ތެހެރާން (މެއި 19) - އީރާނުގެ ރައީސް އިބްރާހިމް ރައިސީ ދަތުރު ކުރެއްވި ހެލިކޮޕްޓަރަށް މައްސަލައެއް ދިމާވެ، ކުއްލިއަކަށް ވަރަށް ބާރަށް އައިސް ބިމުގައި ޖެހިއްޖެ އެވެ.

އީރާނުގެ ރަސްމީ މީޑިއާ އިން ސިފަކޮށްފައި ވަނީ ރައީސް ދަތުރު ކުރެއްވި ހެލިކޮޕްޓަރު ވެއްޓުނީ ކަމަށެވެ. ހެލިކޮޕްޓަރު ވެއްޓެން ދިމާވީ މޫސުން ވަރަށް ބޮޑަށް ގޯސްވެގެންނެވެ. އީރާނުގެ ރައީސްގެ އަރިހުގައި ފޮރިން މިނިސްޓަރު ހުސައިން އާމިރު އަބްދުﷲ ހިން ވެސް ދަތުރު ކުރެއްވި ކަމަށް ރަސްމީ މީޑިއާ އިން ބުނެ އެވެ. ރައީސް ހެލިކޮޕްޓަރު ހިމެނޭ ކޮންވޯއީގައި އިތުރު ދެ ހެލިކޮޕްޓަރު ވެސް ދަތުރުކުރި އެވެ.

ދާޚިލީ ވަޒީރު އަހުމަދު ވާހިދީ ވިދާޅުވީ ހެލިކޮޕްޓަރު ވެއްޓުނު ސަރަހައްދަށް ރެސްކިއު ޓީމުތަކުން ދަތުރު ކުރަމުންދާ ކަމަށެވެ. ނަމަވެސް އެ މަސައްކަތަށް ހުރަސް އެޅިފައި ވަނީ މޫސުން ގޯސްވުމުން ކަމަށް އޭނާ ވިދާޅުވި އެވެ.

ހެލިކޮޕްޓަރަށް ދިމާވި ހާދިސާގެ ތަފްސީލް އެއްވެސް ފަރާތަކުން އަދި ހާމަކޮށްފައެއް ނުވެ އެވެ. އަދި ރައީސް ރައިސީ އަށް ވީގޮތެއް ވެސް އަދި ހާމަކޮށްފައެއް ނުވެ އެވެ. އީރާނުގެ އިރު އުތުރުގެ ސިޓީއެއް ކަމަށްވާ ތަބްރީޒަށް ހެލިކޮޕްޓަރުގައި ރައިސީ ދަތުރު ކުރެއްވީ އީރާން-އާޒަބައިޖާން ބޯޑަރު ސަރަހައްދުގައި އޮތް ޑޭމެއް ހުޅުވުމުގެ ރަސްމިއްޔާތަކަށް ފަހު އެވެ. ހެލިކޮޕްޓަރު ވެއްޓުނު ހިސާބަށް ވަރަށް ބޯކޮށް ވާރޭ ވެހި ފޮގް ފައިބަމުންދިޔަ ކަމަށް މީޑިއާތަކުން ރިޕޯޓްކޮށްފައިވެ އެވެ.

އީރާނުގެ ރައީސްކަމަށް އުމުރުފުޅުން 63 އަހަރުގެ ރައިސީ އިންތިޚާބުކޮށްފައި ވަނީ ޖޫން، 2021 ގަ އެވެ. އީރާނުގެ ރޫހީ ލީޑަރު އާޔަތުﷲ ޚާމަނާއީގެ މަގާމަށް ދެން ވަޑައިގަންނަވާނެ ކަމަށް އެންމެ ބޮޑަށް ބެލެވޭ ބޭފުޅަކީ ވެސް ރައިސީ އެވެ.