އުނބަށް ޖަހާ ޖަހާ މި ސަރުކާރާ މެދު ރައްޔިތުންގެ އިތުބާރު ގެއްލިފައިވާ ކަމަށް ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމު ވިދާޅުވެއްޖެ އެވެ.

މީކާއިލް މިހެން ވިދާޅުވީ މިއަދު ކުރިއަށްދިޔަ ރައްޔިތުންގެ މަޖިލިސް ޖަލްސާގައި ޓީޖީއެސްޓީ 16 ޕަސެންޓުން 17 ޕަސެންޓަށް ބޮޑުކުރަން މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ ބިލަށް ބަހުސްކުރައްވަމުންނެވެ.

މީކާއިލް ވިދާޅުވީ ސަރުކާރުން ނިންމާ ނިންމުންތަކަކީ ހަރުދަނާ ގޮތެއްގައި ނިންމާފައިވާ ނިންމުންތަކެއް ނޫން ކަމަށާއި އަދި މަޖިލީހަށް ހުށަހަޅާ އިސްލާހުތަކަކީ ވެސް އެއްވެސް ޕްލޭނެއް ނެތި ހުށަހަޅާފައިވާ އިސްލާހުތަކެއް ކަމަށެވެ.

މި ހަފުތާގައި ޓީޖީއެސްޓީ ބޮޑުކުރުމަށް ހުށަހަޅައިފައި ވަނިކޮށް، ގެސްޓު ހައުސްތަކުގެ އޯނަރުންނާއި ކަމާ ގުޅުން ހުރި އެހެނިހެން ފަރާތްތަކުން ރައީސް އަރިހަށް ގޮސް އެކަމާ ގުޅޭ ގޮތުން ކަންބޮޑުވުން ފާޅުކުރުމުން ނިންމުން ބަދަލު ކުރައްވަފާނެ ކަމަށް މީކާއިލް ވިދާޅުވި އެވެ.

މީކާއިލް ވިދާޅުވީ އެގޮތަށް މި ސަރުކާރުން އެތައް ނިންމުމެއް ބަދަލުކޮށްފި ކަމަށެވެ.

"މިހެން އުނބަށް ޖަހާ ޖަހާ މި ސަރުކާރުން ހުށައަޅާ އެއްޗެއްގަ ވެސް، މި ސަރުކާރުން ތައާރަފުކުރާ އެއްޗެއްގަ ވެސް، މި ސަރުކާރުން އާންމު ކުރާ ސިޔާސަތެއްގަ ވެސް، އެއްވެސް ކަހަލަ އިތުބާރެއް ރައްޔިތުންގެ މެދުގައި މިއަދު ނެތް މަންޒަރު އަޅުގަނޑުމެންނަށް ފެނިގެން މިދަނީ" އޭނާ ވިދާޅުވި އެވެ.

މި ސަރުކާރުގެ ހާރިޖީ ސިޔާސަތު ވެސް އެފަދައިން ބަދަލުވަމުންދާކަމަށް މީކާއިލް ފާހަގަކުރެއްވި އެވެ. އެގޮތުން "އިންޑިއާ އައުޓް" އަށް ގޮވާލަމުން ދިޔަ ބަޔަކު މިހާރު "އިންޑިއާ އިން" ކޮށްފައިވާކަމަށް އޭނާ ވިދާޅުވި އެވެ.

ސަރުކާރުގެ ނިންމުންތައް އަވަސް އަވަހަށް ބަދަލުކުރުމަށް ފާޑުކިޔުން އަމާޒުވެފައިވާއިރު، ސަރުކާރުން ތަކުރާރުކޮށް ނިންމުންތަކަށް ބަދަލު ގެނެސްފައިވާކަން ފާހަގަކޮށްލެވެ އެވެ.