މަޝްހޫރު އިނގިރޭސި ފިލްމު ސީރީޒް "ހެރީ ޕޮޓާ"ގެ ބަތަލުގެ ރޯލުން ފެނިގެން ދިޔަ ޑެނިއަލް ރެޑްކްލިފްއާއި އޭނާގެ ބައިވެރިޔާ އެރީން ޑާކްއަށް ދަރިއަކު ލިބިއްޖެ އެވެ.

ޑެނިއަލް އާއި އޭނާގެ ލޯބިވެރިޔާއަށް ދަރިއަކު ލިބޭކަން ހާމަކޮށްފައި ވަނީ މާޗް މަހުގެ 25 ވަނަ ދުވަހު އެވެ.

އެ ދެމީހުންގެ ފޮޓޯތައް ސޯޝަލް މީޑިއާގައި މީގެ ކުރިން ވެސް ދައުރުވެފައިވާއިރު، އެ ފޮޓޯތަކާއި ގުޅިގެން ޑެނިއެލްގެ ސަޕޯޓަރުން ވަނީ ސޯޝަލްމީޑިއާގައި އުފާ ފާޅުކޮށްފަ އެވެ. އެއާއެކު އެ ދެތަރިންނަށް މަރުހަބާ ކިޔަން ވެސް ގިނަ ބަޔަކު ޓުވީޓް ކުރި އެވެ.

އެހެންނަމަވެސް ދެތަރިންނަށް ލިބުނު ދަރިފުޅުގެ ޖިންސު މިހާތަނަށް ހާމަކޮށްފައެއް ނުވެ އެވެ.

އުމުރުން 33 އަހަރުގެ ޑެނިއަލް އާއި 38 އަހަރުގެ އެރީން އެންމެ ފުރަތަމަ ބައްދަލުވީ 2013 ވަނަ އަހަރު ނުކުތް "ކިލް ޔޯ ޑާލިންގްސް"ގެ ސެޓުންނެވެ.

ހެރީ ޕޮޓާއަކީ 2000ގެ ކުރީކޮޅު ބޮޑު މީހުންނާއި ކުޑަކުދިންގެ މެދުގައި ވެސް މަގުބޫލުކަން ހޯދި ފިލްމުތަކެކެވެ. އޭގައި ޑެނިއަލް ފެނިގެންދަނީ ވިޒާޑްއެއްގެ ރޯލުންނެވެ.