އިންޑިއާގެ އެހީގައި މަރާމާތުކުރަމުން އަންނަ އޮލިމްޕަސް ސިނަމާގެ މަސައްކަތް ނިމިފައިނުވާތީ ފިލްމީ ތަރި އަލީ ސީޒަން ކަންބޮޑުވުން ފާޅުކޮށްފި އެވެ.

ކޮވިޑްގެ ބަލިމަޑުކަމާ ގުޅިގެން 2020 ވަނަ އަހަރު އެ ސިނަމާ ބަންދުކުރި ގޮތަށް އެ ތަން އަލުން ނުހުޅުވަ އެވެ. ދިވެހި ފިލްމު އަޅުވަން ހާއްސަ ކޮށްފައިވާ ހަމައެކަނި ސިނަމާ ނުހުޅުވައި ލަސްވާތީ ދިވެހި ފިލްމީ ދާއިރާގައި މަސައްކަތްކުރާ މީހުންގެ ޝަކުވާ ބޮޑެވެ.

މަޝްހޫރު ފިލްމީ ތަރި އަލީ ސީޒަން މިކަމާ ގުޅިގެން ޓިކްޓޮކްގައި އާންމުކޮށްފައިވާ ވީޑިއޯގައި ބުނެފައި ވަނީ އޮލިމްޕަސް ބަންދުކޮށް އެތަނުގެ މަރާމާތުގެ މަސައްކަތް ނުނިމި މިހާރު ތިން އަހަރު ވެގެންދާއިރު އެތަން އަދިވެސް އޮތީ ގޮނޑެއްހެން ކަމަށެވެ. އެތަނުގެ އެއްވެސްކަމެއް ނުނިމޭ ކަމަށް އޭނާ ބުންޏެވެ.

"ތިއޭޓަރެއް ބަޔަކު ހަދަނީއެއް ނޫނޭ. ބަޔަކު ހަދާފައި ހިންގަ ހިންގަހުރި ތިއޭޓަރެއް އެ މީހުން ރެނޮވޭޝަން ހަދަން ތިން އަހަރު ވެެގެން ދިޔައީ. ދިޔައިރު މިއޮތީ އޮތް ގޮތް. ތަަރައްގީގެ އެކި މަސައްކަތްތައް ބައިވަރު ސަރުކާރުން އެބައޮތް ކޮށްފައި. ކަންކަން އެ ކުރަނީ ކުރެވޭ ވަރުގެ މީހުންނޭ،" ސީޒަން ބުންޏެވެ.

އޮލިމްޕަސް ނުހުޅުވި ލަސްވާ މައްސަލާގައި އާޓްސް މިނިސްޓަރު ޔުމްނާ މައުމޫން މިދިޔަ ސެޕްޓެމްބަރު މަހު މަޖިލީހަށް ލިޔުމުން ފޮނުއްވި ޖަވާބުގައި ވިދާޅުވެފައި ވަނީ މަރާމާތުތައް ވަރަށް ބާރަށް ކުރިއަށްދާ ކަމަށެވެ. އަދި މި އަހަރު ނިމުމުގެ ކުރިން އެތަން ހުޅުވާނެ ކަމަށް އޭނާ ވިދާޅުވި އެވެ. ކުރިން ސެޕްޓެމްބަރު މަހުގެ ތެރޭގައި އޮލިމްޕަސް ހުޅުވަފާނެކަމުގެ އިޝާރާތެއް ދިނެވެ.

އެހެންނަމަވެސް މިއަދާ ހަމައަށް އައިރު އެތަނުގައި އެއްވެސް މަސައްކަތެއް ކޮށްފައިނުވާ ކަމަށް ފިލްމީ ދާއިރާގައި ހަރަކާތްތެރިވާ ފަންނާނުން ބުނެ އެވެ.