ވިފާގުގެ މަރާ ގުޅޭ ގޮތުން ފުލުހުން އިއްޔެ ބޭއްވި ނޫސްވެރިންގެ ބައްދަލުވުމުގައި ހާމަކުރި ބައެއް މައުލޫމާތާއި ގުޅިގެން ފުލުހުން މާފަށް އެދިއްޖެ އެވެ.

ފުލުހުން މިރޭ ނެރުނު ނޫސް ބަޔާނެއްގައި ބުނެފައިވަނީ މީޑިއާ ބްރީފިން ކުރިއަށް ގެންދިޔުމުގައި ބައެއް ސެންސިޓިވް ވާހަކަތައް އެންމެ ރަނގަޅު ނޫން ގޮތުގައި ގެނެސްދެވުނުމަކަން ގަބޫލުކޮށް، އެކަމަށް މާފަށް އެދޭކަަމަށެވެ.

މާފަންނު ގެއަކުން މަގުމައްޗަށް ވެއްޓި ގއ. މާމެންދޫ، ބީޗްވިލާ، ވިފާގު އިބްރާހީމް އަދުނާނު މަރުވީ މިދިޔަ އޮގަސްޓް މަހުގެ 14 ވަނަ ދުވަހު އެވެ. އެކަމާއި ގުޅިގެން ޗެނަލް 13 އިން ޑޮކިއުމެންޓްރީއެއް ހެދުމުން އޭގައި ވަނީ ދޮގު ވާހަކަތަކެއް ކަމަށް ފުލުހުން ބުނެ އެވެ.

ޗެނަލް 13 އިން ދެއްކި ޑްކިއުމެންޓްރީގައި ވިފާގުއަށް އޭނާގެ ދޮންބައްޕަގެ ފަރާތުން ޖިންސީ ގޯނާ ލިބުނުކަމަށް ތުހުމަތުކޮށްފައިވެ އެވެ. ވިފާގުގެ ދޮން ބައްޕައަކީ ރައްޔިތުން މަޖިލީހުގެ ނައިބް ރައީސް އަހުމަދު ނާޒިމެވެ.

ފުލުހުން އިއްޔެ ބޭއްވި ނޫސްވެރިންގެ ބައްދަލުވުމުގައި ވިފާގުގައަށް ޖިންސީ ގޯނާއެއް ކޮށްފައި ނުވާކަން ޔަގީންވާ ކަމަށް ބުނެ އޭނާއާ ގުޅޭ ވަރަށް ޒާތީ މައުލޫމާތުތަކެއް ވަނީ ހާމަކޮށްފަ އެވެ. އެކަމާ ގުޅިގެން އެވަގުތު ނޫސްވެރިންގެ ބައްދަލުވުމުގައި ބައިވެރިވި ބައެއް ނޫސްވެރިންވެސް ނުރުހުން ފާޅުކޮށްފައިވެ އެވެ.

ފުލުހުން މިރޭ ނެރުނު ބަޔާނުގައި ބުނެފައިވަނީ އެ މައުލޫމާތުތައް ހާމަކޮށްފައިވަނީ މީޑިއާ އަކުން އެކަމުގެ ހަގީގަތް އޮޅޭ ގޮތަށް މައުލޫމާތު ގެނެސްދީފައިވާތީ ކަމަށެވެ. އަދި އެ މައުލޫމާތުތައް ހާމަކުރީ އާއިލާއަށްވެސް އެންގުމަށްފަހު ކަމަށް ފުލުހުން ބުނެ އެވެ.