ޕްރޮސެކިއުޓަރ ޖެނެރަލް ހުސެއިން ޝަމީމް އެމަގާމުން ވަކިކުރަން ފެންނަ ކަމަށް ރައްޔިތުން މަޖިލީހުގެ ޖުޑިޝަރީ ކޮމެޓީން ނިންމުމުން އަވަސް އަރުވާލައިގެން މިރޭ ޖަލްސާއެއް ބާއްވަން ނިންމައިފި އެވެ.

ޖުޑިޝަރީ ކޮމެޓީން އެގޮތައް ނިންމީ ޝަމީމް މިއަދު ކޮމެޓީއަށް ހާޒިރުކޮށް ސުވާލު ކުރުމަށްފަހު އެވެ. ކޮމިޓީގެ ނިންމުމާ މެދު ގޮތެއް ނިންމަން މަޖިލީހުގެ ޖަލްސާ ތާވަލުކޮށްފައި ވަނީ މިރޭ 9:00 އަށެވެ. މަޖިލީހުގެ މިއަދު މެންދުރު ޖަލްސާ ނިންމާލައްވަމުން މަޖިލީހުގެ ނައިބު ރައީސް އަހުމަދު ނާޒިމް ވިދާޅުވީ މަޖިލީހުގެ މި ދައުރުގެ ފަހު ޖަލްސާ މިރޭ ބާއްވާނެ ކަމަށެވެ.

ޝަމީމް މަގާމުން ވަކިކުރަން ހުށަހެޅީ ހުޅުދޫ ދާއިރާގެ މެންބަރު މުހައްމަދު ޝާހިދެވެ. ޝާހިދު ހުށަހެޅުއްވި ސިޓީގައި ވަނީ ޕީޖީކަމުން ޝަމީމް ވަކިކުރަން ޖެހޭ ކަމަށް ވިދާޅުވެ، މައިގަނޑު 8 ކަމެއް ފާހަގަކުރައްވައިފައިވެ އެވެ.

އޭގެ ތެރޭގައި ރޭޕްގެ ދައުވާ ލިބުނު ކުރީގެ ޓޫރިޒަމް މިނިސްޓަރު އަލީ ވަހީދަށް ކުރި ދައުވާ ފައިލް ކުރަން ނިންމުމާއި، ކުރީގެ ޔޫތް މިނިސްޓަރު އަހުމަދު މަހުލޫފްގެ މައްސަލަ ފައިލް ކުރުމަށް ނިންމުމާއި، ސަފާރީ ރޭޕް ކޭސްގެ މައްސަލައިގައި ދަށުކޯޓުގެ ނިންމުން އިސްތިއުނާފު ނުކުރަން ނިންމުން، މިލަންދޫ ދާއިރާގެ ކުރީގެ މެންބަރު އަލީ ރިޒާގެ މައްޗަށް އުފުލި ހިއުމަން ޓްރެފިކިންގެ ދައުވާ އަނބުރާ ގެނައުން، އަލަމްގީރު މައްސަލައިގައި ބައެއް މީހުންގެ މައްޗަށް ދައުވާ ނުކޮށް ފައިލް ކުރުން އަދި ވެންޓިލޭޓަރުގެ މައްސަލައިގައި މީހުންގެ މައްޗަށް ދައުވާ ނުކުރުމަށް ނިންމުން ހިމެނެ އެވެ.

ޝަމީމް ޕްރޮސެކިއުޓާ ޖެނެރަލްގެ މަގާމުން ވަކިކުރުމާއި މެދު ރައްޔިތުންގެ މަޖިލީހުން އަންނަ ހަފްތާގައި ގޮތެއް ނިންމާނެ ކަމަށް ބެލެވެއެވެ.