ވަނީ ހިއްސާކޮށްފަ އެވެ.

ސޯނަމް އާއި އާނަންދު ކައިވެނި ކުރީ 2018 ވަނަ އަހަރު އެވެ.

ސާވަރިޔާ އިން ބޮލީވުޑަށް ތައާރަފުވި ސޯނަމް އެންމެ ފަހުން ފެނުނީ 2019 ވަނަ އަހަރު ނެރުނު ފިލްމު ޒޯޔާ ފެކްޓާ އިންނެވެ.

އޭނާގެ ކުރިއަށް އޮތް މަސައްކަތަކީ 2011 ވަނަ އަހަރު ރިލީޒް ކުރި ކޮރެއަން ފިލްމު "ބްލައިންޑް"ގެ ހިންދީ ރީމޭކުގެ މަސައްކަތެވެ.