ގައްޒާގައި ކޮންމެ ދުވަހަކު އެތައް ސަތޭކަ ކުށެއް ނެތް އާންމުންނެއް އިސްރާއީލުން ރަހުމެއްނެތި މަރަމުންދާއިރު، އަރަބި ލީޑަރުން ތިބީ ކުޅިބަލަން ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެ އެވެ.

ގައްޒާގައި އިސްރާއީލުން ހިންގަމުންދާ ގަތުލުއާއްމާއި ގުޅިގެން މިއަދު އެކްސްގައި ކުރެއްވި ޕޯސްޓެއްގައި ރައީސް މައުމޫން ވިދާޅުވީ "އަރަބި ލީޑަރުން އެތިބީ ކުޅިބަލަން. އެއްވެސް ކަމެއް ނުކުރޭ. ހިތާމައިގެ ކޮޅެއްނެތް" ކަމަށެވެ.

މީގެ ކުރިންވެސް އެތަށްފަހަރެއްގެ މަތިން އެމަނިކުފާނު ވަނީ އިސްރާއީލުން ފަލަސްތީނަށް ދެމުންގެންދާ ހަމަލާތައް ކުށްވެރިކުރައްވާފަ އެވެ. ރައީސް މައުމޫން އަކީ ފަލަސްތީނުގެ ދިފާއުގައި އަބަދުވެސް ވަކާލާތު ކުރައްވާ ލީޑަރެކެވެ.

ނަވާރަ ސަތޭކަ ހަތްދިހަ އަށް ވަނަ އަހަރު ދިވެހިރާއްޖޭގެ ރައީސްކަމާ ހަވާލުވެވަޑައިގަތުމަށް ފަހު އެ މަނިކުފާނު ހާރިޖީ ގޮތުން ކުރެއްވި އެންމެ މުހިއްމު އެއް ކަމަކީ، ފަލަސްތީނާ ގުޅުން ގާއިމްކުރެއްވުމެވެ. އެމަނިކުފާނުގެ ދައުވަތަކަށް، 1984 ވަނަ އަހަރު ފަލަސްތީން ލިބަރޭޝަން އޯގަނައިޒޭޝަން (ޕީއެލްއޯ) ގެ ޗެއާމަން ޔާސިރު އަރަފާތު ރާއްޖެ ވަޑައިގެންނެވި އެވެ.

ރައީސް މައުމޫނުގެ ވެރިކަމުގެ ކުރީކޮޅު، 1984-1986 އަށް ރާއްޖޭން ވަނީ ޕީއެލްއޯއާ ގުޅިގެން މޯލްޑިވްސް އެއާވޭޒްގެ ނަމުގައި އެއާލައިނެއް އޮޕަރޭޓްކޮށްފަ އެވެ. އަދި ޕީއެލްއޯ އިން ރާއްޖޭގައި ރިސޯޓެއް ވެސް ހިންގި އެވެ. އެއީ ގުދުސް މިނިވަންކުރުމުގެ މަސައްކަތަށް ޕީއެލްއޯ އަށް ފަންޑު ހޯދައިދިނުމަށް ރާއްޖޭން ދިއްކޮށްލި އެހީގެ އަތެކެވެ.

މީގެ އިތުރުން ރައީސް މައުމޫންގެ ވެރިކަމުގައި ގަތުލު އާއްމު ހުއްޓުވުމާ ގުޅޭ މުއާހަދާގައި 24 އެޕްރީލް 1984 ގައި ރާއްޖެއިން ސޮއިކުރި އެވެ. އެ މުއާހަދާގައި ސޮއިކުރީ ލުބުނާނުގައި އުޅުނު ފަލަސްތީނުގެ ރެފިއުޖީންގެ އެތައް ސަތޭކަ ބަޔަކު ގަތުލުކުރި ސަބްރާ އާއި ޝަތީލާ ގަތުލު އާންމަށް ފަހު އެވެ.

ކުރީގެ ފޮރިން މިނިސްޓަރު އަހުމަދު ޝަހީދު ވިދާޅުވެފައިވަނީ 1984 ގައި ތިން މުއާހަދާއެއްގައި ސޮއިކުރުމަކީ ރައީސް މައުމޫން އެޅުއްވި އާދަޔާހިލާފު ފިޔަވަޅެއް ކަމަށެވެ.

ރައީސް މައުމޫން ވަނީ މިސްރުގައި ކިޔަވަން ހުންނެވި ދުވަސްވަރު 1956 ވަނަ އަހަރު އިސްރާއީލުގެ ހަމަލާތަކުން މިސްރު ދިފާއުކުރުމުގެ މަސައްކަތަށް ވޮލަންޓިއަރެއްގެ ގޮތުގައިވެސް މަސައްކަތް ކުރައްވާފަ އެވެ.