އެއާއެމްބިއުލާންސްގެ ގޮތުގައި ބޭނުންކުރަމުން އައި މޯލްޑިވިއަންގެ ސީޕްލޭނުން ރިސޯޓްތަކަށް ފަތުރުވެރިން އުފުލަން ފަށައިފި އެވެ.

މިހާތަނަށް ރާއްޖޭގައި ބަލި މީހުން އުފުލަމުން އައީ އިންޑިއާގެ ޑޯނިއާ މަތިންދާބޯޓުންނެވެ. ނަމަވެސް މި ސަރުކާރު އައިފަހުން ރައީސް ޑރ. މުހައްމަދު މުއިއްޒުގެ އެންގެވުމަށް އެއާއެމްބިއުލާންސްގެ ގޮތުގައި މޯލްޑިވިއަންގެ ސީޕްލޭނެއް ކަނޑައަޅައި އޭގައި ބަލި މީހުން އުފުލަން ފެށި އެވެ.

ސަރުކާރުގެ އޮފިޝަލަކު "ހުރިހާ"އަށް ވިދާޅުވީ އެއާ އެމްބިއުލާންސަށް ހާއްސަކުރި ސީޕްލޭން ފަތުރުވެރިން އުފުލާގޮތަށް ބަދަލުކުރަން ނިންމީ ބަލި މީހުން އުފުލުމަކީ ހަރަދުގެގޮތުން ބަލާއިރު، މޯލްޑިވިއަންއަށް ދެކޮޅު ޖެހޭ ކަމަކަށް ނުވާތީ ކަމަށެވެ.

"އެ ސީޕްލޭން އެއާ އެމްބިއުލާންސެއްގެ ގޮތުގައި ހަމަޖައްސާފައި އޮތުމަކީ ހަރަދުގެ ގޮތުން ބަލާއިރު، މޯލްޑިވިއަންއަށް ދެކޮޅު ޖެހޭ ކަމެއް ނޫން. އަދި އެކަމުގެ ސަބަބުން ރިސޯޓްތަކަށް ފަތުރުވެރިން އުފުލަން ވެސް ދަތިވޭ. ކުރުކޮށް ދަންނަވަންޏާ މޯލްޑިވިއަންއަށް މާލީގޮތުން ގެއްލުން ވަނީ،" އޮފިޝަލް ވިދާޅުވި އެވެ.

މޯލްޑިވިއަންގައި ޖުމްލަ 11 ސީޕްލޭން އޮވެ އެވެ. ސީޕްލޭންތަކުގައި ފަތުރުވެރިން އުފުލައިގެން ރަނގަޅު ފައިދާއެއް އެކަމުން އެ ކުންފުންޏަށް ލިބެ އެވެ.

މޯލްޑިވިއަން ހިންގާ އައިލެންޑް އޭވިއޭޝަނުން މިކަމާ ގުޅޭގޮތުން ރަސްމީކޮށް ބަހެއް ނުބުނެ އެވެ. އޮންލައިން ނޫސް "އަދަދު" އިން މިކަމާ ގުޅޭގޮތުން ސުވާލު ކުރުމުން މޯލްޑިވިއަން ހިންގާ އައިލެންޑް އޭވިއޭޝަންގެ މެނޭޖިން ޑިރެކްޓަރު އިބްރާހީމް އިޔާސް ވިދާޅުވީ ސީޕްލޭންގައި ބަލި މީހުން އުފުލުމުގެ އޮޕަރޭޝަން ހުއްޓުމަކަށް ނުދާނެ ކަމަށެވެ. ނަމަވެސް އެކަމާ ގުޅޭގޮތުން އިތުރަށް ވާހަކަ ދައްކާކަށް އޭނާ ބޭނުމެއް ނުވި އެވެ. އަދި އެއާއެމްބިއުލާންސް އިން ފަތުރުވެރިން އުފުލާ ވާހަކަ އޭނާ ދޮގެއް ނުކުރި އެވެ.