ދުނިޔޭގެ އެކި ސަރަހައްދުތަކަށް ވަރުގަދަ ތޫފާންތަކެއްގެ އަސަރު މިހާރު ވެސް ދަނީ ކުރަމުންނެވެ. މި ތޫފާންތަކުގައި ފާހަގަކޮށްލެވޭ އެއްކަމަކީ ބޭނުންކުރާ އިނގިރޭސި ނަން ތަފާތުވާކަމެވެ.

ޓައިފޫން، ހަރިކޭން ނުވަތަ ސައިކްލޯންއަކީ އާންމުކޮށް މިފަދަ ތޫފާންތަކަށް ކިޔާ އުޅޭ އިނގިރޭސި ނަން ނަމެވެ. މިއީ ހަމަ އެއް ވައްތަރެއްގެ ތޫފާންތަކެކެވެ. އެކަމަކު މި ތޫފާންތަކަށް ވަކިން ތިން ނަަމެއް ކިޔަނީ ކީއްވެ ހެއްޔެވެ؟

މި ތޫފާންތަކުގެ ނަންތައް ތަފާތުވާ މައިގަނޑު އެއް ސަބަބަކީ ތޫފާން އުފެދޭ ސަރަހައްދެވެ. ހަރިކޭންގެ ނަން އާންމުކޮށް ދެނީ އެޓްލާންޓިކް އަދި އިރު އުތުރު ޕެސިޕިކް ކަނޑުގައި އުފެދޭ ތޫފާންތަކަށެވެ. މި ތޫފާންތަކުގެ އަސަރުކުރާނީ އުތުރު އެމެރިކާ ބައްރުގެ ގައުމުތަކަކެވެ. މި ފަހުން އެމެރިކާގެ ފްލޮރިޑާއަށް އެރި ހަރިކޭން މިލްޓަން އަދި ހަރިކޭން ހެލީން އަކީ މީގެ މިސާލުތަކެކެވެ.

ޓައިފޫން އުފެދޭނީ ހުޅަނގު އުތުރު ޕެސިފިކް ކަނޑުގަ އެވެ. އަދި ޓައިފޫންގެ އަސަރުކުރާނީ ހޮންގް ކޮންގް، ޗައިނާ، ވިއެޓްނާމް، ފިލިޕީންސް ފަދަ ގައުމުތަކަށެވެ. މި އަހަރު ސެޕްޓެމްބަރު މަހު ސުޕަ ޓައިފޫން ޔާގީ ވަނީ އިރުދެކުނު އޭޝިއާގެ ގިނަ ގައުމުތަކަށް އަރާ ބޮޑެތި ގެއްލުންތަކެއް ވެފަ އެވެ.

ސައިކްލޯން އުފެދޭނީ ދެކުނު ޕެސިފިކް ކަނޑުގަ އެވެ. އަދި ސައިކްލޯންގެ އަސަރު ކުރާނީ ބަންގަލަދޭޝް ފަދަ ގައުމުތަކަށެވެ. ހަރިކޭން އަދި ޓައިފޫންތަކާ ޚިލާފަށް ސައިކްލޯން އެނބުރޭނީ ކްލޮކްވައިސް (ގަޑިއާ އެއްކޮޅަށް) ކޮށެވެ.