ގއ. ދެއްވަދޫން ކޮވިޑް-19 އަށް ޕޮޒިޓިވްވެފައިވާ މީހުނާ ގުޅުން އޮތް ބަޔަކު، އެ އަތޮޅުގެ ވިލިނގިލިންނާއި ދާންދުއިން އެ ބައްޔަށް ޕޮޒިޓިވް ވެގެން، އެ ދެ ރަށް މިހާރު މޮނިޓަރިންގެ ހާލަތަށް ގެންގޮސްފައިވާ ކަމަށް ހެލްތު އެމާޖެންސީ އޮޕަރޭޝަން ސެންޓަރު (އެޗްއީއޯސީ) އިން މިއަދު ބުނެފި އެވެ.

ދެއްވަދޫން ފުރަތަމަ ކޮވިޑް ކޭހެއް ރިޕޯޓް ކުރީ މިދިޔަ މަހުގެ 24 ވަނަ ދުވަހު އެވެ. އެ ދުވަހު ޕޮޒިޓިވްވީ އެރަށުގައި ހޯމް ކަރަންޓީގައި ހުރި މީހެކެވެ.

އޭގެ ފަހުން، އެ ރަށުގެ ކްލަސްޓާއާ ގުޅުންހުރި 30 އަށް ވުރެ ގިނަ މީހަކު މިހާތަނަށް ވަނީ ކޮވިޑަށް ޕޮޒިޓިވްވެފައި ވެ އެވެ. އެއީ ސީދާ ދެއްވަދޫއިން ޕޮޒިޓިވްވި ބަޔަކާއެކު އެރަށުން ލ. ފޮނަދޫއަށް ދިޔަ ހަތަރު މީހަކާއި ހުޅުމާލޭއިން ދެ މީހެކެވެ. އެ ކްލަސްޓާއާ ގުޅުންހުރި ކޭސްތަކެއް ގަމާއި ފޮނަދޫ ވެސް ވަނީ މޮނިޓަރިންގެ ހާލަތަށް ގެނެސްފަ އެވެ.

އެޗްއީއޯސީން މިއަދު ބުނީ ވިލިނގިއްޔާއި ދާންދޫ މޮނިޓަރިންއަށް ލާފައި ވަނީ ގއ. ދެއްވަދޫގެ ކްލަސްޓާއާ ގުޅޭ ކޭސްތަކެއް ފެނިގެން ކަމަށެވެ. މިގޮތުން މިހާތަނަށް ދާންދޫން ދެ މީހަކު ޕޮޒިޓިވްވެފައިވާއިރު ވިލިނގިލިން އެކަކު ޕޮޒިޓިވްވެފައިވާ ކަމަށް އެ ސެންޓަރުން ބުންޏެވެ.

އަލަށް ކޭސްތައް ފެނުނު ރަށްތަކުގައިވެސް ކޮންޓެކްޓް ޓްރޭސިން ހެދުމުގެ މަސައްކަތް ކުރަމުން އަންނަ ކަމަށް ވެސް އެޗްއީއޯސީން ބުންޏެވެ.

ވިލިނގިލީގައި ހުންނަ އެއަތޮޅު ތައުލީމީ މަރުކަޒުގެ ދަރިވަރަކު ކޮވިޑަށް ޕޮޒިޓިވް ވެގެން އެ ސްކޫލް މިއަދުން ފެށިގެން ވަނީ ބަންދުކޮށްފަ އެވެ.

އެ ސްކޫލުން ވާހަކަދެއްކެވި އޮފިޝަލަކު ވިދާޅުވީ ޕޮޒިޓިވްވެފައި ވަނީ ގްރޭޑް 12ގައި ކިޔަވާ އެ އަތޮޅު ދާންދޫގެ ދަރިވަރެއް ކަމަށެވެ. އަދި މިދަރިވަރަކީ ދެއްވަދޫން ޕޮޒިޓިވްވި މީހުންނާ ދިމާވެފައިވާ ކުއްޖެއް ކަމަށް ވެސް އެ ސްކޫލުން ބުންޏެވެ.

އޮފިޝަލް ވިދާޅުވީ، ދަރިވަރު ޕޮޒިޓިވްވިކަން އެނގުނީ އާދީއްތަ ދުވަހު ދަރިވަރު ސްކޫލަށް ދިޔައިރު، އަލާމާތްތައް ހުރެގެން ޓެސްޓުކުރުމުން ކަމަށެވެ. އަދި މިހާރު ދަރިވަރާ ކޮންޓެކްޓްވި ފަރާތްތައް ދެނެގަނެވިފައިވާ ކަމަށް ވެސް އެ ސްކޫލުން ބުންޏެވެ.