އިންޑިއާ އިން ވަގުތީ ގޮތުން ފިޔާ އެކްސްޕޯޓް ކުރުން މަނާކޮށްފި އެވެ.

އަވަށްޓެރި އިންޑިއާ އިން އަންނަ މާޗް މަހާ ހަމައަށް ފިޔާ އެކްސްޕޯޓް ކުރުން މަނާ ކުރި އިރު، ރާއްޖެ އަށް އެންމެ ގިނަ އިން ފިޔާ އެކްސްޕޯޓް ކުރަމުން އަންނަނީ އިންޑިއާ އިންނެވެ.

އިންޑިއާގެ ޑިރެކްޓަރު ޖެނެރަލް އޮފް ފޮރިން ޓްރޭޑް (ޑީޖީއެފްޓީ) އިން ބުނި ގޮތުގައި އިންޑިއާ އިން ވަގުތީ ގޮތުން ފިޔާ އެކްސްޕޯޓް ކުރުން މަނާ ކުރީ އަންނަ އަހަރު އޮންނަ ލޮކް ސަބާ އިންތިހާބާ ގުޅިގެން އިންފްލޭޝަން ދަށްކުރުމަށް އެޅި ފިޔަވަޅެއްގެ ގޮތުން ކަމަށެވެ.

އެކަމަކު، ތިން ހާލަތެއްގައި ފިޔާ އެކްސްޕޯޓް ކުރުމަށް ހުރަހެއް ނޯންނާނެ ކަމަށް އެ ތަނުން ބުންޏެވެ.

އެގޮތުން މިހާތަނަށް ޝިޕް ކުރި ފިޔާގެ ޝިޕްމަންޓުތަކާއި ފައިސާ ދައްކައި ނިންމާފައިވާ ޝިޕްމަންޓުތަކުގެ އިތުރުން ފިޔާ ގަންނަން ސިސްޓަމްގައި ރަޖިސްޓަރީ ކޮށްފައިވާ ނަމަ އަންނަ ޖެނުއަރީ ފަސް ވަނަ ދުވަހުގެ ކުރިން ފިޔާ ބޭރު ކުރެވޭނެ އެވެ.

އިންޑިއާ އިން ފިޔާ އެކްސްޕޯޓުކުރުން މަނާކުރިޔަސް، އެހެން ގައުމެއްގެ ސަރުކާރަކުން އެކަމަށް އެދޭ ހާލަތުގައި އިންޑިއާ ސަރުކާރުން ހުއްދައާ އެކުގައި ފިޔާ އެކްސްޕޯޓް ކުރެވޭނެ ކަމަށް ބުނެފައިވެ އެވެ.

އިންޑިއާ އިން މީގެކުރިން ވަނީ ހަނޑުލާއި ބާސްމަތީ ހަނޑޫ ނޫން ހުދު ހަނޑު އެކްސްޕޯޓް ކުރުން ވެސް މަނާކޮށްފަ އެވެ.