އެމްޕޮކްސް މުޅި ދުނިޔެއަށް ފެތުރިދާނެކަމުގެ އިންޒާރާއެކު ރާއްޖެއިން ރައްކާތެރިކަމުގެ ފިޔަވަޅުތައް އަޅަންފަށައިފި އެވެ.

އެފްރިކާ ސަރަހައްދުގައި މިހާރު އާންމުވެފައިވާ އެމްޕޮކްސް (މަންކީ ޕޮކްސް) އަކީ މިހާރު މުޅި ދުނިޔަށް ނުރައްކާވެދާނެ ހާލަތެއްގައި އޮތް ބައްޔެއް ކަމަށް ޑަބްލިއުއެޗްއޯ އިން އިއުލާނު ކުރުމާ އެކު، ރާއްޖޭގައި އަޅަން ޖެހޭ ފިޔަވަޅުތައް އެޅުމުގެ މަސައްކަތް އެޗްޕީއޭ އިން ފަށައިފި އެވެ.

އެފްރިކާގެ ގައުމެއް ކަމުގައިވާ ކޮންގޯއިން މި ފަހުން ފެނި އެފްރިކާގެ 12 އަށްވުރެ ގިނަ ގައުމެއްގައި ފެތުރެމުން އަންނައިރު ޖުލައި މަހުން ފެށިގެން މި ބައްޔަށް ސާދަ ހާހަށްވުރެ ގިނަ މީހުން ޕޮޒިޓިވް ވެ 500 އަށްވުރެ ގިނަ މީހުން މި ބަލީގައި މިހާތަނަށް މަރުވެފައިވެ އެވެ.

ބަލި މުޅި ދުނިޔެއަށް ފެތުރިދާނެކަމުގެ ބިރު އެބަ އޮތްކަމަށް ރޭގެ ވަގުތެއްގައި ދުނިޔޭގެ ސިއްހަތު ޖަމިއްޔާ ޑަބްލިއުއެޗްއޯ އިން ވަނީ އިއުލާންކޮށްފަ އެވެ.

އެމްޕޮކްސް އާއި ގުޅޭގޮތުން ރާއްޖޭގައި ރިސްކް އެސެސްމަންޓެއް ހެދުމަށްފަހު ރައްޔިތުންނަށް އަންގަންޖެހޭ ކަންކަން އަންގަމުންދާނެކަމުގައި ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިއަދު ވަނީ ބުނެފަ އެވެ.

ކުރިން މަންކީޕޮކްސްގެ ނަން ދީފައިވާ މި ބަލީގެ ވައިރަސް އިންސާނުނަނަށް ބަލި ޖައްސަނީ މި ބަލި ޖެހިފައިވާ ޖަނަވާރުގެ ފަރާތުންނެވެ. ފަސޭހައިން ނުފެތުރުނަމަވެސް، މި ބަލި ޖެހިފައިވާ މީހަކާއި ގައިގޯޅިވެ އުޅުމުން ގައިންގަޔަށް މި ބަލި އަރައެވެ. މި ބަލި ޖެހުމުން ހުން އައިސް ގައިގައި ރިއްސައި ބޮޑެތި ބިހިތަކެއް ގައިގައި ނަގަ އެވެ.

ޑަބްލިއުއެޗްއޯއިން ބުދަ ދުވަހު ބުނީ އެފްރިކާގެ 13 ގައުމަކުން އެމްޕޮކްސް ކޭސް ފެނިފައިވާ ކަމަށާއި އޭގެ އާ ވޭރިއަންޓު ފެތުރެމުންދާ ކަމަށެވެ. މިއީ އެ ބަލީގެ ނުރައްކާއޮތް ކަމަށް ޑަބްލިޔުއެޗްއޯއިން ދެ އަހަރު ދުވަހުގެ ތެރޭގައި ކަނޑައެޅި ދެވަނަ ފަހަރެވެ.