މާލެ އާއި ހުޅުމާލެއާ ދޭތެރޭގައި އޮންނަ ހައިވޭގައި ހަރުކޮށްފައިވާ ސޯލާ ޕެނަލްތައް ހުރުމުން ހާސްކަން ބޮޑުވެފައިވާ ކަމަށާއި އެ ތަނުން ސޯލާ ޕެނަލްތައް ނަގާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ހުޅުމާލެ ފުރަތަމަ ފިޔަވަހީގައި ދިރިއުޅޭ ރައްޔިތުންނާ ބައްދަލު ކުރުމަށް ސެންޓްރަލް ޕާކްގައި އޮތް ބައްދަލުވުމުގައި މުއިއްޒު ވިދާޅުވީ މާލެ އިން ހުޅުމާލެ އަށް އަންނަ އިރު ހައިވޭ ފެންނަނީ ވަރަށް ހާސްކަން ބޮޑު ތަނެއްގެ ގޮތުގައި ކަމަށެވެ. ސޯލާ ޕެނަލްތަކާ ހެދި، މޫދު ފެންނަ ހިތްގައިމު މަންޒަރު ބަދަލުވެފައިވާ ކަމަށް ވެސް މުއިއްޒު ވިދާޅުވި އެވެ.

"އިއާދަ ކުރުވަނިވި ހަކަތައަކީ މުހިންމު ކަމެއް. އަޅުގަނޑުމެންގެ ސިޔާސަތުގެ ތެރޭގައި ވެސް ވަރަށް މުހިންމު ކަމެއް ދޭނެ ކަމެއް. ތިމާވެއްޓަށް ހިދުމަތް ކުރުމަކީ އަޅުގަނޑުމެންގެ ހަމަ މުހިންމު ސިޔާސަތެއް،" މުއިއްޒު ވިދާޅުވި އެވެ.

ނަމަވެސް ކޮންމެ ކަމެއް ކުރުމުގައި ރަނގަޅު ގޮތް އޮންނަ ފަދައިން، އެކަން ކުރުމުގައި ވެސް ރަނގަޅު ގޮތް އޮންނާނެ ކަމަށް މުއިއްޒު ވިދާޅުވި އެވެ. އެގޮތުން، ހައިވޭގައި ހުރި ސޯލާ ޕެނަލްތައް ނަގައި ރާއްޖޭގެ މީހުން ދިރިއުޅޭ އެއް ރަށް ނުވަތަ ދެ ރަށުގައި ސޯލާ ޕެނަލްތައް ހަރު ކުރަން ނިންމާފައިވާ ކަމަށް ވެސް އެމަނިކުފާނު ވިދާޅުވި އެވެ.

"އެއްކޮށް ސޯލާ ޕަވާ އިން ހިންގޭ ގޮތަށް އެ ތަކެތި ގެންގޮސް، އެ ކަމަށް ފަންޑު ކުރި ފަރާތާ ވެސް މަޝްވަރާކޮށްގެން ނަގައިގެން ގެންގޮސް އެއް ރަށް ނޫނީ ދެ ރަށް އެއްކޮށް ސޯލާ ޕަވާ އިން ހިންގަން (ބޭނުން ވަނީ)،" މުއިއްޒު ވިދާޅުވި އެވެ.

މި ސޯލާޕެނަލް ސްޓްރަކްޗާއަކީ ވޯލްޑް ބޭންކުގެ އެހީގައި ހުޅުމާލެ-މާލެ ހައިވޭ ސަރަހައްދުގައި ކުރިއަށް ގެންދާ "އެކްސެލެރޭޓިން ސަސްޓެއިނަބަލް ޕްރައިވެޓް އިންވެސްޓްމަންޓް އިން ރިނިއުބަލް އެނާޖީ" (އެސްޕަޔާ) ގެ ދަށުން ސޯލާ ޕެނަލް ހަރުކުރުމަށް ތައްޔާރުކޮށްފައިވާ ސްޓްރަކްޗާއެކެވެ.

މާލެ، ހުޅުލެ އަދި ހުޅުމާލެ ގުޅުވައިދޭ ލިންކު ރޯޑު ނުވަތަ ހައިވޭގައި 5.6 މެގަވޮޓްގެ ސޯލާ ހަކަތައިގެ ނިޒާމު ގާއިމު ކުރަނީ ތައިލެންޑުގެ އެންސިސް ކޯ ލިމިޓެޑް ކުންފުންޏާ ހަވާލުކޮށްގެންނެވެ. އެ ކުންފުންޏާ މި މަސައްކަތް ހަވާލުކުރީ ނޮވެމްބަރު 2020 ގަ އެވެ. އަދި އަމަލީ މަސައްކަތް ފެށީ މިދިޔަ އަހަރު ޑިސެމްބަރުގަ އެވެ.