ބޮލީވުޑްގެ މަޝްހޫރު އެކްޓަރު އާމިރު ޚާންގެ ދަރިފުޅު ޖުނައިދު އާއި ކުރީގެ ބަތަލާ ސްރީދޭވީގެ ހަގު ދަރިފުޅު ހުޝީ ކަޕޫރު ފެނިގެންދާ ފިލްމުގެ ޝޫޓިން ފެށުމަށް ތައްޔާރުވެއްޖެ އެވެ.

ޖުނައިދު އާއި ހުޝީ އެކުގައި ފެނިގެންދާ ފިލްމަކީ 2022 ވަނަ އަހަރު ރިލީޒްކުރި ތަމަޅަ ފިލްމު "ލަވް ޓުޑޭ"ގެ ހިންދީ ރީމޭކެވެ.

މިފިލްމުގެ ޑައިރެކްޓަރަކީ އާމިރުގެ "ލާލު ސިންގް ޗަައްޑާ" ގެ ޑައިރެކްޓަރު އަދުވައިތު ޗަންދަނެވެ. ނަން އަދި އިއުލާން ނުކުރާ ފިލްމު ޕްރޮޑިއުސް ކުރަނީ "ކްއީން" އާއި "މަސާން" އަދި "އުޅުތާ ޕަންޖާބު" ފަދަ ކާމިޔާބު ފިލްމުތައް ގެނެސްދިން ފޭންޓަމް ފިލްމްސްއިންނެވެ.

މިފިލްމު ވެގެންދާނީ ޖުނައިދުގެ ތިން ވަނަ ފިލްމަށެވެ.

އާމިރުގެ ދަރިފުޅު ޖުނައިދުގެ ފުރަތަމަ ފިލްމަކީ ޔާޝްރާޖް ފިލްމްސް މި އަހަރު ގެނެސްދޭން ހަމަޖެހިފައިވާ ޕީރިއަށް ފިލްމު "މަހާރާޖާ" އިންނެވެ. އޭނަ މިދިޔަ އަހަރު ވަނީ ދެކުނުގެ ބަތަލާ ސައީ ޕައްލަވީއާ އެކީ ކުޅުނު ފިލްމެއްގެ މަސައްކަތް ވެސް ނިންމައިފަ އެވެ.

ހުޝީ ފުރަތަމަ ފެނިގެން ގޮސްފައިވަނީ ނެޓްފްލިކްސްއިން ރިލީޒްކުރި "ދި އާޗީސް" އެވެ. ހުޝީ ވަނީ ސައިފް އަލީ ޚާންގެ ދަރިފުޅު އިބްރާހީމް އަލީ ޚާނާ އެކީ "ނާދާނިޔާން" ކިޔާ ފިލްމެއްގެ މަސައްކަތް ވެސް ނިންމައިފަ އެވެ.