ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ހުޅުމާލޭގައި ހަދާފައިވާ ހޮޓާ ދޫކޮށްލަން ނިންމައިފި އެވެ.

ހުޅުމާލޭ ފުރަތަމަ ފިޔަވަހީގައި އެސްޓީއޯ އިން ހަދާފައިވާ ފަސް ތަރީގެ ހޮޓާ ދޫކޮށްލުމަށް ނިންމާފައިވާކަން ހާމަކުރެއްވީ ރޭ ބޭއްވި އެސްޓީއޯގެ އަހަރީ އާންމު ޖަލްސާގައި ވާހަކަދައްކަވަމުން އެ ކުންފުނީގެ މެނޭޖިން ޑިރެކްޓަރު ޝިމާދު އިބްރާހިމް އެވެ.

ޝިމާދު ވިދާޅުވީ، ހުޅުމާލޭގައި ހަދާފައިވާ ހޮޓަލާ ގުޅިގެން އެޗްޑީސީއާ އެކު އެކަމުގެ އެންމެ ފަހުގެ މަރުހަލާގެ މަޝްވަރާތައް ކުރިއަށްދާ ކަމަށެވެ.

މި ހޮޓަލަކީ ރެޑިސަން ބްލޫއާއެކު އެސްޓީއޯއިން ގާއިމްކޮށްފައިވާ އެއްބަސްވުމެއްގެ ދަށުން ތަރައްގީކުރަމުންދިޔަ ހޮޓަލެކެވެ. މީގެކުރިންވެސް މި ހޮޓާ ހިންގަން ޝައުގުވެރިވާ ފަރާތެއް ހޯދަން އެސްޓީއޯ އިން ވަނީ އިއުލާންކޮށްފަ އެވެ.

"ރެޑިސަން ހުޅުމާލެ މޯލްޑިވްސް" ގެ ނަމުގައި އެމެރިކާގެ ކާލްސަން ގުރޫޕާ ގުޅިގެން 250 ކޮޓަރީގެ ފަސް ތަރީގެ ހޮޓާ ތަރައްގީކުރަން ފެށީ 2011 ވަނަ އަހަރު އެވެ. ފަހުން އެތަނުގެ މަސައްކަތް ހުއްޓި، އެކި ފަހަރު މަތިން އެތަން ވިއްކާލަން ކުރި މަސައްކަތް ވަނީ ނާކާމިޔާބުވެފަ އެވެ.

އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހިމް ވިދާޅުވީ ވިޔަފާރީތައް ކުރުމާއި އިތުރު އެސެޓްތައް ގަތުމާއި އެސްޓީއޯއާ ނުގުޅޭ ބައެއް ވިޔަފާރީތައް ދޫކޮށްލުމަކީ މުހިންމު ކަމެއް ކަމަށެވެ. އެގޮތުން މިފްކޯގައި އޮތް އެސްޓީއޯގެ ހިއްސާ އަނބުރާ ސަރުކާރަށް ދޫކޮށްފައިވާކަން ވެސް އޭނާ ހާމަކުރެއްވި އެވެ.