މިއަދު ވެސް މޫސުން ގޯސްވާނެކަން ލަފާކޮށް މޫސުމާ ބެހޭ ގައުމީ އިދާރާ އިން ރީނދޫ ސަމާލު ނެރެފި އެވެ.

މެދު ރާއްޖެތެރެއަށް ރީނދޫ ސަމާލު ނެރުނީ ހެނދުނު 8:15 އިން ފެށިގެން މެންދުރުފަހު 13:00 އާ ހަމައަށެވެ. އެ އިދާރާއިން ބުނެފައިވަނީ އެ ވަގުތު މި ސަރަހައްދުގައި ހިމެނޭ އަތޮޅުތަކަށް ބޯކޮށް ވާރޭވެހޭނެ ކަމަށެވެ.

އޭގެ އިތުރަށް ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައި ޖެހޭނެކަމަށާއި، ވިލާގަނޑުގައި ގަޑިއަކު 50 މޭލަށް ވައި ގަދަވާނެ ކަމަށާއި، ކަނޑުތައް ވަރަށް ގަދަވާނެކަމަށް ލަފާކުރެވޭ ކަމަަށް އެ އިދާރާއިން ބުނެފައިވެ އެވެ.

މި ހަފްތާގެ އާދިއްތައިން ފެށިގެން ފަސް ދުވަހަށް މޫސުން ގޯސްވާނެކަމަށް މެޓް އޮފީހުން ވަނީ ލަފާކޮށްފަ އެވެ. އަންގާރަ ދުވަހު ވެރިރަށް މާލެއަށް ރިކޯޑް އަދަދަކަށް ވާރޭވެހި ފެންބޮޑުވެ އެކިވަރުގެ ގެއްލުންތައް ވަނީ ލިބިފަ އެވެ. މީގެ އިތުރުން އަތޮޅުތެރޭގެ ބައެއް ރަށްރަށުގައި ވެސް ފެންބޮޑުވެފައިވެ އެވެ.