އިންޑިއާގެ މަޝްހޫރު ކޮމީޑިއަން ކަޕިލް ޝަރްމާއަށާއި އޭނާގެ ޝޯ، "ދަ ކަޕިލް ޝަރްމާ ޝޯ"އަށް ފާޅުގައި ފާޑުކިޔާ ތަރިންގެ އަދަދު ގިނަވަމުން އެބަދެ އެވެ.

އެގޮތުން މިފަހަކަށް އައިސް ބޮލީވުޑަށް ނިސްބަތްވާ ބައެއް ތަރިން ވަނީ ކަޕިލްގެ ޝޯގައި ދައްކާ ވާހަކަތަކާއި މަންޒަރުތަކާމެދު ހިތްހަމަ ނުޖެހުން ފާޅުކޮށްފަ އެވެ.

އިންޑިއާގެ މުނިފޫހި ފިލުވުމުގެ ދާއިރާގައި ހަރަކާތްތެރިވާ ލިޔުންތެރިއެއް ކަމަށްވާ އަމިިތު އާރްޔަން ބުނެފައިވަނީ "ދަ ކަޕިލް ޝަރްމާ" ޝޯއަކީ އިންޑިއާގެ ޓީވީގައި މިހާރު ދައްކާ އެންމެ ފެންވަރު ދަށް ޝޯ ކަމަށާއި ކަޕިލްއަކީ ނާގާބިލް މީހެއް ކަމަށެވެ.

ހަމައެއާއެކު ބޮލީވުޑުގެ ވެޓެރަން އެކްޓަރެއް ކަމަށްވާ މުކޭޝް ހަންނާ ވެސް ވަނީ ކަޕިލްއަށާއި އޭނާގެ ޝޯއަށް ފާޑުކިޔާފަ އެވެ. ދަ ކަޕިލް ޝަރްމާ ޝޯއަކީ "ވަހުޝީ" ޝޯއެއް ކަމަށާއި ކަޕިލްއަކީ އިންޑިއާގެ ސަގާފަތާ ދުރު މީހެއް ކަމަށް މުކޭޝް ބުންޏެވެ.

ކަޕިލްއަށް ފާޑުކިޔާ ތަރިންގެ އަދަދު ގިނަވަމުން އަންނައިރު މީގެ ކުރިން ވެސް އާއްމުންގެ ފަރާތުން އޭނާއަށް އައީ އެކި ކަހަލަ ފާޑުކިޔުންތައް އަމާޒު ވަމުންނެވެ.

"ދަ ކަޕިލް ޝަރްމާ ޝޯ"އަކީ ކޮމީޑިއަން ސުނިލް ގްރޯވާއެކު ޖެހުނު މައްސަލައެއްގައި "ކޮމެޑީ ނައިޓްސް ވިތު ކަޕިލް" ދޫކޮށްލުމަށްފަހު ކަޕިލް ފަށާފައިވާ އޭނާގެ އަމިއްލަ ޝޯ އެކެވެ.