ބެސްޓް ޓްރެވެލް ޕާޓްނަރަކީ ދަރިފުޅު މާލްތީ މަރީ ޗޯޕްރާ ޖޯނަސް ކަމަށް ބޮލީވުޑް އަދި ހޮލީވުޑްގެ ބަތަލާ ޕްރިޔަންކާ ޗޯޕްރާ ބުނެފި އެވެ.

ޕްރިޔަންކާ ވަނީ އޭނާގެ ކުރިއަށް އޮތް ފިލްމު "ބްލަފް"ގެ ޝޫޓިންނަށް އޮސްޓްރޭލިއާއަށް ގޮސްފަ އެވެ. މިދަތުރުގައި ޕްރިޔަންކާގެ ދަރިފުޅު މާލްތީ ވެސް ގެންދިޔަ އެވެ.

ޕްރިޔަންކާ އޭނާގެ އިންސްޓަގްރާމްގައި ޝެއާކުރި ވީޑިއޯގައި އޭނާގެ އަންހެން ދަރިފުޅު މާލްތީ ވެސް ފެނިގެންދެ އެވެ.

އެވީޑިއޯގައި ފެނިގެންދަނީ އޮސްޓްރޭލިއާއަށް ފްލައިޓް ޖައްސާ މަންޒަރެވެ. އެއަށްފަހު ފެންނަނީ ކުޑަ ދޮރެއް ކައިރީގައި މާލްތީ އެއާޕޯޓްގެ ބޭރު ބަލަން ހުންނަ ތަނެވެ.

އެވަގުތު ޕްރިޔަންކާ ދިޔައީ މާލްތީ ކުޅެން އުޅޭ ވީޑިއޯއެއް ރެކޯޑް ކުރަމުންނެވެ.

މި ވީޑިއޯ ހިއްސާކުރަމުން ޕްރިޔަންކާ ބުނެފައިވަނީ ދަތުރު ކުރުމަށް އެންމެ ރަނގަޅު ޕާޓްނަރަކީ ދަރިފުޅު ކަމަށެވެ.

ޕްރިޔަންކާ އެެންމެ ފަހުން ވަނީ ކުރިއަށް އޮތް ފިލްމު ހެޑްސް އޮފް ސްޓޭޓްގެ ޝޫޓިން ނިންމާލާފަ އެވެ. މި ފިލްމު ޑައިރެކްޓް ކޮށްފައިވަނީ އިލްޔާ ނައިޝުލާ އެވެ. މީގެ އިތުރުން މި ފިލްމްގައި އިދްރީސް އެލްބާ، ޖޯން ސީނާ، އަދި ޖެކް ކުއައިޑް ވެސް މުހިއްމު ރޯލުތަކެއް ކުޅެ އެވެ.