ބޮލީވުޑްގެ މަޝްހޫރު ބަތަލާ ސޯނަމް ކަޕޫރާ އާއި އޭނާގެ ފިރިމީހާ އަނަންދު އަހޫޖާއަށް ފުރަތަމަ ދަރިފުޅު ލިބުނީ މިދިޔަ އޮގަސްޓް މަހުގެ 20 ވަނަ ދުވަހު އެވެ. އެ މީހުންގެ ދަރިފުޅަށް ދީފައިވަނީ ވާޔޫ ކަޕޫރު އަހޫޖާ އެވެ.

ސޯނަމް ވަނީ މިފަހުން ދިއްލީގައި އޮތް އިވެންޓަކަށް އާނަންދާ އެކު ގޮސްފަ އެވެ. މިއީ ވިހެއުމަށް ފަހު ސޯނަމް ޕަބްލިކް އިވެންޓަކުން ފެނުނު ފުރަތަމަ ފަހަރެވެ.

އިވެންޓުގެ ތެރެއިން ސޯނަމް ނަގާފައިވާ ފޮޓޯތައް އާންމު ކުރުމުން އާނަންދަށް ވެސް ވަނީ ހައިރާންކަން ލިބިފަ އެވެ.

ވިހެއުމަށްފަހު ތިން މަސް ދުވަހުގެ ތެރޭގައި ސޯނަމްގެ ހަށިގަނޑަށް ގެނެސްފައިވާ ބަދަލު ފެނި ގިނަ ބަޔަކަށް ވަނީ ޝޮކެއް ލިބިފަ އެވެ.

ސޯނަމް ވަނީ ވިހޭތާ 60 ދުވަސް ނުވަނީސް ޖިމަށް ދާން ފަށައިފަ އެވެ. ވިހެއުމަށް ފަހު ދަރިފުޅާ އެކު ހޭދަކުރާ ދިރިއުޅުމުގެ ބައެއް މަންޒަރުތައް ސޯނަމް ސޯޝަލް މީޑިއާގައި އަންނަނީ އާއްމުކުރަމުންނެވެ.

"ސާވަރިޔާ" އިން ބޮލީވުޑަށް ތައާރަފުވި ސޯނަމް އެންމެ ފަހުން ފެނުނީ 2019 ވަނަ އަހަރު ނެރުނު ފިލްމު "ޒޯޔާ ފެކްޓާ" އިންނެވެ.

އޭނާގެ ކުރިއަށް އޮތް މަސައްކަތަކީ 2011 ވަނަ އަހަރު ރިލީޒް ކުރި ކޮރެއަން ފިލްމު "ބްލައިންޑް"ގެ ހިންދީ ރީމޭކެވެ. އެ ފިލްމު ނެރޭނީ ހަމަ އެ ނަމުގަ އެވެ.

ސޯނަމް އާއި ވިޔަފާރިވެރިޔާ އާނަންދު ކައިވެނިކޮށްފައި ވަނީ 2018 ވަނަ އަހަރުގެ މެއި މަހުގެ އަށްވަނަ ދުވަހު އެވެ.