ސާފުތާހިރުކަން ކުޑަކޮށް ބިދޭސީން ކާބޯތަކެތި ޑެލިވަރީ ކުރާ ތަނެއް ބަންދުކޮށްފި އެވެ.

އިމިގްރޭޝަނަނުން މިރޭ ކުރި އެކްސް ޕޯސްޓެއްގައި ބުނީ “އިމިގްރޭޝަން ވޮޗް” އަށް ލިބިފައިވާ މައުލޫމާތާ އެކު ބިދޭސީ ބަޔަކު ހުޅުމާލޭ ގަރާޖެއްގެ މަތީގައި ހިންގަމުންދާ ކާބޯތަކެތި ޑެލިވަރީ ކުރާ ތަނެއް ބަލާ ފާސްކޮށްފައި ކަމަށެވެ. ގަވާއިދާ ހިލާފަށް ކާބޯތަކެތި ޑެލިވަރީ ކުރާ ތަނުގައި ތިބި ބިދޭސީ އަށް މީހަކާއި ގަރާޖުން ތިން މީހަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށް އިމިގްރޭޝަނުން ބުނެ އެވެ.

އިމިގްރޭޝަނުން އެތަން ބަލާ ފާސްކުރަން ދިޔައިރު ބިދޭސީން އެތަން ރޫޅާލާ ހުސްކުރުމުގެ މަސައްކަތް ކުރަމުން ދިޔަކަމަށް ވެއެވެ. މިތަނާ ގުޅޭގޮތުން ދާދި ފަހުން ސޯޝަލް މީޑިއާގައި އާއްމުން ކަންބޮޑުވުން ފާޅުކޮށްފައިވެ އެވެ.

މިއަދު އިމިގްރޭޝަނުން ހުއްޓުވި ބިދޭސީން ކާބޯތަކެތި ތައްޔާރުކޮށް ޑެލިވަރީ ހިދުމަތް ދޭތަން -- ފޮޓޯ: އިމިގްރޭޝަން

ގަވާއިދާ ހިލާފަށް ވިޔަފާރި ކުރަމުންދާ ބިދޭސީން ހޯދުމަށް ކުރިއަށް ގެންދިޔަ އޮޕަރޭޝަންތަކުގައި 42 ރެއިޑްކޮށް، 118 ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށް ބުދަ ދުވަހު އިމިގްރޭޝަނުން ބުނެފައިވެ އެވެ.

ރާއްޖޭގައި ގަވާއިދާ ހިލާފަށް އުޅެމުންދާ ބިދޭސީން ހުއްޓުވުމަށް އިމިގްރޭޝަނުން އިސްނަގައިގެން ހިންގަމުން އަންނަ އޮޕަރޭޝަންތަކުގައި އަތުލައިގަންނަ ބިދޭސީން ލީގަލައިޒްވުމުގެ ފުރުސަތެއް ނުދޭނެ ކަމަށް ކޮންޓްރޯލާ ޖެނެރަލް އޮފް އިމިގްރޭޝަން، މުހައްމަދު ޝަމްއާން ވަހީދު ވަނީ ވިދާޅުވެފަ އެވެ.