ރައްޔިތުންގެ މަޖިލީހުގައި ރައީސް އިބްރާހިމް މުހައްމަދު ސޯލިހު މިއަދު ރިޔާސީ ބަޔާން އިއްވުމަށް ހުރަސް އެޅި އިދިކޮޅު ޕީޕީއެމްގެ މަޖިލިސް މެމްބަރުން މަޖިލީހުން ނެރުމަށް އަންހެން ސިފައިން ނެރުމުން އާންމުން ފާޑުކިޔައިފި އެވެ.

މިކަމާ ގުޅޭގޮތުން ގިނަ ބަޔަކު ސޯޝަލް މިޑިއާގައި ފާޑުކިޔައި ވީޑިއޯތައް އާންމުކުރަމުންދާއިރު، ސަރުކާރަށް ތާއީދުކުރާ އަދާލަތު ޕާޓީގެ ދެ އިލްމުވެރިން ކަމަށްވާ ޝެއިޚް އަލީ ޒައީދް އާއި ޑރ. މުހައްމަދު އިޔާޒު ވެސް ވަނީ މިކަމަށް ވަރަށް ބޮޑަށް ފާޑުކިޔާފަ އެވެ.

އެގޮތުން ޑރ. އިޔާޒް މިކަން ސިފަކޮށްފައި ވަނީ ޖިންސީ ފުރައްސާރައިގެ އަމަލެއް ކަމަށެވެ.

ޑރ. އިޔާޒް ވިދާޅުވީ އަންހެނުންގެ ކަރާމާތް ގެއްލުވާލައި، ބާޒާރުގައި ވިއްކަން ހުންނަ މުދާ އިޝްތިހާރުކުރާ ނުވަތަ ކަސްޓަމަރުން ހިތްހަމަޖައްސުވަން ބޭނުންކުރާ ހަތިޔާރަކަށް އަންހެންކަނބަލުން ހެދުން ހުއްޓާލަންޖެހޭ ކަމަށެވެ.

އޭގެ އިތުރުން މިކަމާ ގުޅިގެން ދީނީ އިލްމުވެރިޔާ ޒިޔާދު ފާޑުކިޔާފައިވާއިރު، އަންހެނުންނަކީ ދަށު ދަރަޖައިގެ މީހުންގެ ގޮތުގައި ނުދެއްކުމަށް ޒައިދު ވަނީ ގޮވާލައްވާފަ އެވެ.

"ދިވެހި އަންހެން ކަނބަލުންނަކީ އެއްވެސް އަގެއްނެތް ޗީޕް ބައެއްގެގޮތުގައި ނުދެއްކުމަށް ބޮޑެތިފިރިހެނުން ހައްޔަރުކުރަން އަންހެން ބޭފުޅުން ފޮނުވި ފަރާތްތަކަށް ގޮވާލަން! ކަނބަލުން ރައްކާތެރިވާންޖެހޭ ޢައުރަތަކާއި ފިރިހެނުން ރައްކާތެރިވަންޖެހޭ ޢައުރަ އަޅައިކިޔސް ހަމަހަމަ ނޫންކަންސާފު!" ޒައިދު ވިދާޅުވެފައިވެ އެވެ.

މެމްބަރުން އަޑުގަދަކުރައްވަން ފެއްޓެވުމުން މަޖިލިސް މެދުކަނޑާލި އެވެ. އަދި އަލުން މަޖްލިސް ފެށީ އަޑުގަދަކުރި އިދިކޮޅު މެމްބަރުތައް ގަދަބާރުން މަޖިލީހުގެ ތަޅުމުން ބޭރުކުރުމަށްފަހު އެވެ.

ރިޔާސީ ބަޔާން އިއްވިއިރު އިދިކޮޅުން މަޖިލިސް ސަރަހައްދުގައި މުޒާހަރާ ކުރި އެވެ. އެ މުޒާހަރާއިން ގިނަ އަދަދެއްގެ ބަޔަކު ހައްޔަރުކުރި އެވެ.