އުރްފީ ޖާވޭދްއަކީ އިންޑިއާގެ ނޫސްތަކާއި، އެކި ހަބަރުތަކުގެ ސުރުހީގައި ފަހަކަށް އައިސް ވަރަށް ގިނައިން ފެންނަ ނަމެކެވެ.

އުރްފީއާ ގުޅިގެން އެންމެ ގިނައިން ދެކެވޭ ވާހަކައަކީ އޭނާ ހެދުން އެޅުމުގައި ބަހައްޓާ ވައްޓަފާޅިއާ ގުޅިގެން ދެކެވޭ ވާހަކަތަކެވެ. އެކަމުގެ ސަބަބުން އޭނާއަށް އާންމުންގެ ތެރޭގައި ބޮޑު މަޝްހޫރުކަމެއް ލިބިފައިވާއިރު، އުރްފީއަށް މަލާމާތްކޮށް، ފާޑުކިޔާ މީހުން ވެސް މަދެއް ނޫނެވެ.

އެހެންނަމަވެސް އުރްފީގެ މަސައްކަތަށް އެންމެ ބޮޑު ތަރުހީބެއް ލިބިފައިވަނީ ބޮލީވުޑް ފިލްމު އިންޑަސްޓްރީންނެވެ.

ބޮލީވުޑްގައި މަސައްކަތް ކުރާ އެކި ތަރިންގެ ފަރާތުން އުރްފީއަށް ތައުރީފުގެ ބަސްތައް ކިޔާފައިވާއިރު، އުރްފީގެ އެކި ސްޓައިލްތަކަކީ ތަރިންގެ ހެދުން އެޅުމުގައި ނަގާ މިސާލަކަށް ވަނީ ވެފަ އެވެ.

އެގޮތުން ބޮލީވުޑްގައި ފުންނާބު އުސް ތަރިން ކަމުގައިވާ ކަރީނާ ކަޕޫރް އާއި ރަންވީރު ކަޕޫރުގެ އިތުރުން ސަނީ ލިއޯން އާއި ކަންގަނާ ރަނާއުތް އަދި ޔޯޔޯ ހަނީ ސިންގް ފަދަ ތަރިން ވަނީ އުރްފީގެ ހެދުން އެޅުމުގެ ސްޓައިލަށް ތައުރީފު ކޮށްފަ އެވެ.

ގިނަ ތަރިން ބުނާގޮތުގައި އެފަދަ ސްޓައިލެއްގައި އާންމުންގެ ތެރެއަށް ނިކުންނަށް ކެރުމަކީ ވަރަށް ހިތްވަރު ބޭނުންވާނެ ކަމެކެވެ. އަދި ކެރިއަރުގައި ކުރިއަށްދިއުމަށް ތަރިން އުރްފީއަށް ގޮވާލާފައިވެ އެވެ.

އުރްފީއަށް އޭނާގެ އުފެއްދުންތައް އާންމުންނަށް ދައްކައިލަނީ އަމިއްލައަށް އެ ހެދުން ލައިގެންނެވެ. އޭގެ ސަބަބުން ދުނިޔޭގެ ނަން މަޝްހޫރު ފެޝަން ޑިޒައިން ކުންފުނިތަކުގެ ނަޒަރު އުރްފީއަށް ހުއްޓުނު ނަމަވެސް އިންޑިއާގެ އާންމުން އުރްފީގެ ސްޓައިލް ސިފަކުރަނީ ޖޯކަރެއްގެ ގޮތުގަ އެވެ.