ޕްރޮސެކިއުޓާ ޖެނެރަލް (ޕީޖީ)ގެ މަގާމުން ހުސައިން ޝަމީމް ވަކިކުރަން ރައްޔިތުންގެ މަޖިލީހަށް ހުށަހަޅާފައިވާ މައްސަލައިގައި ޖަވާބުދާރީވާން މިއަދު މަޖިލީހުގެ ޖުޑިޝަރީ ކޮމިޓީއަށް ހާޒިރުވާއިރު ބައްދަލުވުން ލައިވްކޮށްދޭން އެދުނު ނަމަވެސް އެ ކޮމިޓީ ސިއްރުކުރަން މަޖިލީހުން ނިންމައިފި އެވެ.

ޕީޖީ ޝަމީމް މަގާމުން ވަކިކުރުމަށް ހުށަހަޅާފައިވާ މައްސަލައިގައި ޖަވާބުދާރީވާން މިއަދު ހެނދުނު ރައްޔިތުންގެ މަޖިލީހުގައި އެ މައްސަލަ ދިރާސާކުރާ ޖުޑިޝަރީ ކޮމިޓީއަށް ހާޒިރުކުރަން ވަނީ ނިންމައިފަ އެވެ. އެ ކޮމިޓީއަށް ވަޑައިގެންނެވުމުގެ ކުރީގައި ޕީޖީ އޮފީހުން ނެރުނު ބަޔާނެއްގައި ބުނެފައިވަނީ އެ ކޮމިޓީ ލައިވްކޮށްދޭން ޕީޖީގެ ފަރާތުން އެދިފައިވާ ކަމަށެވެ.

ނަމަވެސް މަޖިލީހުގެ ޖުޑިޝަރީ ކޮމިޓީގެ މިއަދުގެ ބައްދަލުވުމުގައި ތުލުސްދޫ ދާއިރާގެ މެންބަރު އިބްރާހިމް ނަސީމް ހުށަހެޅުއްވީ ޕީޖީ ޝަމީމަށް ކުރެވޭ ތުހުމަތުތަކުގައި ބައެއް މީހުންގެ ޒާތީ ކަންކަން ހިމެނޭތީ ޕީޖީއަށް އިހުތިރާމުކުރުމުގެ ގޮތުން ކޮމިޓީ ސިއްރުކޮށްދިނުމަށެވެ.

އެ ހުށަހެޅުމަށް ފޭދޫ އުތުރު ދާއިރާގެ މެންބަރު އިސްމާއިލް ނިޒާރު ވަނީ ތާއީދުކުރައްވައިފަ އެވެ. ކޮމިޓީ ސިއްރުކުރަން އެދި ހުށަހެޅި ހުށަހެޅުމަށް ވޯޓަށް އެހުމަށް ފަހު ކޮމިޓީ ސިއްރުކުރަން ވަނީ ނިންމައިފަ އެވެ.

ޝަމީމް މަގާމުން ވަކިކުރަން ހުށަހެޅީ ހުޅުދޫ ދާއިރާގެ މެންބަރު މުހައްމަދު ޝާހިދެވެ. ޝާހިދު ހުށަހެޅުއްވި ސިޓީގައި ވަނީ ޕީޖީކަމުން ޝަމީމް ވަކިކުރަން ޖެހޭ ކަމަށް ވިދާޅުވެ، މައިގަނޑު 8 ކަމެއް ފާހަގަކުރައްވައިފައިވެ އެވެ.

ސިޔާސީ އެކި ދައުވާތައް އުފުލި ޝަމީމް މަގާމުން ވަކިކުރަން ހުށަހެޅިއިރު، އެމްއެމްއޭގެ ގަވަރުނަރަކަށް ހުންނެވި އަލީ ހާޝިމް ވެސް ދާދިފަހުން މަގާމުން ވަކިކޮށްފައިވެ އެވެ.

ޝަމީމް ޕީޖީގެ މަގާމަށް އައްޔަން ކުރެއްވީ ރައީސް އިބްރާހިމް މުހައްމަދު ސޯލިހްގެ ވެރިކަމުގައި 2019 ވަނަ އަހަރުގެ ޑިސެމްބަރު މަހު އެވެ. އެހެންކަމުން އޭނާގެ ފަސް އަހަރުގެ ދައުރު ހަމަވާނީ މިއަހަރުގެ ޑިސެމްބަރު މަހު އެވެ.