ކ. މާފުށީ ޖަލަށް މަސްތުވާތަކެއްޗާއި ފޯނު ވެއްދި މޯލްޑިވްސް ކަރެކްޝަނަލް ސާވިސްގެ 13 އޮފިސަރުންގެ މައްސަލަ ތަހުގީގުކޮށް ނިންމައި ދައުވާކުރުމަށް ޕްރޮސިކިއުޓާ ޖެނެރަލްގެ އޮފީހަށް ފޮނުވައިފި އެވެ.

ފުލުހުން ވަނީ މިއަދު އެ 13 އޮފިސަރުންގެ ވަނަވަރު އާއްމުކޮށް އެމީހުނަށް ދައުވާކުރަން ފޮނުވާފައިވާކަމަށް ބުނެފަ އެވެ.

ޖަލަށް މަނާތަކެތި ވެއްދި މައްސަލައިގައި ދައުވާ ކުރަން ފޮނުވި ބައެއް އޮފިސަރުން

ޖަލުގައި ގައިދީންނަށް ފޯނާއި މަސްތުވާތަކެތި ފޯރުކޮށްދިނުމަށް އެހީތެރިވެދޭ ބޮޑު ނެޓްވޯކެއް ހައްޔަރުކޮށްފައިވަނީ ނިމިދިޔަ ޖޫން މަހު އެވެ. އެކަމާ ގުޅިގެން ހޯމް މިނިސްޓަރު ދެއްވި ޕްރެސް ކޮންފަރެންސެއްގައި ވިދާޅުވީ ކަރެކްޝަންސްގެ 18 އޮފިސަރެއްގެ އެކައުންޓަށް 73 މިލިއަން ރުފިޔާ ޖަމާކޮށްފައިވާ ކަމަށެވެ. އަދި އެއް އޮފިސަރުގެ އެކައުންޓަށް އެކި ފަހަރު މަތިން 24 މިލިއަން ރުފިޔާ ޖަމާވި ކަމަށް އިހުސާން ވިދާޅުވި އެވެ.

އޭގެ ތެރެއިން ނުވަ އޮފިސަރަކު ހައްޔަރުކޮށްފައިވަނީ މާފުށިން ކަމަށާއި ދެ މީހަކު ކ. ކާށިދޫން، ހއ. އުތީމުން އެކަކު، މާލެ އިން އެކަކު ހައްޔަރު ކުރި ކަމަށް ފުލުހުން ބުނެފައިވެ އެވެ.

އެ އޮފިސަރުންނަކީ ޖޫނިއާ ލެވަލްގެ އޮފިސަރުން ކަމަށާއި ފައިސާ ޖަމާކޮށްފައިވަނީ ހުކުމް ތަންފީޒުކުރަމުންދާ ގައިދީންގެ އެކައުންޓުތަކުން ކަމަށް ފުލުހުން ބުނެ އެވެ.